close
eenadupratibha.net
about tariff Contact
Skip Navigation Links
Pratibha Engineering

ప్రధాన కథనాలు
నేడు ఏపీ ఎంసెట్‌ ఫలితాలు

ఈనాడు, అమరావతి: ఏపీ ఎంసెట్‌ ఫలితాలను విజయవాడలో అక్టోబరు 10న ఉదయం 10 గంటలకు మంత్రి ఆదిమూలపు సురేష్‌ విడుదల చేయనున్నారు. ఇంజినీరింగ్‌ పరీక్షకు 1,56,899 మంది హాజరు కాగా.. వ్యవసాయ, ఫార్మసీ పరీక్షలను 75,834 మంది రాశారు. కరోనా పాజిటివ్‌ కారణంగా పరీక్షకు హాజరు కాలేకపోయిన 97 మందికి అక్టోబరు 7న పరీక్ష నిర్వహించారు. ఇంటర్మీడియట్‌ మార్చి పరీక్షల్లో ఉత్తీర్ణులైన వారికి మొదట ర్యాంకులు విడుదల చేయనున్నారు. ఫలితాలు ‌www.eenadu.net, www.eenadupratibha.net  వెబ్‌సైట్‌ల్లో అందుబాటులో ఉంటాయి.

* బాలురు 83.45శాతం.. బాలికలు 88.25శాతం మంది అర్హత
* 12 నుంచి కౌన్సెలింగ్‌ ప్రారంభం
ఈనాడు, అమరావతి: ఏపీ పాలిసెట్‌లో బాలికల హవా కొనసాగింది. బాలురు 83.45శాతం మంది .. బాలికలు 88.25శాతం మంది అర్హత సాధించారు. బాలురు 50,706 మంది పరీక్షకు హాజరుకాగా 42,313 మంది ఉత్తీర్ణులయ్యారు. బాలికలు 20,925 మంది పరీక్ష రాయగా.. 18,467 మంది అర్హత పొందారు. రాష్ట్ర వ్యాప్తంగా మొత్తం 84.85శాతం మంది విద్యార్థులు ఉత్తీర్ణత సాధించినట్లు నైపుణ్యాభివృద్ధి, శిక్షణ శాఖ ప్రత్యేక ప్రధాన కార్యదర్శి అనంతరాము ప్రకటించారు. సాంకేతిక విద్యా శాఖ ప్రత్యేక కమిషనర్‌ ఎం.ఎం.నాయక్‌తో కలిసి విజయవాడలో అక్టోబ‌రు 9న‌ ఆయన పాలిసెట్‌ ఫలితాలను విడుదల చేశారు. రాష్ట్ర వ్యాప్తంగా 71,631 మంది పరీక్షకు హాజరు కాగా.. వీరిలో 60,780మంది అర్హత సాధించారు. మొదటి 10 ర్యాంకులు సాధించిన 12మంది విద్యార్థుల్లో 9 మంది తూర్పుగోదావరి జిల్లాకు చెందిన వారే ఉండటం విశేషం. మొదటి ర్యాంకు పొందిన మట్టా దుర్గ సాయి కీర్తి తేజ 120 మార్కులను గాను 120 సాధించారు. రాష్ట్ర వ్యాప్తంగా 271 కళాశాలల్లో 66,742 సీట్లు అందుబాటులో ఉన్నాయి. ఈ ఏడాది మొదటిసారిగా ఆర్థిక బలహీనవర్గాల(ఈడబ్ల్యూఎస్‌) కోటా అమలు చేయనున్నారు. దీంతో 10శాతం సీట్లను పెంచనున్నారు.
ర్యాంకులు ఇలా..
ర్యాంకు      పేరు      జిల్లా
1      మట్టా దుర్గ సాయి కీర్తి తేజ      పశ్చిమగోదావరి
2      సుంకర అక్షయ్‌ ప్రణీత్‌      తూర్పుగోదావరి
3      సవితల శ్రీదత్త శ్యామ్‌సుందర్‌      తూర్పుగోదావరి
4      తంగిరాల శరవణ మిత్ర సామయాజి      తూర్పుగోదావరి
5      గుణుపూరు వీఎస్‌ నిహారిక      విశాఖపట్నం
6      సాధనాల సంజన రామ్‌      తూర్పుగోదావరి
7      మరివాడ శ్రీ సాత్విక      తూర్పుగోదావరి
కౌన్సెలింగ్‌ షెడ్యూల్‌..
పాలిటెక్నిక్‌ కళాశాలల్లో సీట్ల కేటాయింపునకు నిర్వహించే కౌన్సెలింగ్‌ ప్రకటనను విడుదల చేశారు. కరోనా కారణంగా ఆన్‌లైన్‌లో కౌన్సెలింగ్‌ నిర్వహించనున్నారు. ధ్రువపత్రాలను అప్‌లోడ్‌ చేయడంతోపాటు రుసుములను ఆన్‌లైన్‌లో చెల్లించవచ్చు. ఆన్‌లైన్‌ ఇబ్బందులు పరిష్కరించేందుకు రాష్ట్రంలో 30 సహాయ కేంద్రాలను ఏర్పాటు చేయనున్నారు.
* ధ్రువపత్రాలు, ఆన్‌లైన్‌ రుసుము చెల్లింపు: అక్టోబరు 12 నుంచి 16 వరకు
* సహాయ కేంద్రాల్లో ధ్రువపత్రాల పరిశీలన: 14 నుంచి 17
* కళాశాలల ఎంపికకు ఐచ్ఛికాలు: 12 నుంచి 18
* సీట్ల కేటాయింపు: 20న
* కళాశాలల్లో ప్రవేశం: 21 నుంచి 27 వరకు
* తరగతుల ప్రారంభం: నవంబరు మొదటి వారం
సీబీఎస్‌ఈ 12వ తరగతి కంపార్ట్‌మెంట్‌ ఫలితాలు
దిల్లీ: ఇటీవల జరిగిన సీబీఎస్‌ఈ 12వ తరగతి కంపార్ట్‌మెంట్‌ పరీక్షా ఫలితాలు విడుదలయ్యాయి. ఈ ఫలితాలను సెంట్ర‌ల్ బోర్డ్ ఆఫ్ సెకండ‌రీ ఎడ్యుకేష‌న్‌ (సీబీఎస్‌ఈ) అక్టోబ‌రు 9 సాయంత్రం విడుదల చేసింది. ఫలితాల్లో 59.43శాతం ఉత్తీర్ణత నమోదైంది. సెప్టెంబర్‌ 22 నుంచి 30 వరకు జరిగిన పరీక్షలకు 1,16,125 మంది రిజిస్టర్‌ చేసుకోగా.. 1,05,847మంది హాజరయ్యారు. వీరిలో 52,211మంది ఉత్తీర్ణత సాధించినట్టు అధికారులు వెల్లడించారు. పరీక్షలు జరిగిన ఎనిమిది రోజుల్లోనే ఫలితాలు విడుదల చేయడం విశేషం. మామూలుగా అయితే, జులై- ఆగస్టు మాసాల మధ్య కంపార్ట్‌మెంట్‌ పరీక్షలు జరుగుతాయి. కానీ, ఈసారి కరోనా కల్లోలం నేపథ్యంలో నెలకొన్న అసాధారణ పరిస్థితుల్లో కొవిడ్‌ నిబంధనలు పాటిస్తూ సెప్టెంబర్‌ నెలాఖర్లో పకడ్బందీగా పరీక్షలు నిర్వహించారు.
ఏపీ పాలీసెట్‌ ఫలితాలు విడుదల
అమరావతి: ఆంధ్రప్రదేశ్‌ పాలీసెట్‌-2020 ప్రవేశ పరీక్ష ఫ‌లితాల‌ను అక్టోబ‌రు 9న‌ విడుద‌ల చేశారు. విజయవాడ ప్రసాదంపాడులోని సాంకేతిక విద్యాశాఖ కమిషనరేట్‌లో ఫలితాలను నైపుణ్యాభివృద్ధి సంస్థ ప్రత్యేక ప్రధాన కార్యదర్శి విడుదల చేశారు. పాలీసెట్‌ పరీక్షకు రాష్ట్ర వ్యాప్తంగా 71,631 మంది విద్యార్థులు హాజరుకాగా 60,780 మంది ఉత్తీర్ణులయ్యారు. మట్టా దుర్గా సాయి కీర్తితేజ (పశ్చిమగోదావరి) మొదటి ర్యాంకు, సుంకర అక్షయ్‌ ప్రణీత్‌ (తూర్పుగోదావరి) రెండో ర్యాంకు, శ్రీదత్త శ్యాంసుందర్ ‌(తూర్పుగోదావరి) 3వ ర్యాంకు సాధించారు.
11న మహిళా వర్సిటీ పీజీసెట్‌ - 2020
మహిళా వర్సిటీ(తిరుపతి), న్యూస్‌టుడే: శ్రీపద్మావతీ మహిళా వర్సిటీ(ఎస్పీఎంవీవీ) పీజీసెట్‌-2020 ప్రవేశ పరీక్షను రెండు తెలుగు రాష్ట్రాల్లో  అక్టోబరు 11న మొత్తం 5 పరీక్ష కేంద్రాల్లో నిర్వహించనున్నట్లు అడ్మిషన్స్‌ సంచాలకులు ఆచార్య సువర్ణలతాదేవి తెలిపారు. ఆంధ్ర, తెలంగాణ, రాయలసీమ ప్రాంతాల నుంచి మొత్తం 3,178 మంది పరీక్షకు హాజరుకానున్నట్లు వెల్లడించారు. తిరుపతి శ్రీపద్మావతీ మహిళా విశ్వవిద్యాలయంతోపాటు కర్నూలు, హైదరాబాద్‌, విజయవాడ, విశాఖపట్టణం కేంద్రాల్లో ప్రవేశ పరీక్ష జరుగుతుందని చెప్పారు. కడప, చిత్తూరు, నెల్లూరు, అనంతపురం, ఒంగోలు జిల్లాల నుంచి దరఖాస్తు చేసుకున్న అభ్యర్థులు మహిళా వర్సిటీ కేంద్రంలోనే పరీక్ష రాస్తారని పేర్కొన్నారు.
బీసీ గురుకుల ప్రవేశ పరీక్షా ఫలితాలు విడుదల
హైదరాబాద్‌: తెలంగాణలో నిర్వహించిన బీసీ గురుకుల జూనియర్‌ కళాశాలల ప్రవేశ పరీక్షా ఫలితాలు విడుదలయ్యాయి. ఎంపీసీలో నల్గొండ జిల్లా విద్యార్థిని బి.సంధ్య మొదటి ర్యాంకు సాధించగా.. బైపీసీలో గద్వాల జిల్లా విద్యార్థిని కె.సౌజన్య మొదటి ర్యాంకు కైవసం చేసుకుంది. ఎంఈసీలో యాదాద్రి జిల్లా విద్యార్థిని ధనుశ్రీ, సీఈసీలో పెద్దపల్లి జిల్లా విద్యార్థిని పి.మౌర్య మొదటి ర్యాంకులు సాధించారు. అక్టోబ‌రు 12, 13 తేదీల్లో జిల్లా కేంద్రాల్లో కౌన్సెలింగ్‌ నిర్వహించనున్నట్లు కార్యదర్శి మల్లయ్య తెలిపారు.
‘జోసా’ కౌన్సెలింగ్‌లో 50,798 సీట్లు
* ఐఐటీల్లో 16,053.. ఎన్‌ఐటీల్లో 23,506
ఈనాడు, హైదరాబాద్‌: జాయింట్‌ సీట్‌ అలకేషన్‌ అథారిటీ(జోసా) ఈ సారి దేశవ్యాప్తంగా ఐఐటీలు, ఎన్‌ఐటీలు, ట్రిపుల్‌ఐటీలు, ఇతర కేంద్ర ప్రభుత్వ ఆర్థిక సహకారంతో నడిచే సాంకేతిక విద్యాసంస్థల్లో మొత్తం 50,798 సీట్లను కౌన్సెలింగ్‌ ద్వారా భర్తీ చేయనుంది. అందులో ఐఐటీలు, ఎన్‌ఐటీల్లో 2,673 సీట్లు ప్రత్యేకంగా అమ్మాయిలకు సూపర్‌ న్యూమరరీ కోటా కింద కేటాయించారు. ఈ సారి 23 ఐఐటీల్లోని 16,053 సీట్లు, 31 ఎన్‌ఐటీల్లోని 23,506 సీట్లు, 26 ట్రిపుల్‌ఐటీల సీట్లను కలుపుకొని మొత్తం 101 విద్యాసంస్థల్లో సీట్లను జోసా ద్వారా భర్తీ చేస్తున్నారు. మొదటి విడత సీట్లను అక్టోబ‌రు 17వ తేదీన కేటాయించనున్నారు.
కార్మికుల పిల్లలకు ఉపకార వేతనాలు
* దరఖాస్తులు ఆహ్వానించిన కేంద్ర కార్మిక సంక్షేమ సంస్థ
ఈనాడు, హైదరాబాద్‌: సినిమా, బీడీ కార్మికుల పిల్లలతోపాటు సున్నపురాయి, మాంగనీసు, ఇనుప గనుల్లో పని చేసే కార్మికుల పిల్లల చదువుకు ఆర్థిక సాయం అందించేందుకు కేంద్ర కార్మిక సంక్షేమ సంస్థ దరఖాస్తులను ఆహ్వానిస్తోంది. ఒకటి నుంచి పదో తరగతి విద్యార్థులు ప్రీ మెట్రిక్‌ కేటగిరీలో, 11వ తరగతి నుంచి వృత్తివిద్య కోర్సుల వరకు పోస్ట్‌ మెట్రిక్‌ విభాగంలో అక్టోబ‌రు 31 వరకు జాతీయ స్కాలర్‌షిప్‌ పోర్టల్‌ https://scholarships.gov.in/ ద్వారా దరఖాస్తులను సమర్పించాలని హైదరాబాద్‌లోని కార్మిక సంక్షేమ సంస్థ కమిషనర్‌(సంక్షేమం) రమేశ్‌కుమార్‌ కోరారు. తెలంగాణ, ఆంధ్రప్రదేశ్‌లలోని ప్రభుత్వ, ప్రభుత్వ ఆమోదిత పాఠశాలలు, కాలేజీల్లో చదివే విద్యార్థులు 2020-21 విద్యా సంవత్సరానికి ఆర్థిక సాయం కోసం దరఖాస్తులు అందజేయాలని తెలిపారు. మరిన్ని వివరాల కోసం జాతీయ ఉపకార వేతనాల పోర్టల్‌ను పరిశీలించాలన్నారు. దరఖాస్తులకు సంబంధించిన సాంకేతికపరమైన అంశాలను జాతీయస్థాయిలో helpdesk@nsp.gov.in కు మెయిల్‌ లేదా 0120-6619540కు ఫోన్‌ చేసి నివృత్తి చేసుకోవచ్చని కమిషనర్‌ తెలిపారు. స్థానికంగా అయితే హైదరాబాద్‌ సుల్తాన్‌బజార్‌లోని కార్మిక సంక్షేమ సంస్థను 040-24658026 నంబరులో లేదా wlcwohyd@ap.nic.in లో సంప్రదించవచ్చన్నారు.
గ్రూప్‌-4 ఫలితాల విడుదల
ఈనాడు, హైదరాబాద్‌: తెలంగాణ పబ్లిక్‌ సర్వీస్‌ కమిషన్‌(టీఎస్‌పీఎస్సీ) గ్రూప్‌ -4 ఫలితాలను అక్టోబ‌రు 6న విడుదల చేసింది. 1595 ఉద్యోగాలకు అర్హత సాధించిన అభ్యర్థుల జాబితాను వెల్లడించింది. రెవెన్యూ, పంచాయతీరాజ్‌, వాణిజ్యపన్నులు, హోం, నీటిపారుదల, విపత్తు నిర్వహణ, అగ్నిమాపక, దళిత అభివృద్ధి, అటవీ, వైద్యఆరోగ్యం, స్టాంపులు, రిజిస్ట్రేషన్ల శాఖలకు చెందిన 1098 జూనియర్‌ అసిస్టెంటు, 450 టైపిస్టు, 44 స్టెనో(ఆంగ్లం), 3 స్టెనో(తెలుగు) పోస్టులు ఇందులో ఉన్నాయి. 2018లో వీటికి నోటిఫికేషన్‌ వెలువడగా నియామక ప్రక్రియ తాజాగా ముగిసింది. ఎంపికైన అభ్యర్థుల జాబితా కోసం https://www.tspsc.gov.in/ వెబ్‌సైట్‌లో లాగిన్‌ కావాలని టీఎస్‌పీఎస్సీ కార్యదర్శి వాణీప్రసాద్‌ సూచించారు. కరోనా తీవ్రత ఉన్నా టీఎస్‌పీఎస్సీ సిబ్బంది ఆరు నెలలుగా ఎంతో ధైర్యంగా, కష్టపడి పనిచేసి గ్రూప్‌-4 పోస్టుల ఫలితాల వెల్లడికి సహకరించారని, ఛైర్మన్‌ ఘంటా చక్రపాణి అభినందనలు తెలిపారు. తాజా ఫలితాలతో కలిసి టీఎస్‌పీఎస్సీ ద్వారా ఇప్పటి వరకు 30723 పోస్టులను భర్తీ చేసినట్లు ఆయన వెల్లడించారు. వైద్యఆరోగ్యశాఖ పోస్టులకు సంబంధించి న్యాయస్థానాల్లో పిటిషన్లు ఉండగా వాటికి ఇటీవల అనుమతులు లభించాయన్నారు. వైద్య ఆరోగ్యశాఖ నుంచి వివరణ వచ్చిన వెంటనే వీటి ఫలితాలను విడుదల చేస్తామని తెలిపారు.
జోసా కౌన్సెలింగ్‌ ప్రారంభం
* ఐఐటీ, ఎన్‌ఐటీ, సాంకేతిక విద్యా సంసల్లో ప్రవేశాలు
తాడేపల్లిగూడెం గ్రామీణ, న్యూస్‌టుడే: దేశంలోని ఐఐటీ, ఎన్‌ఐటీ, ఇతర సాంకేతిక విద్యా సంస్థ‌ల్లో ప్రవేశాల కోసం జోసా (జాయింట్ సీట్ అలకేషన్‌ అథారిటీ) అక్టోబ‌రు 06 నుంచి కౌన్సెలింగ్‌ ప్రారంభించింది. జేఈఈలో ర్యాంకులు సాధించిన విద్యార్థులు ఆయా సంస్థ‌ల్లోని కోర్సుల కోసం అక్టోబ‌రు 15లోపు రిజిస్ట్రేషన్‌ చేసుకోవాల్సి ఉంటుంది. అనంతరం విద్యార్థులకు సీట్లను కేటాయిస్తారు. ఈ ప్రక్రియ ఆరు విడతల్లో (నవంబరు 7న) జరగనుంది. మొదటి విడత సీట్ల కేటాయింపును అక్టోబ‌రు 17న ప్రకటిస్తారని ఏపీ నిట్ అధికారులు తెలిపారు. విద్యార్థులు ఆన్‌లైన్‌లో రిపోర్టింగ్‌ చేసి ఫీజు చెల్లించాల్సి ఉంటుందని వివరించారు.
ఏపీ నిట్‌లో పెరిగిన సీట్లు
ఏపీ నిట్‌ను 2015లో తాడేపల్లిగూడెంలో ప్రారంభించారు. మొత్తం ఎనిమిది కోర్సులకు గాను 480 సీట్లను కేటాయించారు. ఇవికాకుండా ఈ ఏడాది నుంచి సూపర్ న్యూమ‌ర‌రీ కింద మరో 120 సీట్లు పెరుగుతున్నాయి. దీంతో సీట్ల సంఖ్య 600కి చేరింది. ఇందులో 300 చొప్పున (50 శాతం సీట్లు) రాష్ట్ర విద్యార్థులతో, మిగిలిన సీట్లను ఇతర రాష్ట్రాల విద్యార్థులతో భర్తీ చేయనున్నారు.
తెలంగాణ ఎంసెట్‌ ఫలితాలు విడుదల
హైదరాబాద్: తెలంగాణ రాష్ట్ర వ్యాప్తంగా నిర్వహించిన ఎంసెట్‌-2020 పరీక్షా ఫలితాలను మంత్రి సబితా ఇంద్రారెడ్డి విడుదల చేశారు. కరోనా వైరస్‌ నేపథ్యంలో ఉదయం 9 గంటల నుంచి మధ్యాహ్నం 12 గంటల వరకు, మధ్యాహ్నం 3గంటల నుంచి సాయంత్రం 6 గంటల వరకు రెండు సెషన్లలో ఈ పరీక్షలు నిర్వహించారు. మొత్తం నాలుగు రోజులపాటు ఆన్‌లైన్‌ ద్వారా అధికారులు ఈ పరీక్షలు నిర్వహించారు. ఇందుకోసం మొత్తం 102 పరీక్ష కేంద్రాలను ఏర్పాటు చేయగా.. అందులో 79 తెలంగాణలో, 23 పరీక్షా కేంద్రాలు ఏపీలో ఉన్నాయి. ఎంసెట్ ఇంజినీరింగ్‌లో 75.29 శాతం ఉత్తీర్ణత సాధించగా, 89,734 మంది ఉత్తీర్ణులయ్యారు.
అక్టోబ‌రు 9 నుంచి తెలంగాణ ఎంసెట్‌ కౌన్సెలింగ్‌
* 12 నుంచి ధ్రువపత్రాల పరిశీలన
* 22న తొలి విడత సీట్ల కేటాయింపు
ఈనాడు, హైదరాబాద్‌: తెలంగాణ ఎంసెట్‌ ఇంజినీరింగ్‌ కౌన్సెలింగ్‌ ప్రక్రియ అక్టోబ‌రు 9వ తేదీ నుంచి ప్రారంభం కానుంది. కౌన్సెలింగ్‌ను రెండు విడతలుగా నిర్వహించనున్నారు. తెలంగాణ రాష్ట్ర ఉన్నత విద్యామండలి ఛైర్మన్‌ తుమ్మల పాపిరెడ్డి ఆధ్వర్యంలో అక్టోబ‌రు 5న సాంకేతిక విద్యాశాఖ కమిషనర్‌ నవీన్‌ మిత్తల్, క్యాంప్‌ అధికారి బి.శ్రీనివాస్‌ ఆన్‌లైన్‌ ద్వారా సమావేశమై ఎంసెట్‌ కాలపట్టికను ఖరారు చేశారు. ఇంటర్‌లో ఎంపీసీ చదివి ఎంసెట్‌ ఇంజినీరింగ్‌ రాసిన విద్యారులు ఈ కౌన్సెలింగ్‌ ద్వారా బీటెక్, బీఫార్మసీలో సీట్లు పొందొచ్చు. ప్రభుత్వ కళాశాలల్లో అన్ని సీట్లను, ప్రైవేట్‌ కళాశాలల్లో 70 శాతం సీట్లను కన్వీనర్‌ కోటా కింద ఈ కౌన్సెలింగ్‌ల ద్వారా భర్తీ చేస్తారు. ఈసారి మొదటి, చివరి కౌన్సెలింగ్‌ల‌తోపాటు స్పాట్‌ ప్రవేశాల వివరాలను ముందుగానే వెల్లడించడం విశేషం. ప్రైవేట్‌ కళాశాలల్లో ఇంజినీరింగ్, బీఫార్మసీ స్పాట్‌ అడ్మిషన్లకు నవంబరు 4న మార్గదర్శకాలు జారీ చేస్తారు.
మొదటి విడత కౌన్సెలింగ్‌ కాలపట్టిక
* 9-17వ తేదీ వరకు: ఆన్‌లైన్‌లో సమాచారం పూర్తి చేయడం, ధ్రువపత్రాల పరిశీలనకు తేదీ, సమయాన్ని అభ్యర్థులు ఎంచుకోవాలి.
* 12-18వ తేదీ వరకు: ధ్రువపత్రాల పరిశీలన
* 12-20వ తేదీ వరకు: వెబ్‌ ఆప్షన్లు
* 22వ తేదీ: సీట్ల కేటాయింపు
* 22-27వ తేదీ వరకు: ట్యూషన్‌ ఫీజు చెల్లింపు, వెబ్‌సైట్‌ ద్వారా సెల్ఫ్‌ రిపోర్టింగ్‌
రెండో విడత కౌన్సెలింగ్‌ కాలపట్టిక
* 29వ తేదీ: తొలి విడతలో హాజరుకాని వారు ధ్రువపత్రాల బుకింగ్‌ కోసం స్లాట్‌ బుక్‌ చేసుకోవాలి.
* 30వ తేదీ: ధ్రువపత్రాల పరిశీలన
* నవంబరు 2న: సీట్ల కేటాయింపు
* 2-5వ తేదీ వరకు: ట్యూషన్‌ ఫీజు చెల్లించడం, సెల్ఫ్‌ రిపోర్టింగ్‌ చేయడం
జేఈఈ అడ్వాన్స్‌డ్‌ ఫలితాలు విడుదల
దిల్లీ: దేశవ్యాప్తంగా ఐఐటీల్లోని బీటెక్‌ కోర్సుల్లో ప్రవేశానికి నిర్వహించే జేఈఈ అడ్వాన్స్‌డ్‌ ఫలితాలు విడుదలయ్యాయి. పరీక్షల నిర్వహణ బాధ్యతలను తీసుకున్న దిల్లీ ఐఐటీ ఫలితాలను విడుదల చేసింది. అడ్వాన్స్‌డ్‌ పరీక్షలో 43,204 మంది అర్హత సాధించగా.. చిరాగ్‌ ఫాలర్‌కు ప్రథమ ర్యాంకు వచ్చింది. గంగుల భువనరెడ్డి రెండో ర్యాంకు, బాలికల విభాగంలో కనిష్క మిట్టల్‌ ప్రథమ ర్యాంకు సాధించారు. ఓబీసీ విభాగంలో విజయవాడ విద్యార్థి జితేందర్‌కు తొలి ర్యాంకు వచ్చింది. ర్యాంకుల ఆధారంగా దేశంలోని 23 ఐఐటీల్లోని 13,600 సీట్లను భర్తీ చేయనున్నారు. అక్టోబ‌రు 6 నుంచి నవంబరు 13 వరకు 6 విడతల్లో కౌన్సెలింగ్‌ నిర్వహించనున్నారు.
వెబ్‌సైట్‌: http://result.jeeadv.ac.in/
అక్టోబ‌రు 5న‌ జేఈఈ అడ్వాన్స్‌డ్‌ ఫలితాలు
ఈనాడు, హైదరాబాద్‌: దేశంలో ఉన్న ఐఐటీల్లో బీటెక్‌ కోర్సుల్లో ప్రవేశానికి సెప్టెంబ‌రు 27న నిర్వహించిన జేఈఈ అడ్వాన్స్‌డ్‌ ఫలితాలు అక్టోబ‌రు 5న ఉదయం 10 గంటలకు వెల్లడికానున్నాయి. పరీక్ష నిర్వహణ బాధ్యతలు తీసుకున్న ఐఐటీ దిల్లీ అధికారులు ఫలితాల విడుదలకు ఏర్పాట్లు చేశారు. దేశవ్యాప్తంగా దాదాపు 1.45 లక్షల మంది పరీక్షలకు హాజరయ్యారు. ఐఐటీలు, ఎన్‌ఐటీలు, ట్రిపుల్‌ఐటీల్లో ప్రవేశానికి అక్టోబ‌రు 6వ తేదీ నుంచి ఉమ్మడి కౌన్సెలింగ్‌ను జాయింట్‌ సీట్‌ అలకేషన్‌ అథారిటీ(జోసా) నిర్వహించనుంది.
నవంబరు 2 నుంచి పాఠశాలలు!
* 9, 10 తరగతుల విద్యార్థులకు అవకాశం
* విద్యాశాఖ యోచన
ఈనాడు, హైదరాబాద్‌: రాష్ట్రంలో నవంబరు 2 నుంచి పాఠశాలలను తెరవాలని విద్యాశాఖ భావిస్తోంది. అక్టోబ‌రు 15 నుంచి విద్యాసంస్థలను తెరుచుకోవచ్చని, దానిపై తుది నిర్ణయం ఆయా రాష్ట్ర ప్రభుత్వాలదేనని కేంద్ర ప్రభుత్వం అన్‌లాక్‌ 5.0 మార్గదర్శకాల్లో పేర్కొన్న సంగతి తెలిసిందే. ఈ క్రమంలో పాఠశాలలను, వసతిగృహాలను తెరవడంపై విద్యాశాఖ మంత్రి సబితా ఇంద్రారెడ్డి, బీసీ, ఎస్సీ- మైనార్టీ, ఎస్టీ సంక్షేమ శాఖ మంత్రులు గంగుల కమలాకర్‌, కొప్పుల ఈశ్వర్‌, సత్యవతి రాథోడ్‌లు అక్టోబ‌రు 7న మర్రి చెన్నారెడ్డి మానవ వనరుల కేంద్రంలో సమావేశమై చర్చించనున్నారు. అనంతరం ముఖ్యమంత్రికి నివేదిక సమర్పించి.. ఆయన ఆమోదంతో నవంబరు 2 నుంచి పాఠశాలల్లో 9, 10 తరగతులతో పాటు జూనియర్‌, ఇతర కళాశాలలు తెరవాలని విద్యాశాఖ భావిస్తోంది. అదేరోజు తెలంగాణ రాష్ట్ర గుర్తింపు పొందిన ప్రైవేటు పాఠశాలల యాజమాన్యాల సంఘం (ట్రస్మా) ప్రతినిధులతో చర్చించి వారి అభిప్రాయాలనూ తీసుకోనున్నారు.
ఎంపీఎడ్‌ కోర్సుకు 100 మార్కుల ప్రశ్నపత్రం
ఈనాడు, హైదరాబాద్‌: రాష్ట్రంలోని ఏడు విశ్వవిద్యాలయాల పరిధిలోని పీజీ కోర్సుల్లో ప్రవేశానికి నిర్వహిస్తున్న కామన్‌ పీజీ ప్రవేశ పరీక్ష(సీపీగెట్‌)లో ఈసారి రెండేళ్ల మాస్టర్‌ ఆఫ్‌ ఫిజికల్‌ ఎడ్యుకేషన్‌(ఎంపీఎడ్‌)కు 100 మార్కుల ప్రశ్నపత్రం ఉండనుంది. గతేడాది వరకు 75 మార్కులకు పరీక్ష ఉండేది. మిగిలిన 25 మార్కులను క్రీడా పోటీల్లో సాధించిన ధ్రువపత్రాలకు కేటాయించేవారు. కరోనా కారణంగా ఈ సారి ఆ విధానాన్ని తొలగించామని సీపీగెట్‌ కన్వీనర్‌ ఆచార్య ఎన్‌.కిషన్‌ తెలిపారు. అదేవిధంగా ఈసారి నల్గొండలోని మహాత్మాగాంధీ విశ్వవిద్యాలయంలో ఎంఏ డెవలప్‌మెంట్‌ స్టడీస్‌ కోర్సును కొత్తగా ప్రవేశపెడుతున్నారని, దాన్ని చదవాలనుకునే వారు మాస్టర్‌ ఆఫ్‌ సోషల్‌ వర్క్‌(ఎంఎస్‌డబ్ల్యూ) పరీక్షకు హాజరవ్వాలన్నారు. అక్టోబరు 19వ తేదీ వరకు ఆలస్య రుసుం లేకుండా దరఖాస్తు చేసుకోవాలనీ, నవంబరు 1-14 తేదీల మధ్య పది రోజులపాటు ప్రవేశ పరీక్షలు ఉంటాయని ఆయన వివరించారు.
సివిల్స్‌ ప్రాథమిక పరీక్ష నిర్వ‌హ‌ణ‌కు ఏర్పాట్లు పూర్తి
* రాష్ట్రం నుంచి హాజరుకానున్న 52,924 మంది
ఈనాడు, హైదరాబాద్‌: సివిల్‌ సర్వీసెస్‌-2020 ప్రాథమిక పరీక్షకు తెలంగాణ నుంచి 52,924 మంది హాజరుకానున్నారు. దేశవ్యాప్తంగా అక్టోబ‌రు 4న జరగనున్న ప్రిలిమినరీ పరీక్షకు దాదాపు 8 లక్షల మంది దరఖాస్తు చేశారు. రాష్ట్రంలో హైదరాబాద్‌ నుంచి హాజరయ్యే 46,171 మంది కోసం 99 పరీక్షా కేంద్రాలు, వరంగల్‌లో 6,753 మందికి 16 కేంద్రాలు ఏర్పాటు చేశారు. కొవిడ్‌ మార్గదర్శకాలను పాటిస్తూ పరీక్షలు నిర్వహించేందుకు అన్ని ఏర్పాట్లు చేశారు. పరీక్షలు జరిగే చోట్ల ఆయా కలెక్టర్లు కేంద్రాలను పరిశీలించారు. ఉదయం 9.30-11.30 గంటల వరకు పేపర్‌-1 (జనరల్‌ స్టడీస్‌), మధ్యాహ్నం 2.30 గంటల నుంచి సాయంత్రం 4.30 గంటల వరకు పేపర్‌-2 (సీశాట్‌) పరీక్షలు జరుగుతాయి. వాస్తవానికి ఈ పరీక్ష మే 31న జరగాల్సి ఉండగా కరోనా కారణంగా వాయిదా పడుతూ వచ్చింది.
టీఎస్‌ లాసెట్‌ హాల్‌టికెట్ల డౌన్‌లోడ్‌కు అవకాశం
ఈనాడు, హైదరాబాద్‌: టీఎస్‌ లాసెట్‌, పీజీఎల్‌సెట్‌-2020కు హాల్‌టికెట్లు డౌన్‌లోడ్‌ చేసుకునేందుకు అధికారులు అవకాశం కల్పించారు. విద్యార్థులు lawcet.tsche.ac.in/ద్వారా వాటిని పొందవచ్చని టీఎస్‌ లాసెట్‌ కన్వీనర్‌ ప్రొ.జీబీ రెడ్డి ఒక ప్రకటనలో తెలిపారు. అక్టోబ‌రు 9న ఉదయం 10.30 నుంచి మధ్యాహ్నం 12 గంటల మధ్య టీఎస్‌ లాసెట్‌ (మూడేళ్ల), మధ్యాహ్నం 3 గంటల నుంచి సాయంత్రం 4.30 గంటల మధ్య టీఎస్‌ లాసెట్‌ (ఐదేళ్ల), పీజీఎల్‌సెట్‌ జరగనుంది. వీటికి 30,310 మంది దరఖాస్తు చేసుకోగా తెలంగాణ, ఏపీలో కలిపి 67 కేంద్రాలను ఏర్పాటు చేశారు.
టీఎస్‌ ఎడ్‌సెట్‌ హాల్‌టికెట్లు సైతం...
అక్టోబ‌రు 3న జరగనున్న టీఎస్‌ ఎడ్‌సెట్‌-2020 హాల్‌టికెట్లను edcet.tsche.ac.inనుంచి డౌన్‌లోడ్‌ చేసుకోవాలని కన్వీనర్‌ ప్రొ.టి.మృణాళిని ఒక ప్రకటనలో తెలిపారు. మొత్తం 45 పరీక్ష కేంద్రాలలో గణితం, ఫిజికల్‌ సైన్స్‌, బయోలాజికల్‌ సైన్స్‌, ఆంగ్లం, ఓరియంటల్‌ లాంగ్వేజెస్‌ సబ్జెక్టులకు పరీక్ష జరగనుంది. ప్రవేశ పరీక్షకు హాజరయ్యే విద్యార్థులు 90 నిమిషాలు ముందుగా పరీక్ష కేంద్రాలకు చేరుకోవాలని సూచించారు. మరోవైపు టీఎస్‌ ఎడ్‌సెట్‌ సోషల్‌ స్టడీస్‌ పరీక్ష అక్టోబ‌రు 1న‌ నిర్వహించగా 69.9 శాతం మంది హాజరయ్యారు.
గురుకులాల ప్రారంభానికి కసరత్తు
* 9, 10, ఇంటర్‌ విద్యార్థులకు తొలి ప్రాధాన్యం
* తొలుత 14 రోజుల క్వారంటైన్‌
* లక్షణాలు లేకుంటే తరగతులకు..
ఈనాడు, హైదరాబాద్‌: రాష్ట్రంలోని ఎస్సీ, ఎస్టీ, బీసీ, మైనార్టీ గురుకులాల ప్రారంభానికి సొసైటీలు కసరత్తు చేస్తున్నాయి. అక్టోబ‌రు 15 నుంచి పాఠశాలల ప్రారంభానికి కేంద్రం మార్గదర్శకాలు జారీ చేయడంతో రాష్ట్ర ప్రభుత్వ నిర్ణయం కోసం ఎదురుచూస్తున్నాయి. ఈలోగా ముందస్తు ఏర్పాట్లు చేస్తున్నాయి. తొలుత 9, 10, ఇంటర్‌ విద్యార్థులకు తరగతుల ప్రారంభానికి ప్రాధాన్యమివ్వనున్నాయి. గురుకులానికి వచ్చిన ప్రతి విద్యార్థిని 14 రోజుల పాటు ప్రత్యేక గదుల్లో క్వారంటైన్‌లో ఉంచుతారు. అప్పటికి ఎలాంటి లక్షణాలు లేకుంటే తరగతులకు పంపిస్తారు. ఏమైనా అనారోగ్య సమస్యలు ఉంటే వైద్యం అందిస్తారు. ఎస్సీ, ఎస్టీ గురుకులాల్లో ఇప్పటికే ‘పనేసియా’ పేరిట హెల్త్‌ కమాండ్‌ సెంటర్‌ ఉంది.
ఇవీ చర్యలు..
తరగతి గదిలో విద్యార్థుల మధ్య భౌతిక దూరం పాటించేందుకు వీలుగా.. అందరినీ ఒకేసారి కాకుండా తొలుత ఒక తరగతిలో సగం మంది విద్యార్థులనే పిలుస్తారు. ఆ తరువాత మరికొందరిని రప్పిస్తారు. విద్యార్థులందరికీ క్వారంటైన్‌ పూర్తయ్యే వరకు ఒకేచోట గుమిగూడకుండా చర్యలు తీసుకుంటారు.
ఆన్‌లైన్‌ తరగతుల కొనసాగింపు..
ఎస్సీ, ఎస్టీ, బీసీ గురుకులాల్లో 2020-21 విద్యాసంవత్సరానికి ఐదో తరగతి ప్రవేశాలు పూర్తికాలేదు. నవంబరు 1న పరీక్ష జరిగినా ప్రవేశాలు ఎప్పటికి పూర్తవుతాయో తెలియని పరిస్థితి. ఈ నేపథ్యంలో ఐదో తరగతిని మినహాయించి మిగతా విద్యార్థులకు సాధ్యమైనంత వరకు ఆన్‌లైన్‌ తరగతులు కొనసాగించాలని భావిస్తున్నారు.
విద్యార్థులకు ప్రత్యేక మెనూ..
కరోనా నేపథ్యంలో విద్యార్థులకు ప్రత్యేక మెనూ ఉండాలని గురుకుల సొసైటీలు సమాలోచనలు చేస్తున్నాయి. సందేహాల నివృత్తి కోసం వస్తున్న పలువురు విద్యార్థులు కరోనా బారిన పడుతున్నట్లు సమాచారం. ఈ నేపథ్యంలో పాఠశాలల్లోని విద్యార్థులకు అధిక పోషకాలు, వైరస్‌ను నిరోధించే ఆహారాన్ని అందించాలని సొసైటీలు నిర్ణయించాయి. ఈమేరకు మెనూలో మార్పులు, చేర్పులపై పౌష్టికాహార నిపుణులతో చర్చలు జరుపుతున్నారు.
‘సూపర్‌ 30’ సాయంతో ఐఐటీ శిక్షణ
* కేంద్రం ఆలోచన
ఈనాడు, దిల్లీ: ఐఐటీ ప్రవేశ పరీక్షలకు హాజరయ్యే ఎస్సీ, ఓబీసీ విద్యార్థులకు పట్నాలోని ‘సూపర్‌ 30’ కోచింగ్‌ కేంద్రం ద్వారా శిక్షణ ఇప్పించాలని కేంద్ర ప్రభుత్వం భావిస్తోంది. ఈ మేరకు కేంద్ర సామాజిక న్యాయం, సాధికారత మంత్రిత్వ శాఖ, ‘సూపర్‌ 30’ వ్యవస్థాపకుడు ఆనంద్‌ కుమార్‌ ఓ అవగాహనకు రానున్నారు. దేశంలోని రెండు వేల మంది ఎస్సీ, ఓబీసీ విద్యార్థులకు ఆన్‌లైన్‌ ద్వారా ఉచితంగా శిక్షణ ఇప్పించేందుకు ప్రయత్నాలు జరుగుతున్నాయి. కోచింగ్‌కు ఎంపికైన విద్యార్థులకు లాప్‌టాప్‌/ట్యాబ్‌లు ఇవ్వనున్నారు.
కొత్త విద్యాసంవత్సరం సీట్ల భర్తీలో క్రీడా కోటా
* ఎంబీబీఎస్, బీడీఎస్‌ మినహా మిగిలిన వాటిలో అమలు
ఈనాడు, హైదరాబాద్‌: రాష్ట్రంలో కొత్త విద్యాసంవత్సరం(2020-21) నుంచి ఎంబీబీఎస్, బీడీఎస్‌ కోర్సుల్లో తప్ప ఇంజినీరింగ్‌తోపాటు పలు కోర్సుల్లో క్రీడా కోటాను అమలు చేయనున్నారు. ఈ మేరకు క్రీడా శాఖ కార్యదర్శి కేఎస్‌ శ్రీనివాసరాజు ఇటీవల జీవో జారీ చేశారు. వివిధ కోర్సుల ప్రవేశాల్లో గతంలో క్రీడాకారులకు 0.5 శాతం రిజిర్వేష‌న్‌ను అమలు చేసేవారు. బోగస్‌ క్రీడా ధ్రువపత్రాలతో ఎంబీబీఎస్‌లో చేరుతున్న వ్యవహారం వెలుగులోకి రావడంతో ప్రభుత్వం 2018-19 విద్యాసంవత్సరం నుంచి క్రీడా కోటాను నిలిపివేసింది. క్రీడాకారుల విజ్ఞప్తుల మేరకు కమిటీ వేసిన ప్రభుత్వం.. తాజాగా ఈ విద్యాసంవత్సరం(2020-21) నుంచి క్రీడా కోటాను అమలు చేయాలని నిర్ణయించింది. ఈ రిజర్వేషన్‌ అమలులో 31 క్రీడలను పరిగణనలోకి తీసుకుంటారు. ఇంజినీరింగ్, అగ్రికల్చర్, ట్రిపుల్‌ఐటీ, బీఫార్మసీ, ఐసెట్, ఈసెట్, ఎడ్‌సెట్, పీఈసెట్, లాసెట్, డీఈఈసెట్, పాలిసెట్, ఐటీఐతోపాటు ట్రిపుల్‌ఐటీ, బీఆర్క్‌ సీట్లలో క్రీడా కోటా రిజర్వేషనును అమలుచేస్తారు. ఎంసెట్‌ ఇంజినీరింగ్‌ రాసిన విద్యారులు అక్టోబ‌రు 7వ తేదీలోపు ఆయా ధ్రువపత్రాలను సిద్ధంగా ఉంచుకోవాలని ప్రవేశాల కన్వీనర్‌ నవీన్‌ మిత్తల్‌ ఒక ప్రకటనలో తెలిపారు.
సివిల్స్‌ పరీక్ష వాయిదా వేయాలన్న పిటిషన్‌ కొట్టివేత
* అక్టోబ‌ర్ 4న య‌థాత‌థంగా సివిల్స్ ప్రిలిమిన‌రీ ప‌రీక్ష‌
దిల్లీ: సివిల్స్‌ ప్రిలిమినరీ పరీక్ష అక్టోబర్‌ 4న యథాతథంగా జరగనుంది. ఈ పరీక్షను వాయిదా వేయాలన్న పిటిషన్‌ను సుప్రీంకోర్టు కొట్టివేసింది. కొవిడ్‌-19 నిబంధనలు పాటిస్తూ పరీక్ష నిర్వహించాలని యూపీఎస్సీకి సుప్రీంకోర్టు సూచించింది. అలాగే చివరిసారి పరీక్ష రాస్తున్న వారి విషయంలో కీలక సూచన చేసింది. కరోనా కారణంగా పరీక్షకు హాజరు కాకపోతే వారికి మరోసారి అవకాశం కల్పించే అంశాన్ని పరిశీలించాలని యూపీఎస్సీకి సూచించింది.
సివిల్స్‌ ప్రిలిమినరీ పరీక్షను వాయిదా వేయాలని 20 మంది యూపీఎస్సీ ఆశావహులు సుప్రీంకోర్టులో పిటిషన్‌ దాఖలు చేసిన విషయం తెలిసిందే. దీనిపై యూపీఎస్సీ తాజాగా పరీక్ష వాయిదా వేసే ప్రసక్తే లేదని తన అఫిడవిట్‌లో పేర్కొంది. ఈ ఏడాది పరీక్షలు వాయిదా వేస్తే ఆ ప్రభావం వచ్చే ఏడాది జరిగే పరీక్షలపై పడుతుందని పేర్కొంది. దీంతో యూపీఎస్సీ వాదనను సమర్థిస్తూ పిటిషన్‌ను కొట్టివేసింది. అక్టోబర్‌ 4న జరిగే పరీక్షకు ఇప్పటికే యూపీఎస్సీ అన్ని ఏర్పాట్లూ చేసింది.
6న తెలంగాణ ఎంసెట్‌ ఇంజినీరింగ్‌ ఫలితాలు
ఈనాడు, హైదరాబాద్‌: తెలంగాణ ఎంసెట్‌ ఇంజినీరింగ్‌ ఫలితాలు అక్టోబరు 6న వెల్లడి కానున్నాయి. ముందుగా 5న విడుదల చేయాలని భావించినా అదేరోజు జేఈఈ అడ్వాన్స్‌డ్‌ ర్యాంకులు కూడా వెల్లడవుతున్నందున ఆరో తేదీన ఎంసెట్‌ ర్యాంకులు ప్రకటిస్తామని రాష్ట్ర ఉన్నత విద్యామండలి ఛైర్మన్‌ తుమ్మల పాపిరెడ్డి తెలిపారు. ఈ పరీక్షకు రెండు రాష్ట్రాల నుంచి 1,19,187 మంది హాజరయ్యారు. యూజీసీ ఆదేశాల ప్రకారం నవంబరు 1 నుంచి తరగతులు ప్రారంభించాల్సి ఉంది. అక్టోబరు రెండో వారం నుంచి కౌన్సెలింగ్‌ ప్రక్రియ చేపట్టాలని భావిస్తున్నారు.
3న కరోనా బాధిత విద్యార్థులకు పరీక్ష
ఎంసెట్‌ ఇంజినీరింగ్‌ పరీక్షలు జరిగినప్పుడు కరోనాతో బాధపడిన సుమారు 53 మంది విద్యార్థులకు అక్టోబరు 3న జేఎన్‌టీయూహెచ్‌లో పరీక్ష నిర్వహిస్తామని పాపిరెడ్డి వెల్లడించారు. అదేరోజు మరో ముగ్గురు ఈసెట్‌ విద్యార్థులకూ పరీక్ష ఉంటుందన్నారు. మిగిలిన పరీక్షల సమయంలోనూ బాధిత విద్యార్థులుంటే ప్రత్యేకంగా నిర్వహిస్తామని చెప్పారు.
ఎంసెట్‌ అగ్రికల్చర్‌కు 63,857 మంది హాజరు
తెలంగాణ ఎంసెట్‌ అగ్రికల్చర్‌ ఆన్‌లైన్‌ పరీక్షలు సెప్టెంబరు 29న ముగిశాయి. రెండు రాష్ట్రాల్లో కలిపి రెండు రోజుల్లో మొత్తం 78,978 మందికి గాను 63,857 మంది (80.85 శాతం) పరీక్ష రాశారు.
నిమ్స్‌లో ఎంహెచ్‌ఎం కోర్సుకు దరఖాస్తుల ఆహ్వానం
ఈనాడు, హైదరాబాద్‌: హైదరాబాద్‌ నిమ్స్‌ ఆసుపత్రిలో మాస్టర్‌ ఇన్‌ హాస్పిటల్‌ మేనేజ్‌మెంట్‌ (ఎంహెచ్‌ఎం) కోర్సులో చేరడానికి దరఖాస్తులను ఆహ్వానిస్తున్నట్లు ఆసుపత్రి పరిపాలన విభాగం అనుసంధాన అధికారి రమేశ్‌ మార్త తెలిపారు. డిగ్రీ పూర్తిచేసి, 2020, డిసెంబరు 31 నాటికి 20 నుంచి 30 ఏళ్లలోపు వయసున్నవారు అర్హులని పేర్కొన్నారు. అక్టోబరు 10లోగా అంతర్జాలంలో దరఖాస్తు చేసుకోవాలని సూచించారు. పూర్తి వివరాలకు https://nims.edu.in వెబ్‌సైట్‌ను సందర్శించాలన్నారు.
కరోనాతో ఏపీ ఎంసెట్‌ రాయని వారికి మరో అవకాశం
* 30లోగా దరఖాస్తుకు అవకాశం
కాకినాడ, న్యూస్‌టుడే: ఇటీవల నిర్వహించిన ఏపీ ఎంసెట్‌-2020కు కరోనా సోకి హాజరు కాలేకపోయిన విద్యార్థులకు పరీక్ష రాసేందుకు ప్రభుత్వం అవకాశం కల్పించినట్లు ఏపీ ఎంసెట్‌ ఛైర్మన్‌, జేఎన్‌టీయూకే వీసీ ప్రొ.ఎం.రామలింగరాజు తెలిపారు. ఇప్పటికే 20 మంది విద్యార్థులు హెల్ప్‌లైన్‌ సెంటర్‌ను ఆశ్రయించారన్నారు. ఇంకా ఎవరైనా ఉంటే హెల్ప్‌లైన్‌ సెంటర్‌ helpdeskeamcet2020@gmail.com కి ఎంసెట్‌ హాల్‌టికెట్‌, కొవిడ్‌ పాజిటివ్‌ రిపోర్టులను సెప్టెంబ‌రు 30 సాయంత్రం 5గంటల్లోగా పంపించాలని సూచించారు. వీరికి పరీక్ష నిర్వహించే తేదీని https://sche.ap.gov.in/eamcet ద్వారా తెలియజేస్తామన్నారు.
‘ఐసెట్‌’ ప‌రీక్ష‌కు ఏర్పాట్లు పూర్తి
* కన్వీనర్‌ ఆచార్య కె. రాజిరెడ్డి
ఎన్జీవోస్‌ కాలనీ, న్యూస్‌టుడే: ఎంబీఏ, ఎంసీఏ ప్రవేశాల కోసం నిర్వహించే టీఎస్‌ ఐసెట్‌కు ఏర్పాట్లు పూర్తి చేసినట్లు ఐసెట్‌ కన్వీనర్‌ ఆచార్య కె.రాజిరెడ్డి సెప్టెంబ‌రు 28న‌ తెలిపారు. ఈ పరీక్షకు తెలుగు రాష్ట్రాల నుంచి 58,452 మంది విద్యార్థులు దరఖాస్తు చేసుకున్నట్లు పేర్కొన్నారు. తెలంగాణలో హైదరాబాద్, ఆదిలాబాద్, కరీంనగర్, ఖమ్మం, కోదాడ, మహబూబ్‌నగర్, నల్గొండ, నిజామాబాద్, సిద్దిపేట, వరంగల్, ఆంధ్రప్రదేశ్‌లో విజయవాడ, విశాఖపట్నం, కర్నూలు, తిరుపతి కేంద్రాల్లో రీజినల్‌ కేంద్రాలను నెలకొల్పినట్లు తెలిపారు. సెప్టెంబ‌రు 30న ఉదయం 9.30 గంటల నుంచి 12 వరకు, మధ్యాహ్నం 3 నుంచి 5.30 గంటల వరకు, అక్టోబరు 1న ఉదయం 9.30 నుంచి 12 గంటల వరకు పరీక్ష నిర్వహించనున్నట్లు పేర్కొన్నారు. ప్రశ్నాపత్రం తెలుగు, ఆంగ్లం, ఉర్దూ మాధ్యమాల్లో ఉంటుందన్నారు. గంట ముందే కేంద్రాలకు చేరుకోవాలని విద్యార్థులకు సూచించారు. ఒక్క నిమిషం ఆలస్యం అయిన అనుమతించేది లేదన్నారు. విద్యార్థులు హాల్‌టికెట్, ఆధార్‌ గుర్తింపుకార్డు తెచ్చుకోవాలని స్పష్టం చేశారు. మాస్కు ధరించాలని, శానిటైజర్, నీళ్ల సీసా వెంట తెచ్చుకోవాలని సూచించారు. ప్రాథమిక ‘కీ’ని అక్టోబరు 7న విడుదల చేస్తామని కన్వీనర్‌ తెలిపారు.
సివిల్స్‌ ప్రిలిమినరీ పరీక్ష వాయిదా వేయలేం
* సుప్రీంకోర్టుకు తెలిపిన యూపీఎస్సీ
దిల్లీ: అన్ని ఏర్పాట్లు పూర్తయినందున అక్టోబర్ 4న జరగనున్న సివిల్ సర్వీసెస్‌ ప్రిలిమినరీ-2020 పరీక్షను వాయిదా వేయడం సాధ్యం కాదని యూనియన్‌ పబ్లిక్ సర్వీస్‌ కమిషన్(యూపీఎస్సీ) సెప్టెంబ‌రు 28న‌ సుప్రీంకోర్టుకు తెలిపింది. అయితే వాయిదా వేయకపోవడానికి గల కారణాలను వివరిస్తూ అఫిడవిట్ దాఖలు చేయాలని జస్టిస్‌ ఏఎం ఖన్విల్కర్‌ నేతృత్వంలోని ముగ్గురు సభ్యుల ధర్మాసనం యూపీఎస్సీని ఆదేశించింది. అలాగే దీనికి సంబంధించిన తదుపరి విచారణ సెప్టెంబ‌రు 30న‌ జరగనుంది.
దేశవ్యాప్తంగా కరోనా మహమ్మారి తీవ్ర స్థాయిలో విజృంభిస్తుండటంతో కొందరు సివిల్స్ అభ్యర్థులు ప్రిలిమినరీ పరీక్ష వాయిదాను కోరుతూ సుప్రీంలో పిటిషన్ వేశారు. కాగా, అక్టోబర్ 4న దేశ వ్యాప్తంగా జరగనున్న ఈ పరీక్షకు సుమారు 6లక్షల మంది అభ్యర్థులు హాజరుకానున్నట్లు అధికారులు అంచనా వేస్తున్నారు. వాస్తవంగా మే 31న జరగాల్సిన ఈ పరీక్ష కొవిడ్ కారణంగా వాయిదా పడింది. యూపీఎస్సీ జూన్‌ 5న షెడ్యూల్‌ను సవరిస్తూ, పరీక్ష నిర్వహణకు కొత్త తేదీని ప్రకటించింది.
28 నుంచి ఎంసెట్‌ అగ్రికల్చర్‌
* జాతీయ పరీక్షలు క్లాట్‌, నైపర్‌ జేఈఈ కూడా
ఈనాడు, హైదరాబాద్‌: రాష్ట్రంలో బీఎస్‌సీ అగ్రికల్చర్‌ కోర్సుల్లో ప్రవేశానికి ఎంసెట్‌(అగ్రికల్చర్‌) సెప్టెంబ‌రు 28 నుంచి రెండు రోజులపాటు జరగనుంది. రోజుకు రెండు విడతల చొప్పున ఆన్‌లైన్‌ పరీక్షలు నిర్వహిస్తారు. మొత్తం 78 వేల మంది దరఖాస్తు చేశారు. మరోవైపు దేశవ్యాప్తంగా ఉన్న జాతీయ న్యాయ విశ్వవిద్యాలయాల్లో ప్రవేశానికి కామన్‌ లా అడ్మిషన్‌ టెస్టు(క్లాట్‌) కూడా సెప్టెంబ‌రు 28న‌ జరగనుంది. దీనికి దేశవ్యాప్తంగా 77 వేల మంది హాజరుకానున్నారు. ఇంకా ఫార్మా విద్యకు పేరుపొందిన జాతీయ ఫార్మా విద్య, పరిశోధన సంస్థ(నైపర్లు)ల్లో ఎంబీఏ, ఎంటెక్‌ కోర్సుల్లో ప్రవేశానికి దేశవ్యాప్తంగా నైపర్‌ జేఈఈ పరీక్ష కూడా 28వ తేదీన‌ జరగనుంది.
తగ్గనున్న ఎంబీబీఎస్‌ ఫీజులు!
* అక్టోబరు చివర్లో లేదా నవంబరు తొలివారంలో కౌన్సెలింగ్‌ ప్రారంభం
* విశ్వవిద్యాలయం ద్వారానే అన్ని రకాల సీట్ల భర్తీ
* ‘ఈనాడు’ ముఖాముఖిలో ఎన్టీఆర్‌ ఆరోగ్య విజ్ఞాన విశ్వవిద్యాలయం ఉపకులపతి శ్యాంప్రసాద్‌
ఈనాడు, అమరావతి: పీజీలో తగ్గినట్లే ఎంబీబీఎస్‌, బీడీఎస్‌ వైద్య విద్యలోనూ యాజమాన్య కోటా ఫీజులు తగ్గే అవకాశాలు ఉన్నాయని ఎన్టీఆర్‌ ఆరోగ్య విజ్ఞాన విశ్వవిద్యాలయం ఉపకులపతి డాక్టర్‌ శ్యాంప్రసాద్‌ వెల్లడించారు. 2019-20 విద్యా సంవత్సరంలో ప్రైవేట్‌ వైద్య కళాశాలల్లో ఎంబీబీఎస్‌ ‘బి’ కేటగిరీ సీటును రూ.13,37,057తో భర్తీ చేసినట్లు తెలిపారు. దాంతో ఈ విద్యా సంవత్సరం పీజీ వైద్యవిద్యలో ఫీజులు తగ్గాయన్నారు. వీటి ప్రకారం ప్రైవేటు వైద్య కళాశాలల్లోని ఎంబీబీఎస్‌ ‘బి’ కేటగిరీ సీటు ఫీజు రూ.3 లక్షల వరకు తగ్గొచ్చని చెప్పారు. దీనికి అనుగుణంగానే ‘సి’ కేటగిరీ సీట్ల ఫీజులూ తగ్గుతాయన్నారు. వైద్య కళాశాలల యాజమాన్యాల నుంచి వచ్చిన ఆదాయ, వ్యయవివరాలను బట్టి కొత్త ఫీజులను ఉన్నత విద్య నియంత్రణ, పర్యవేక్షణ కమిషన్‌ ఖరారు చేస్తుందని తెలిపారు. ఎంబీబీఎస్‌ తరహాలోనే బీడీఎస్‌ ఫీజులూ తగ్గుతాయన్నారు. ప్రభుత్వ, ప్రైవేటు వైద్యకళాశాలల్లో 5,010, దంత వైద్య కళాశాలల్లో 1,440 సీట్లు ఉన్నాయని తెలిపారు. ఈసారి సీట్ల పెరుగుదలపై ఇప్పటివరకు సమాచారం లేదన్నారు. వైద్య విద్య ప్రవేశాలపై ఉపకులపతి డాక్టర్‌ శ్యాంప్రసాద్‌ ‘ఈనాడు’ ముఖాముఖిలో పలు విషయాలు వివరించారు.
* ఎంబీబీఎస్‌, బీడీఎస్‌, ఆయుర్వేద, హోమియో, యునాని, నేచురోపతి-యోగా కోర్సుల్లో ప్రవేశాలు జరుపుతాం. ఒకే దరఖాస్తు ద్వారా ఈ కోర్సుల్లో సీట్లను భర్తీ చేస్తాం.
* కొత్తగా అమల్లోకి వచ్చిన జాతీయ వైద్య కమిషన్‌ జారీచేసే మార్గదర్శకాలకు అనుగుణంగా సీట్ల భర్తీ జరుగుతుంది. సాధారణంగా వైద్యవిద్య ప్రవేశాలు ఆగస్టు 31కల్లా ముగియాలి. ఈ ఏడాది కరోనా ప్రభావంతో ఇప్పటివరకు ప్రారంభమే కాలేదు. నీట్‌ ఫలితాలు అక్టోబరు 12న విడుదల చేసే అవకాశం ఉన్నట్లు తెలిసింది. నీట్‌ ర్యాంకులు వెలువడిన పదిరోజుల్లో అఖిలభారత కోటా సీట్లు, స్వయంప్రతిపత్తి హోదా కలిగిన విశ్వవిద్యాలయాల్లో సీట్ల భర్తీ మొదలవుతుంది. ఇక్కడ తొలివిడత కౌన్సెలింగ్‌ పూర్తయ్యాకే ఇతర రాష్ట్రాల్లో తొలివిడత కౌన్సెలింగ్‌ మొదలవుతుంది. దీని ప్రకారం అక్టోబరు చివరినాటికి లేదా నవంబరు తొలివారంలో తొలివిడత కౌన్సెలింగ్‌ ప్రారంభం కావొచ్చు. ప్రవేశాల పూర్తికి 2 నెలల వరకు పట్టొచ్చు.
* కొవిడ్‌ కారణంగా విద్యార్థులు ఆన్‌లైన్‌లోనే దరఖాస్తు చేసి, అర్హత సర్టిఫికెట్లను అప్‌లోడ్‌ చేసుకొనే అవకాశాన్ని కల్పిస్తాం. అధికారులు నేరుగా వీటిని పరిశీలించి అర్హతలను ఖరారుచేస్తారు. ప్రభుత్వ, ప్రైవేటు వైద్య కళాశాలల్లోని అన్నిరకాల సీట్ల భర్తీ విశ్వవిద్యాలయం ద్వారానే జరుగుతుంది.
* రాష్ట్రంలోని 12 ప్రభుత్వ వైద్యకళాశాలల్లో ఉన్న సీట్లలో 15% జాతీయ కోటాకు అప్పగిస్తున్నాం. ఈ సీట్ల భర్తీ చూస్తే.. జాతీయ కోటాలో మన రాష్ట్ర విద్యార్థులు 60%, ఇతర రాష్ట్రాల వారు 40% చేరుతున్నారు. నీట్‌లో మంచి ర్యాంకులు వచ్చినవాళ్లు వేరే రాష్ట్రాల్లో ప్రతిష్ఠాత్మక వైద్య కళాశాలల్లో చేరుతున్నారు. ఈసారి కొవిడ్‌ వల్ల ఎక్కువమంది సొంత రాష్ట్రాల్లోనే చేరే అవకాశముంది. జాతీయ కోటాకు రాష్ట్రం నుంచి కేటాయించిన సీట్లు రెండో కౌన్సెలింగ్‌ తర్వాత మిగిలితే.. విశ్వవిద్యాలయానికి తిరిగి అప్పగిస్తున్నారు. 2019-20లో ఇలా 53 సీట్ల వరకూ వచ్చాయి. వీటిని రెండోవిడత కౌన్సెలింగ్‌లో కలిపి భర్తీ చేశాం.
* పలువురు విద్యార్థులు సీటు రాగానే చేరి, తర్వాత ఏవో కారణాలతో వదులుకుంటున్నారు. తొలి కౌన్సెలింగులో బీడీఎస్‌లో చేరి.. తర్వాతి కౌన్సెలింగులో ఎంబీబీఎస్‌లో సీటు వస్తే వదులుకోవడంలో తప్పు లేదు. కౌన్సెలింగ్‌ పూర్తయ్యాక విద్యార్థులు సీట్లను వదులుకోకుండా.. ఈ ప్రక్రియలో అవకతవకలు జరగకుండా ఉండేందుకు ప్రభుత్వం జరిమానాలు, ఇతర నిబంధనలు విధించింది. 2019-20లో చివరి కౌన్సెలింగ్‌ తర్వాత సీట్లను వదులుకున్న ముగ్గురు ఎంబీబీఎస్‌ విద్యార్థుల నుంచి రూ.3 లక్షల చొప్పున జరిమానా, 18% జీఎస్టీ కలిపి వసూలు చేశాం. బీడీఎస్‌లో రూ. లక్ష జరిమానా విధిస్తున్నాం.
* ప్రభుత్వ వైద్య కళాశాలల్లోని 85% సీట్లు, ప్రైవేటు వైద్య కళాశాలల్లోని 50% సీట్లను కన్వీనర్‌ కోటా కింద భర్తీ చేస్తాం. ప్రైవేటు వైద్య కళాశాలల్లో ‘బి’(35%) ‘సి’(15%) కేటగిరీ సీట్లనూ విశ్వవిద్యాలయమే నీట్‌ ర్యాంకులతో భర్తీ చేస్తుంది. దంతవైద్య విద్య, ఇతర కోర్సుల్లోనూ ఇదే విధానాన్ని అనుసరిస్తాం. మైనార్టీ కళాశాలల్లో సీట్లను సంబంధిత వర్గాల విద్యార్థులతోనే భర్తీ చేస్తున్నారు. వీటిలో సీట్లు మిగిలితే ఇతరులతో నింపుతున్నారు. గతంలో హైకోర్టు ఆదేశాల ప్రకారం ఏర్పడిన కమిటీ ఎంబీబీఎస్‌లో సీట్ల భర్తీని సమీక్షించింది. ఈ కమిటీ నివేదికపై ప్రభుత్వం జారీచేసే ఆదేశాల ప్రకారం విశ్వవిద్యాలయం చర్యలు తీసుకుంటుంది.
సెప్టెంబ‌రు 28 నుంచి తెలుగువర్సిటీ వార్షిక పరీక్షలు
నారాయణగూడ, న్యూస్‌టుడే: పొట్టి శ్రీరాములు తెలుగు విశ్వవిద్యాలయం వార్షిక పరీక్షలు సెప్టెంబ‌రు 28 నుంచి ప్రారంభమవుతాయని వర్సిటీ ఒక ప్రకటనలో వెల్లడించింది. 2020-21 విద్యా సంవత్సరానికి చెందిన బీఎఫ్‌ఏ, ఎంఏ, ఎంసీఏ, ఎంసీజే చివరి సెమిస్టర్‌ పరీక్షలు సెప్టెంబ‌రు 28 నుంచి 30వ తేదీ వరకు నిర్వహిస్తారు. యూజీసీ జారీ చేసిన కొవిడ్‌-19 నిబంధనల ప్రకారం పరీక్షలు జరుగుతాయి. కొవిడ్‌ లక్షణాలున్న విద్యార్థులు పరీక్షలకు హాజరు కావాల్సిన అవసరం లేదని వర్సిటీ స్పష్టం చేసింది. వారికి వైద్య ధ్రువీకరణ పత్రాలను పరిశీలించి సంబంధిత కోర్సు పరీక్షలను తిరిగి నిర్వహిస్తామని వర్సిటీ రిజిస్ట్రార్‌ ఆచార్య భట్టు రమేశ్‌ తెలిపారు.
ఎంసెట్‌ ఫలితాలు అక్టోబరు 6 లేదా 7న
ఈనాడు, అమరావతి: ఎంసెట్‌ ఫలితాలను అక్టోబరు 6 లేదా 7న విడుదల చేయనున్నట్లు మంత్రి ఆదిమూలపు సురేష్‌ ప్రకటించారు. కరోనా పాజిటివ్‌ కారణంగా ఎంసెట్‌లో 21మంది, ఐసెట్‌లో ఏడుగురు పరీక్ష రాయలేకపోయారని, వీరికి అక్టోబరు 7న ప్రత్యేకంగా పరీక్ష నిర్వహించనున్నట్లు వెల్లడించారు. ఇంజినీరింగ్‌కు 1,85,946 మంది దరఖాస్తు చేసుకోగా.. 1,56,899 మంది పరీక్షకు హాజరయ్యారని, వ్యవసాయ, ఫార్మసీ పరీక్షలకు 87,652 మంది దరఖాస్తు చేసుకోగా.. 75,834 మంది రాశారని తెలిపారు.
27న‌ జేఈఈ అడ్వాన్స్‌డ్ ప‌రీక్ష
* మొదటి మూడు నగరాల నుంచే పరీక్ష కేంద్రాల కేటాయింపు
దిల్లీ: దేశవ్యాప్తంగా సెప్టెంబ‌రు 27 నిర్వహించనున్న జేఈఈ అడ్వాన్స్‌డ్‌ పరీక్షకు సంబంధించి పరీక్ష కేంద్రాల కేటాయింపు పూర్తయిందని దిల్లీ ఐఐటీ వెల్లడించింది. ఫీజు చెల్లించిన విద్యార్థుల్లో 97.94 శాతం మందికి దరఖాస్తులో నమోదుచేసిన మొదటి మూడు ప్రాధాన్య నగరాల నుంచే పరీక్ష కేంద్రాలను ఎంపిక చేసినట్లు దిల్లీ ఐఐటీకి చెందిన ఓ సీనియర్‌ అధికారి తెలిపారు. మిగిలిన 2 శాతం విద్యార్థులకు వారు ఎంచుకున్న 8 ప్రాధాన్య నగరాల నుంచి పరీక్ష కేంద్రాలను కేటాయించామని వివరించారు. పరీక్ష కేంద్రాల కేటాయింపు ప్రక్రియను ఆధునిక సాంకేతిక పరిజ్ఞానం సహాయంతో చేపట్టామన్నారు. కొవిడ్‌ 19 నేపథ్యంలో పరీక్ష కేంద్రాల్లో భౌతిక దూరాన్ని పాటిస్తూ పరీక్షకు హాజరు కావాలని విద్యార్థులకు సూచించారు.
‘జేఈఈ’ హాల్‌టిక్కెట్‌పైనే పరీక్ష గది వివరాలు
ఈనాడు, హైదరాబాద్‌: పరీక్ష కేంద్రం చిరునామా తెలిసినా... అక్కడికి వెళ్లి పరీక్ష గది ఎక్కడుందో తెలుసుకోవడానికి బయట బోర్డు వద్ద విద్యార్థులు గుమిగూడటం సర్వసాధారణం. కరోనా నేపథ్యంలో గుమిగూడటాన్ని నిరోధించేందుకు సెప్టెంబ‌రు 27వ తేదీన జరగనున్న జేఈఈ అడ్వాన్స్‌డ్‌లో కొత్త విధానాన్ని అమలు చేయబోతున్నారు. విద్యార్థుల హాల్‌టికెట్‌లోనే పరీక్ష కేంద్రంలో ఏ గది/ల్యాబ్‌లో సీటు కేటాయించారోనన్న వివరాలు పొందుపరిచారు. కాకపోతే హాల్‌టిక్కెట్‌పై ఉన్న బార్‌కోడ్‌ను స్కానింగ్‌ చేయాల్సి ఉంటుంది. పరీక్ష కేంద్రంలోకి నేరుగా వెళ్లిన తర్వాత సిబ్బంది హాల్‌టిక్కెట్‌(అడ్మిట్‌ కార్డు)ను స్కానింగ్‌ చేసి మీకు కేటాయించిన కంప్యూటర్‌ ఏ ల్యాబ్‌లో ఉందో చెబుతారు. కొన్నిచోట్ల దూరంగా నగరాల్లో కేంద్రాలు కేటాయించినట్లు తెలుస్తోంది. ఆంధ్రప్రదేశ్‌లో శ్రీకాకుళం విద్యార్థులకు ఏకంగా తిరుపతిలో పరీక్ష కేంద్రాలు కేటాయించారని విద్యార్థులు వాపోతున్నారు.
ఇంటర్‌ మార్కులతో ఆర్‌ఐఈల్లో సీట్ల భర్తీ
* కరోనా కారణంగా ఈసారి ఆర్‌ఐఈ జేఈఈ రద్దు
* అక్టోబరులో బీఈడీ, ఎంఈడీ సీట్ల భర్తీకి దరఖాస్తుల ప్రక్రియ
ఈనాడు, హైదరాబాద్‌: ఇంజినీరింగ్‌కు ఐఐటీలు.. ఫార్మసీకి నైపర్లు.. మేనేజ్‌మెంట్‌ విద్యకు ఐఐఎంల మాదిరిగా ఉపాధ్యాయ విద్యకు జాతీయ స్థాయిలో పేరొందిన రీజినల్‌ ఇన్‌స్టిట్యూట్‌ ఆఫ్‌ ఎడ్యుకేషన్‌(ఆర్‌ఐఈ) సంస్థల్లో ఈసారి ఇంటర్‌/డిగ్రీ మార్కుల ఆధారంగా సీట్లు కేటాయించనున్నారు. ఏటా దేశవ్యాప్తంగా ఆర్‌ఐఈ జేఈఈ పేరిట ప్రవేశ పరీక్ష నిర్వహించి అందులో వచ్చిన మార్కులకు 60 శాతం వెయిటేజీ ఇచ్చి బీఈడీ, ఇంటిగ్రేటెడ్‌ బీఈడీ, ఎంఈడీ లాంటి కోర్సుల్లో సీట్లను భర్తీ చేసేవారు. ఈసారి కరోనా కారణంగా ప్రవేశ పరీక్షను నిర్వహించరాదని అధికారులు నిర్ణయించారు. ఈక్రమంలో నాలుగేళ్ల ఇంటిగ్రేటెడ్‌ బీఈడీ, ఆరేళ్ల ఇంటిగ్రేటెడ్‌ బీఈడీలకు ఇంటర్, బీఈడీకి డిగ్రీ, ఎంఈడీకి బీఈడీలో వచ్చిన మార్కుల ఆధారంగా సీట్ల భర్తీ చేయనున్నారు. అందుకు అక్టోబరు మొదటి వారంలో దరఖాస్తులను ఆహ్వానించనున్నారు. దేశవ్యాప్తంగా మైసూరు, భువనేశ్వర్, భోపాల్, అజ్మీర్, షిల్లాంగ్‌లలో ఆర్‌ఐఈలున్నాయి. అవన్నీ జాతీయ విద్యా పరిశోధన, శిక్షణ మండలి(ఎన్‌సీఈఆర్‌టీ) పరిధిలో పనిచేస్తాయి. వాటిల్లో బీఏ-బీఈడీ, బీఎస్‌సీ-బీఈడీ(4 సంవత్సరాలు), బీఈడీ(రెండేళ్లు), ఎంఎస్‌సీ-బీఈడీ(6 సంవత్సరాలు), ఎంఈడీ(రెండేళ్లు) కోర్సులున్నాయి. మైసూరు ఆర్‌ఐఈలో ఏపీ, తెలంగాణ విద్యార్థులకు ప్రతేక కోటా ఇస్తారు.
26న ఏపీ ఎంసెట్‌ ‘కీ’
ఈనాడు, అమరావతి: ఏపీ ఎంసెట్‌ ప్రాథమిక ‘కీ’ని సెప్టెంబరు 26న విడుదల చేయనున్నారు. అదే రోజు సమాధాన పత్రాలను వెబ్‌సైట్‌లో ఉంచనున్నారు. ప్రాథమిక ‘కీ’పై సెప్టెంబరు 28 వరకు అభ్యంతరాలను స్వీకరిస్తారు. అనంతరం తుది ‘కీ’ని విడుదల చేస్తారు. 9 విడతల్లోనిర్వహించిన ఇంజినీరింగ్‌ ప్రవేశ పరీక్షలు సెప్టెంబరు 23న ఉదయం ముగిశాయి. 84.38 శాతం మంది విద్యార్థులు పరీక్షలు రాశారు. సెప్టెంబరు 23 మధ్యాహ్నం నుంచి వ్యవసాయ, ఫార్మసీ పరీక్షలు ప్రారంభమయ్యాయి..
28 నుంచి ఇంటర్‌ ఆన్‌లైన్‌ ప్రవేశాలు?
* 10 రోజులపాటు దరఖాస్తుకు అవకాశం
ఈనాడు, అమరావతి: ఇంటర్‌ ప్రథమ సంవత్సరం ఆన్‌లైన్‌ ప్రవేశాలను సెప్టెంబ‌రు 28 నుంచి ప్రారంభించేందుకు విద్యా మండలి కసరత్తు చేస్తోంది. దరఖాస్తులకు సుమారు 10 రోజులపాటు అవకాశం కల్పించనున్నారు. ఈ ఏడాది తొలిసారిగా ఆన్‌లైన్‌ విధానంలో నిర్వహిస్తున్నారు. ప్రైవేటు జూనియర్‌ కళాశాలలకు కొత్త రుసుములను నిర్ణయించలేదు. దాంతో పాత రుసుములనే వసూలు చేయాల్సి ఉంటుంది. ప్రథమ సంవత్సరానికి రూ.3,119, ద్వితీయకు రూ.3,432 మాత్రమే తీసుకోవాలి. ప్రైవేటులోనూ రిజర్వేషన్లు అమలు కానున్నాయి. కరోనా కారణంగా పదో తరగతి విద్యార్థులందర్నీ ఉత్తీర్ణులను చేయడంతో ఇంటర్‌లో చేరే వారి సంఖ్య పెరగనుంది. దీంతో కొత్త కళాశాలలకు అనుమతులు ఇస్తున్నారు. రాష్ట్ర వ్యాప్తంగా 187 కళాశాలల ఏర్పాటుకు వచ్చిన దరఖాస్తులను విద్యా మండలి పరిశీలిస్తోంది. మండలానికో ఉన్నత పాఠశాలను జూనియర్‌ కళాశాలగా మార్పు చేసేందుకు పాఠశాల విద్య చేపట్టిన కసరత్తు ఇంకా పూర్తి కాలేదు.
దరఖాస్తు ఇలా..
* విద్యార్థులు ఎక్కడి నుంచైనా ప్రవేశాల కోసం ఆన్‌లైన్‌లో దరఖాస్తు చేసుకోవచ్చు. ఎలాంటి డేటాను సమర్పించాల్సిన అవసరం లేదు. వారికి నచ్చిన కళాశాలను ఎంపిక చేసుకోవాల్సి ఉంటుంది. ఎన్ని కళాశాలలకైనా ఐచ్ఛికాలను ఇచ్చుకోవచ్చు. ఎంపిక చేసుకున్న కళాశాల పరిస్థితులపై 25 ఛాయాచిత్రాలు విద్యార్థులకు కనిపిస్తాయి.
* కళాశాలల్లో మౌలిక సదుపాయాలు, రుసుము, అకడమిక్‌ వివరాలు అందుబాటులో ఉంటాయి.
* విద్యార్థులకు అవసరమైన స్టడీ మెటీరియల్‌ను అధికారులు రూపొందిస్తున్నారు. దానిని వెబ్‌సైట్‌లో అందుబాటులో ఉంచనున్నారు. సబ్జెక్టుల వారీగా వర్క్‌బుక్స్‌ను సిద్ధం చేస్తున్నారు. ప్రభుత్వ కళాశాలలకు ప్రింటింగ్‌ చేసిన వాటిని సరఫరా చేయాలని భావిస్తున్నారు. మిగతా వారి కోసం వీటిని ఆన్‌లైన్‌లో పెడతారు.
బడికెళ్లకుండానే పది పరీక్షలు!
* పాఠశాలతో సంబంధం లేకుండా.. రుసుం చెల్లించి హాల్‌టికెట్‌ పొందొచ్చు
* ఈ విద్యా సంవత్సరానికి వెసులుబాటు ఇచ్చే యోచనలో విద్యాశాఖ
ఈనాడు, హైదరాబాద్‌: పాఠశాలలో చేరకపోయినా రుసుం చెల్లించి పదో తరగతి వార్షిక పరీక్షలు రాయొచ్చు. ఇలాంటి వెసులుబాటును ఈ విద్యా సంవత్సరానికి(2020-21) ఇవ్వాలని పాఠశాల విద్యాశాఖ యోచిస్తోంది. అన్ని వర్గాల అభిప్రాయాలు సేకరించిన అనంతరం నిర్ణయం తీసుకునే అవకాశం కన్పిస్తోంది.
ప్రస్తుతం పదో తరగతి పరీక్షలు రాయాలంటే విధిగా ఏదో ఒక పాఠశాలలో చదివి ఉండాలనే నిబంధన ఉంది. ఆ పాఠశాల ద్వారానే విద్యార్థుల వివరాలు ప్రభుత్వ పరీక్షల విభాగానికి(ఎస్‌ఎస్‌సీ బోర్డు) సమర్పించాల్సి ఉంటుంది. కరోనా కారణంగా పాఠశాలలు మూతపడ్డాయి. ఇప్పటివరకు ప్రైవేటు పాఠశాలల్లో చదివి, ఆర్థికపరిస్థితులు తలకిందులైన కారణంగా ఫీజులు చెల్లించలేని పరిస్థితి చాలా కుటుంబాల్లో నెలకొంది. ఆన్‌లైన్‌ తరగతులు నిర్వహిస్తున్న కొన్ని ప్రైవేటు పాఠశాలలు ఫీజులు చెల్లించాలంటూ తల్లిదండ్రులపై ఒత్తిడి తెస్తున్నాయి. చెల్లించని వారిపై అనేక రకాలుగా వేధింపులకూ పాల్పడుతున్నాయి. మరికొన్ని యాజమాన్యాలు ప్రస్తుతానికి చూసీచూడనట్లు వ్యవహరిస్తున్నా, చివరికి మొత్తం రుసుములు చెల్లిస్తేనే వార్షిక పరీక్షలకు అనుమతిస్తామని ఒత్తిడితెచ్చే అవకాశాలుంటాయని విద్యాశాఖ భావిస్తోంది. అలా ఫీజులు కట్టలేని వాళ్లు చదువు మానేయకుండా, టీవీ పాఠాలతో చదువుకుంటూ పదోతరగతి పరీక్షలు రాసే అవకాశం ఇవ్వాలని అధికారులు యోచిస్తున్నారు. దీనిపై నిర్ణయం తీసుకుంటే ఎవరైనా నేరుగా ఎస్‌ఎస్‌సీ బోర్డుకు పరీక్ష రుసుం చెల్లించడం ద్వారా హాల్‌టికెట్‌ పొంది, పరీక్షలు రాసే వీలుంటుంది. దీనిపై ఇటీవల పాఠశాల విద్యాశాఖ అధికారులు చర్చించినట్లు తెలిసింది.
అంతర్గత మార్కులు లేకుంటేనే
నేరుగా పరీక్ష రాసే సదుపాయం 2015 వరకు అమల్లో ఉండేది. నిరంతర సమగ్ర మూల్యాంకనం(సీసీఈ) విధానం అమలులో భాగంగా అంతర్గత మార్కులు ప్రవేశపెట్టడంతో విద్యాశాఖ దాన్ని రద్దు చేసింది. ఈసారి అంతర్గత మార్కులు(సబ్జెక్టుకు 20) రద్దు చేసే దిశగా నిర్ణయం తీసుకుంటే, నేరుగా పరీక్ష రాసే విధానం అమలు చేయవచ్చని కొందరు సూచించినట్లు సమాచారం. అంటే విద్యా సంవత్సరంలో జరగాల్సిన నాలుగు ఫార్మేటివ్‌ అసెస్‌మెంట్లు(ఎఫ్‌ఏ)లను రద్దు చేయాల్సి ఉంటుందన్న మాట. దీనిపై ప్రభుత్వం నిర్ణయం ప్రకటించాల్సి ఉంటుంది.
‘ప్రతి సంవత్సరం రాష్ట్రంలో 5.50 లక్షల మంది పదో తరగతి పరీక్షలు రాస్తారు. అందులో 3 లక్షల మందికిపైగా ప్రైవేటు పాఠశాలల విద్యార్థులే ఉంటారు. వారిలో ఫీజులు కట్టలేని వారికి ఈ వెసులుబాటు ప్రయోజనకరంగా ఉంటుందని’ విద్యాశాఖ భావిస్తోంది.
ఇంటర్‌ సిలబస్‌ 30 శాతం తగ్గింపు
ఈనాడు, హైదరాబాద్‌: ఇంటర్‌ ప్రథమ, ద్వితీయ సంవత్సరాల పాఠ్య ప్రణాళికను ఈ విద్యాసంవత్సరం(2020-21) 30 శాతం తగ్గించారు. ఈ మేరకు ఇంటర్‌బోర్డు కీలక నిర్ణయం తీసుకుంది. బోర్డు ప్రతిపాదనకు ఇటీవల రాష్ట్ర ప్రభుత్వం ఆమోదం తెలపడంతో తొలగించిన పాఠ్యాంశాల వివరాలను ఇంటర్‌బోర్డు ఓ ప్రకటనలో వెల్లడించింది. కరోనా కారణంగా విద్యాసంస్థలు మూతపడటంతో దాదాపు రెండు నెలల క్రితమే 30 శాతం సిలబస్‌లో కోత విధిస్తూ సీబీఎస్‌ఈ నిర్ణయం తీసుకున్న సంగతి తెలిసిందే. ఎంపీసీ, బైపీసీ గ్రూపులకు సంబంధించి సీబీఎస్‌ఈ తొలగించిన పాఠ్యాంశాలను ఇక్కడా తొలగించామని బోర్డు కార్యదర్శి జలీల్‌ తెలిపారు. ఇతర ఆర్ట్స్‌ గ్రూపు సబ్జెక్టులైన చరిత్ర, ఆర్థికశాస్త్రం, రాజనీతి శాస్త్రం, జాగ్రఫీ, పబ్లిక్‌ అడ్మినిస్ట్రేషన్‌, కామర్స్‌, అకౌంటెన్సీ సిలబస్‌పై నిపుణుల కమిటీలను నియమించి వాటి సిఫార్సుల ఆధారంగా తగ్గించామని పేర్కొన్నారు. ఈ తగ్గింపు ఈ ఒక్క విద్యాసంవత్సరానికి మాత్రమే వర్తిస్తుందన్నారు. ఇంటర్‌బోర్డు వెబ్‌సైట్‌ (tsbie.cgg.gov.in)లో తొలగించిన ఆయా పాఠ్యాంశాలను ఉంచామని  తెలిపారు.
టీపీఎస్‌, 8 సూత్రాల పథకం పాఠాల తొలగింపు
ప్రతి సబ్జెక్టులో అధ్యాయాల వారీగా ఆయా పాఠ్యాంశాలను తొలగించారు. ద్వితీయ సంవత్సరం చరిత్రలో మర్రి చెన్నారెడ్డి స్థాపించిన తెలంగాణ ప్రజాసమితి(టీపీఎస్‌), ఇందిరాగాంధీ ప్రవేశపెట్టిన ఎనిమిది సూత్రాల పథకంతో పాటు ప్రజాదరణ పొందిన జాతరలు తదితర పాఠ్యాంశాలు ఉండవు.
నవంబర్‌ 1 నుంచి తొలి సంవత్సర తరగతులు
* వేసవి, ఇతర సెలవుల్లో కోత.. 6 రోజుల విద్యాబోధన
* మార్గదర్శకాలు విడుదల చేసిన యూజీసీ
దిల్లీ: కళాశాలలు, విశ్వవిద్యాలయాలకు కొత్త అకడమిక్‌ క్యాలెండర్‌ను యూనివర్సిటీ గ్రాంట్స్‌ కమిషన్‌(యూజీసీ) సెప్టెంబ‌రు 22న‌ ప్రకటించింది. దీని ప్రకారం 2020-21 విద్యాసంవత్సరానికి అండర్‌ గ్రాడ్యుయేట్, పీజీ తొలి సంవత్సర తరగతులు నవంబర్‌ 1 నుంచి ప్రారంభం కానున్నాయి. శీతాకాల, వేసవి సెలవుల్లో కోతలు విధించాలని యూజీసీ పేర్కొంది. అంతేకాదు... వారానికి ఆరు రోజులు పాఠాలు బోధించాలి. దీనివల్ల నష్టపోయిన విద్యా సమయాన్ని భర్తీ చేయొచ్చని యూజీసీ తెలిపింది. ఈ విషయాన్ని కేంద్ర విద్యాశాఖ మంత్రి రమేశ్‌ పోఖ్రియాల్‌ ‘నిషాంక్‌’ కూడా ధ్రువీకరించారు. నిపుణుల కమిటీ మార్గదర్శకాలను యూజీసీ ఆమోదించినట్లు ఆయన ట్వీట్‌ చేశారు. సెప్టెంబర్‌లో కళాశాలల తెరచుకుంటాయన్న అంచనాతో ఏప్రిల్‌లోనే యూజీసీ ఓ ప్రత్యామ్నాయ క్యాలెండర్‌ను రూపొందించింది. కరోనా వైరస్‌ కేసులు పెరిగిపోవడంతో అది సాధ్యపడలేదు. ఇప్పుడు తాజా క్యాలెండర్‌ను విడుదల చేసింది. ఆరు రోజుల విద్యాబోధన 2020-21 విద్యాసంవత్సరానికే కాకుండా 2021-22కు కూడా వర్తిస్తుందని పేర్కొంది.
వెబ్‌సైట్‌లో టీఎస్‌ఎంసెట్‌(అగ్రికల్చర్‌, మెడికల్‌) హాల్‌టికెట్లు
* 84 కేంద్రాల్లో పరీక్ష నిర్వ‌హ‌ణ‌
ఈనాడు, హైదరాబాద్‌: టీఎస్‌ఎంసెట్‌ (అగ్రికల్చర్‌, మెడికల్‌) రాయనున్న విద్యార్థులకు సెప్టెంబ‌రు 21 నుంచి హాల్‌టికెట్లు డౌన్‌లోడ్‌ చేసుకునే సదుపాయం అందుబాటులోకి వచ్చింది. సెప్టెంబ‌రు 25లోపు https://eamcet.tsche.ac.in/ వెబ్‌సైట్‌లో హాల్‌టికెట్లు పొందవచ్చని ఎంసెట్‌ కన్వీనర్‌ ప్రొ.ఎ.గోవర్ధన్‌ తెలిపారు. సెప్టెంబ‌రు 28, 29 తేదీల్లో అగ్రికల్చర్‌, మెడికల్‌ విభాగాల్లో టీఎస్‌ఎంసెట్‌ జరగనుంది. తెలంగాణ, ఏపీలో 84 కేంద్రాల్లో పరీక్ష నిర్వహించేందుకు అధికారులు ఏర్పాట్లు చేస్తున్నారు. 78,970 మంది విద్యార్థులు దరఖాస్తు చేసుకున్నారు.
‘బి.కాం’కే మొగ్గు
* దోస్త్‌ మొదటి విడతలో 1,41,340 మందికి డిగ్రీలో ప్రవేశాలు
* వారిలో 53,327 మందికి బి.కాం సీట్లు
* ప్రారంభమైన రెండో విడత దోస్త్‌ ప్రక్రియ
ఈనాడు, హైదరాబాద్‌: డిగ్రీ కోర్సుల్లో ఎక్కువ మంది విద్యార్థులు బి.కాం కోర్సువైపే మొగ్గు చూపుతున్నారు. ఈ విద్యాసంవత్సరం సీట్లు పొందిన వారిలో 37 శాతం మంది బి.కాం వారే ఉండటం గమనార్హం. ‘దోస్త్‌’ ప్రక్రియ ద్వారా వెబ్‌ ఆప్షన్లు ఇచ్చుకున్న విద్యార్థులకు సెప్టెంబ‌రు 21న‌ సీట్లు కేటాయించారు. తెలంగాణ రాష్ట్ర ఉన్నత విద్యామండలి కార్యాలయంలో 21న‌ దోస్త్‌ మొదటి విడత ప్రవేశాల వివరాలను ఛైర్మన్‌ తుమ్మల పాపిరెడ్డి, దోస్త్‌ కన్వీనర్‌ ఆర్‌.లింబాద్రి, కళాశాల విద్యాశాఖ అకడమిక్‌ గైడెన్స్‌ అధికారి బాలభాస్కర్, దోస్త్‌ సమన్వయకర్త గజేంద్రబాబు వెల్లడించారు. రాష్ట్ర కళాశాల విద్యాశాఖ కమిషనర్‌ నవీన్‌ మిత్తల్‌ ఆన్‌లైన్‌ ద్వారా పాల్గొన్నారు. ఈ విద్యా సంవత్సరం నూతనంగా ప్రవేశపెట్టిన బీఎస్‌సీ డేటా సైన్స్‌లో 6,780 సీట్లు ఉండగా.. 2,598 మందికి సీట్లు దక్కాయని వారు చెప్పారు. మొత్తం 1,53,323 మంది వెబ్‌ ఆప్షన్లు ఇచ్చుకున్న వారిలో 1,41,340 మందికే సీట్లు దక్కాయని, తక్కువ ఆప్షన్లు ఇవ్వడంతో 11,983 మందికి సీట్లు రాలేదని కన్వీనర్‌ లింబాద్రి వివరించారు. ఈ సందర్భంగా రెండో, మూడో విడతల కౌన్సెలింగ్‌ సవరణ కాలపట్టికను వారు విడుదల చేశారు.
* 26వ తేదీలోపు ఆన్‌లైన్‌ సెల్ఫ్‌ రిపోర్టింగ్‌..
సీటు పొందిన వారు దోస్త్‌ అభ్యర్థి లాగిన్‌లో సెప్టెంబ‌రు 26వ తేదీలోపు రూ.500 లేదా రూ.వెయ్యి(తగినవిధంగా) చెల్లించి ఆన్‌లైన్‌ సెల్ఫ్‌ రిపోర్టింగ్‌ ద్వారా తమ సీటును రిజర్వు చేసుకోవాలి. లేనిపక్షంలో సీటు రద్దవుతుంది.
* కోర్సుల వారీగా సీట్లు పొందిన వారి సంఖ్య
కోర్సు     సీట్లు పొందిన వారు (శాతం)
బి.కాం     53,327(37.73)
ఫిజికల్‌ సైన్సెస్‌     35,349(25.01)
లైఫ్‌ సైన్సెస్‌     29,401(20.80)
ఆర్ట్స్‌     17,508(12.39)
డి ఫార్మసీ     217(0.15)
ఇతర     5,538(3.92)
మొత్తం     1,41,340(100)
ముఖ్యాంశాలు..
* ఈసారి మొత్తం 4,07,390 సీట్లు అందుబాటులో ఉండగా.. మొదటి విడత సీట్ల కేటాయింపు తర్వాత 2,66,050 సీట్లు ఖాళీగా ఉన్నాయి.
* గతేడాది 988 కళాశాలలు ఉండగా.. ఈసారి 982కు తగ్గాయి. సబ్జెక్టుల కాంబినేషన్లు 174 నుంచి 501కు పెరిగాయి.
* సీట్లు పొందిన వారిలో 65,167 మంది అబ్బాయిలు, 76,173 మంది అమ్మాయిలు ఉన్నారు.
* మొదటి ప్రాధాన్యం కింద 1,08,289(76.62 శాతం) మంది, రెండో ప్రాధాన్యం కింద 30,459 మంది(29.41 శాతం) సీట్లు పొందారు.
రెండో, మూడో విడత రిజిస్ట్రేషన్‌ కాలపట్టిక
* సెప్టెంబ‌రు 21-25వ తేదీ వరకు: రెండో విడత రిజిస్ట్రేషన్‌
* 21-26వ తేదీ వరకు: వెబ్‌ ఆప్షన్లు
* అక్టోబరు 1న: సీట్ల కేటాయింపు
* అక్టోబరు 1-5వ తేదీ వరకు: మూడో విడత రిజిస్ట్రేషన్‌
* 1-6వ తేదీ వరకు: వెబ్‌ ఆప్షన్లు
* 10వ తేదీ: సీట్ల కేటాయింపు
* 10-15వ తేదీ వరకు: మూడు విడతల్లో సీట్లు పొందిన వారు కళాశాలల్లో రిపోర్ట్‌ చేయాలి.
కేంద్ర సాయుధ బలగాల్లో లక్ష ఖాళీలు
* రాజ్యసభలో వెల్లడించిన కేంద్ర హోంశాఖ స‌హాయ మంత్రి
దిల్లీ: బీఎస్‌ఎఫ్‌, సీఆర్‌పీఎఫ్‌ వంటి వివిధ కేంద్ర సాయుధ బలగాల్లో దాదాపు లక్షకు పైగా ఉద్యోగాలు ఖాళీగా ఉన్నాయని కేంద్ర ప్రభుత్వం వెల్లడించింది. వీటిలో చాలా వరకు పదవీ విరమణ, మరణాలు, రాజీనామాల వల్ల ఏర్పడ్డ ఖాళీలేనని తెలిపింది. ఈ మేరకు సభలో ఓ సభ్యుడు అడిగిన ప్రశ్నకు కేంద్ర హోంశాఖ సహాయ మంత్రి నిత్యానంద్‌ రాయ్‌ రాతపూర్వక సమాధానం ఇచ్చారు. అత్యధికంగా బీఎస్‌ఎఫ్‌లో 28,926 ఖాళీలు ఉన్నాయన్నారు. సీఆర్‌పీఎఫ్‌లో 26,506, సీఐఎస్‌ఎఫ్‌లో 23,906, ఎస్ఎస్‌బీలో 18,643, ఐటీబీపీలో 5,784, అస్సాం రైఫిల్స్‌లో 7,328 పోస్టులు ఖాళీగా ఉన్నాయని వెల్లడించారు. వీటిలో చాలా వరకు కానిస్టేబుల్‌ స్థాయి పోస్టులేనన్నారు.
నిర్ధారిత ప్రక్రియ ద్వారానే వీటిని భర్తీ చేస్తామని మంత్రి తెలిపారు. వీటిలో కొన్ని పదోన్నతులు, డిప్యూటేషన్‌ ద్వారా భర్తీ చేస్తామన్నారు. మరికొన్నింటికి కొత్తగా నియామకాలు చేపట్టాల్సి ఉందన్నారు. కేంద్ర సాయుధ బలగాల్లో ఉన్న అన్ని ఖాళీలను భర్తీ చేయడానికి కేంద్రం వేగంగా చర్యలు తీసుకుంటోందన్నారు. ప్రస్తుతం 60,210 కానిస్టేబుల్‌, 2,534 ఎస్ఐ పోస్టులు స్టాఫ్‌ సెలెక్షన్‌ కమిషన్‌ ద్వారా.. 330 అసిస్టెంట్‌ కమాండెట్స్‌ పోస్టుల్ని యూనియన్‌ పబ్లిక్‌ సర్వీస్‌ కమిషన్‌ ద్వారా భర్తీ చేసే ప్రక్రియ కొనసాగుతోందన్నారు.
21 నుంచి పీజీఈసెట్‌
* హైదరాబాద్‌, వరంగల్‌లో పరీక్షా కేంద్రాల ఏర్పాటు
ఈనాడు, హైదరాబాద్‌: రాష్ట్రంలో ఎంటెక్‌, ఎంఫార్మసీ తదితర పీజీ కోర్సుల్లో ప్రవేశాల కోసం సెప్టెంబ‌రు 21 నుంచి పీజీఈసెట్‌ జరగనుంది. సెప్టెంబ‌రు 24వ తేదీ వరకు రోజుకు రెండు విడతలుగా ఆన్‌లైన్‌ పరీక్షలు నిర్వహిస్తారు. మొత్తం 21,758 మంది దరఖాస్తు చేయగా హైదరాబాద్‌, వరంగల్‌లో పరీక్షా కేంద్రాలను ఏర్పాటు చేసినట్లు కన్వీనర్‌ కుమార్‌ తెలిపారు.
టీవీ పాఠాలు ఎలా ఉన్నాయి?
* విద్యార్థుల తల్లిదండ్రులకు ఫోన్‌ చేసి తెలుసుకోనున్న విద్యాశాఖ
ఈనాడు, హైదరాబాద్‌: టీవీల ద్వారా ప్రసారం చేస్తున్న పాఠాలు మీ పిల్లలకు అర్థమవుతున్నాయా? ఇంకా ఎలా ఉండాలనుకుంటున్నారు? అనే అంశాలపై పాఠశాల విద్యాశాఖ రాష్ట్రవ్యాప్తంగా విద్యార్థుల తల్లిదండ్రుల అభిప్రాయాలు, సలహాలు స్వీకరించనుంది. వారి సూచనలతో అవసరమైతే ఈ బోధనను మరింత మెరుగుపరచాలని భావిస్తోంది. సెప్టెంబ‌రు 1 నుంచి 3-10 తరగతులకు డిజిటల్‌ పాఠాలను ప్రసారం చేస్తున్న విషయం తెలిసిందే. ప్రతి జిల్లా నుంచి ఇద్దరు చొప్పున మొత్తం 33 జిల్లాల నుంచి 66 మంది క్లస్టర్‌ రీసోర్స్‌ పర్సన్ల(సీఆర్‌పీ)ను ఎంపిక చేసి వారికి అభిప్రాయ సేకరణపై శిక్షణ ఇచ్చారు. ప్రతి ఒక్కరూ రోజూ 15 మంది విద్యార్థుల తల్లిదండ్రులకు ఫోన్‌ చేసి వారి అభిప్రాయాలు నమోదు చేస్తారు. అంటే నిత్యం 990 మందికి ఫోన్లు చేస్తారు. తల్లిదండ్రుల ఫోన్‌ నంబర్లు ఛైల్డ్‌ ఇన్ఫో పేరిట ఇప్పటికే సమగ్ర శిక్షా అభియాన్‌ వద్ద ఉన్నాయి. ఈ ప్రక్రియ టీవీ ప్రసారాలు ఉన్నన్నాళ్లు కొనసాగుతుందని అధికార వర్గాలు తెలిపాయి. పలుచోట్ల ఇప్పటికే ఉపాధ్యాయులు విద్యార్థులకు ఫోన్లు చేస్తూ, కొందరు ఇళ్లకు వెళ్లి ఈ అంశాలను పరిశీలిస్తున్నారు. ఇంకొన్నిచోట్ల వాట్సప్‌ ద్వారా హోం వర్క్‌ సైతం ఇస్తున్నారు. మరికొన్ని పాఠశాలల్లో ప్రధానోపాధ్యాయుల చొరవతో జూమ్‌ యాప్‌ ద్వారా ప్రత్యేక తరగతులు నిర్వహిస్తున్నారు.
* మానసిక వికలాంగులు, బధిరులు, మూగ తదితర ప్రత్యేక అవసరాల విద్యార్థులు రాష్ట్రవ్యాప్తంగా 20 వేల మంది ఉన్నారు. వారికి కూడా టీవీల ద్వారా విద్య అందించేందుకు ఉపాధ్యాయులకు శిక్షణ ఇస్తున్నారు.
రేపటి నుంచి తెరచుకోనున్న పాఠశాలలు
* జూనియర్‌ కళాశాలలు కూడా
* సందేహాల నివృత్తికి 9-12 తరగతుల వారికి అనుమతి
* 1-8 తరగతుల వారు ఇంటి వద్దనే
ఈనాడు, అమరావతి: కంటెయిన్‌మెంట్‌ జోన్లకు వెలుపల ఉన్న ప్రభుత్వ, ఎయిడెడ్‌, ప్రైవేటు విద్యా సంస్థలను సెప్టెంబ‌రు 21 నుంచి తెరవనున్నారు. మొదటి రోజు ఉపాధ్యాయులందరూ విధులకు హాజరుకావాల్సి ఉంటుంది. 22 నుంచి ఆన్‌లైన్‌ బోధన, టెలి కౌన్సెలింగ్‌, విద్యా వారధి తదితర కార్యక్రమాల కోసం సగం మంది ఉపాధ్యాయులు విధులకు హాజరవుతారు. 9 నుంచి ఇంటర్‌ వరకు చదివే విద్యార్థులు తమ సందేహాల నివృత్తికి తల్లిదండ్రుల అనుమతితో పాఠశాలలు, జూనియర్‌ కళాశాలలకు వెళ్లొచ్చు. 1-8 తరగతుల వారిని మాత్రం ఎట్టి పరిస్థితుల్లోనూ పాఠశాలకు పిలిపించకూడదు. రెసిడెన్షియల్‌, కస్తూర్బాగాంధీ బాలికల విద్యాలయాలు, సంక్షేమ వసతి గృహాల్లో చదివే విద్యార్థులకు వాట్సప్‌ గ్రూపు ద్వారా ఆన్‌లైన్‌లో మార్గనిర్దేశం చేస్తారు. కావాలనుకుంటే వీరు సమీపంలోని ఉన్నత పాఠశాలకు వెళ్లి, ఉపాధ్యాయుల సూచనలు, మార్గదర్శకాలు తీసుకోవచ్చు. విద్యావారధి, విద్యామృతం వంటి కార్యక్రమాలు అక్టోబరు 5వరకు కొనసాగుతాయి.
ఆరడుగుల దూరం..
* 1-8 తరగతుల విద్యార్థులకు తల్లిదండ్రుల ద్వారానే మార్గదర్శనం చేయాల్సి ఉంటుంది. వీరికి ఆన్‌లైన్‌, వీడియో పాఠాలే కొనసాగుతాయి.
* వర్క్‌షీట్లను అభ్యాస యాప్‌లో అందుబాటులో ఉంచారు. వాటిని డౌన్‌లోడ్‌ చేసుకొని అభ్యాసనం కొనసాగించేలా ఉపాధ్యాయులు మార్గనిర్దేశం చేయాలి.
* 9-12 తరగతుల విద్యార్థులను మాత్రమే సందేహాల నివృత్తికి పాఠశాలకు అనుమతించాలి. ఇందుకు తల్లిదండ్రుల సమ్మతి తప్పనిసరిగా తీసుకోవాలి.
* విద్యార్థులు కూర్చునే సీట్ల మధ్య ఆరు అడుగుల దూరం ఉండాలి.
* విద్యార్థులు నోటుపుస్తకాలు, పెన్నులు, పెన్సిళ్లు, తాగునీటి సీసాలను పరస్పరం మార్చుకోకుండా ప్రతి ఒక్కరిపై ప్రత్యేక పర్యవేక్షణ ఉంచాలి.
రోజుకు సగం మంది ఉపాధ్యాయులు
* ప్రభుత్వ, ప్రైవేటు, ఎయిడెడ్‌ పాఠశాలల్లో ఆన్‌లైన్‌ బోధన, విద్యా వారధి కార్యక్రమం కోసం 22-50శాతం ఉపాధ్యాయులు హాజరు కావాలి.
* మాస్కులు తప్పనిసరిగా ధరించాలి. చేతులను తరుచూ సబ్బుతో కడుక్కోవాలి. శానిటైజర్‌ను అందుబాటులో ఉంచుకోవాలి.
* ఆరోగ్యాన్ని ఎప్పటికప్పుడు పరిశీలించుకోవాలి. * ఉమ్మివేయడం నిషేధం.
* అవకాశం ఉన్న వారు ఆరోగ్య సేతు యాప్‌ను ఇన్‌స్టాల్‌ చేసుకోవాలి.
* పంచాయతీరాజ్‌, పురపాలక విభాగాలను సంప్రదించి ప్రధానోపాధ్యాయులు పాఠశాల పరిసరాలను శానిటైజ్‌ చేయించాలి.
డిసెంబరు 20న ఏపీసెట్‌
* బీఎస్సీ చేసిన విద్యార్థులకూ అవకాశం
* ఇంజనీరింగ్‌ కాలేజీలకు ఏఐసీటీఈ ఉత్తర్వులు
ఏయూ ప్రాంగణం, న్యూస్‌టుడే: రాష్ట్ర స్థాయి అర్హత పరీక్ష(ఏపీసెట్‌)ను డిసెంబరు 20న నిర్వహించనున్నట్లు ఏపీసెట్‌ సభ్య కార్యదర్శి ఆచార్య కె.శ్రీనివాసరావు ఒక ప్రకటనలో తెలిపారు. అక్టోబరు 5 వరకు దరఖాస్తులను స్వీకరిస్తామన్నారు. రూ.వెయ్యి అపరాధ రుసుముతో అక్టోబరు 12 వరకు, రూ.2 వేల అపరాధ రుసుముతో అక్టోబరు 21 వరకు, రూ.5 వేల అపరాధ రుసుముతో నవంబరు 11 వరకు దరఖాస్తు చేసుకోవచ్చన్నారు. డిసెంబరు 12 నుంచి apset.net.in వెబ్‌సైట్‌ ద్వారా హాల్‌ టికెట్లను డౌన్‌లోడ్‌ చేసుకోవాలని తెలిపారు.
డిప్లొమా విద్యార్థులకు లేటరల్‌ ప్రవేశాలు కల్పించాల్సిందే
* బీఎస్సీ చేసిన విద్యార్థులకూ అవకాశం
* ఇంజనీరింగ్‌ కాలేజీలకు ఏఐసీటీఈ ఉత్తర్వులు
ఈనాడు, దిల్లీ: డిప్లొమా విద్యార్థులను ఇంజనీరింగ్‌ కోర్సుల్లో నేరుగా రెండో సంవత్సరంలోకి (లేటరల్‌ ఎంట్రీ) చేర్చుకోవాల్సిందేనని అఖిలభారత సాంకేతిక విద్యామండలి (ఏఐసీటీఈ) ఉత్తర్వులు జారీచేసింది. కొన్ని ఇంజనీరింగ్‌ కాలేజీలు డిప్లొమా విద్యార్థులకు లేటరల్‌ ఎంట్రీ కల్పించడం లేదని ఫిర్యాదులు వచ్చిన నేపథ్యంలో ఈ మేరకు ఆదేశాలు విడుదల చేసింది. డిప్లొమాలో 45% మార్కుల(రిజర్వ్‌డ్‌ కేటగిరీకైతే 40%)తో పాస్‌ అయిన ఏ విద్యార్థికైనా ఇంజనీరింగ్‌ రెండోసంవత్సరం కోర్సులో చేర్చుకోవాల్సిందేనని స్పష్టంచేసింది. అలాగే యూజీసీ గుర్తింపుపొందిన యూనివర్శిటీనుంచైనా బీఎస్సీ పట్టా (సాధారణ కేటగిరీ 45%, రిజర్వ్‌డ్‌ కేటగిరీ 40% మార్కులు)తీసుకొన్న విద్యార్థులు 10+2 పరీక్షలు మ్యాథమెటిక్స్‌ సబ్జెక్ట్‌తో పాసై ఉంటే వారికీ ఇంజనీరింగ్, టెక్నికల్‌ కోర్సుల్లో నేరుగా రెండో సంవత్సరంలో చేరడానికి అర్హత ఉంటుందని పేర్కొంది. అయితే రెండో సంవత్సరంలో చేరిన బీఎస్సీ చేసిన విద్యార్థులు ఆ ఏడాది సబ్జెక్టులతోపాటు, తొలి ఏడాదికి సంబంధించిన ఇంజనీరింగ్‌ గ్రాఫిక్స్, ఇంజనీరింగ్‌ డ్రాయింగ్, ఇంజనీరింగ్‌ మెకానిక్స్‌ సబ్జెక్ట్‌లు పాస్‌ కావాల్సి ఉంటుందని స్పష్టంచేసింది. డిప్లొమా విద్యార్థులతో సూపర్‌న్యూమరరీ పోస్టులు భర్తీచేసిన తర్వాతే బీఎస్సీ విద్యార్థులకు ప్రాధాన్యం ఇవ్వాలని పేర్కొంది. డిప్లొమా విద్యార్థులకు రెండో ఏడాది ఇంజనీరింగ్‌ కోర్సుల్లో ప్రవేశానికి సంబంధించి ఏఐసీటీఈ జారీచేసిన ఈ నిబంధనలను అమలుచేసేలా అన్ని రాష్ట్ర ప్రభుత్వాలు తమ పరిధిలోని ఇంజనీరింగ్‌ కాలేజీలకు ఉత్తర్వులు జారీచేయాలని సూచించింది.
18న‌ తెలంగాణ ఎంసెట్‌ ప్రాథమిక కీ విడుదల
ఈనాడు, హైదరాబాద్‌: తెలంగాణ ఎంసెట్‌ ఇంజినీరింగ్‌ విభాగం ఆన్‌లైన్‌ పరీక్షల ప్రాథమిక కీ సెప్టెంబ‌రు 18న‌ సాయంత్రం విడుదల కానుంది. మొత్తం నాలుగు రోజులపాటు ఎనిమిది విడతల్లో ఈ పరీక్షలు జరిగాయి. ఏపీ, తెలంగాణ నుంచి 1,19,187 మంది విద్యార్థులు హాజరయ్యారు. మొత్తం ఎనిమిది ప్రశ్నపత్రాలకు సంబంధించిన ప్రాథమిక కీతోపాటు విద్యార్థుల ఓఎంఆర్‌ పత్రాల స్కానింగ్‌ కాపీలనూ వెబ్‌సైట్‌లో అందుబాటులో ఉంచుతామని ఎంసెట్‌ కన్వీనర్‌ ఆచార్య గోవర్ధన్‌ తెలిపారు. ప్రాథమిక కీపై అభ్యంతరాలను స్వీకరించి నిపుణుల కమిటీ తుది కీను నిర్ణయిస్తుందని, దాని ఆధారంగా ర్యాంకులు కేటాయిస్తామన్నారు.
ఇంటర్‌ సిలబస్‌ తగ్గింపు
* 30 శాతం తగ్గించడానికి ప్రభుత్వ అనుమతి
* 77 ప్రైవేట్‌ కళాశాలలకు అనుబంధ గుర్తింపు
ఈనాడు, హైదరాబాద్‌: ఇంటర్‌మీడియట్‌లో 30 శాతం పాఠ్య ప్రణాళిక తగ్గింపునకు మార్గం సుగమమైంది. తమ ప్రతిపాదనకు రాష్ట్ర ప్రభుత్వం ఆమోదం తెలిపిందని ఇంటర్‌బోర్డు కార్యదర్శి జలీల్‌ వెల్లడించారు. ఎంపీసీ, బైపీసీ గ్రూపుల్లోని సబ్జెక్టుల్లో సీబీఎస్‌ఈ కొన్ని పాఠ్యాంశాలను తొలగించింది. ఇక్కడా అదే పద్ధతి అమలు చేస్తారు. ఇక ఆర్ట్స్‌ గ్రూపులకు సంబంధించి నిపుణుల కమిటీలను నియమించినందున వాటి సిఫారసుల మేరకు నిర్ణయం తీసుకుంటారు. ఆర్ట్స్‌ సబ్జెక్టుల్లో సీబీఎస్‌ఈ కొన్ని పాఠాలు తొలగించడం జాతీయస్థాయిలో వివాదాస్పదం కావడంతో ఆచితూచి అడుగులు వేయాలని ఇంటర్‌బోర్డు భావిస్తోంది. వాటిపై త్వరలోనే స్పష్టత ఇస్తామని కార్యదర్శి జలీల్‌ తెలిపారు. ప్రవేశాలకు అనుమతి ఇచ్చినందున ఇప్పటివరకు వివిధ మంత్రిత్వ శాఖల పరిధిలోని 804 ప్రభుత్వ జూనియర్‌ కళాశాలలకు అనుబంధ గుర్తింపు జారీ చేశారు. అన్ని రకాల నిబంధనలను పాటిస్తూ దరఖాస్తు చేసిన మరో 77 ప్రైవేటు జూనియర్‌ కళాశాలలకు కూడా అనుబంధ గుర్తింపు జారీ చేశామని ఆయన తెలిపారు. మిగిలిన వాటికి సంబంధించి అగ్నిమాపక శాఖ ఎన్‌ఓసీల సమస్య ఉన్నందున దానిపై ప్రభుత్వం నిర్ణయం తీసుకోవాల్సి ఉందన్నారు.
పరీక్ష రాయనివారిపై త్వరలో నిర్ణయం..
పరీక్ష రుసుం చెల్లించి, ఇంటర్‌ ద్వితీయ సంవత్సరం పరీక్షలు రాయని దాదాపు 27 వేలమందిని ఉత్తీర్ణులను చేయాలని ప్రభుత్వానికి ప్రతిపాదన పంపామని, దానిపై త్వరలో నిర్ణయం వెలువడే అవకాశం ఉందని జలీల్‌ తెలిపారు. ఇంటర్‌లో అంతర్గత మార్కులు, బహుళ ఐచ్ఛిక ప్రశ్నలు తదితరాలకు సంబంధించి ప్రభుత్వం నుంచి ఇంకా అనుమతి రాలేదని చెప్పారు.
రెండు భాషల్లో టీవీ పాఠాలు
సెప్టెంబ‌రు 1 నుంచి ఇంటర్‌ ద్వితీయ సంవత్సరం ఆన్‌లైన్‌ పాఠాలు ప్రారంభం కాగా సెప్టెంబ‌రు 18 నుంచి ప్రథమ సంవత్సరం టీవీ పాఠాలు మొదలుకానున్నాయి. వాటిని తెలుగు, ఆంగ్ల మాధ్యమాల్లో ఒకేసారి ప్రసారం చేయనున్నారు. ఆంగ్ల మాధ్యమం విద్యార్థులకు కూడా కొంత తెలుగులో బోధిస్తే సులువుగా అర్థమవుతుందని భావించి పాఠాలను రికార్డు చేసే సమయంలోనే తెలుగు, ఆంగ్లంలో బోధించేలా చూస్తున్నామని ఇంటర్‌ వర్గాలు తెలిపాయి.
ఇంటర్‌ ప్రవేశాలకు పచ్చజెండా
* ఈ దఫా 10 శాతం ఈడబ్ల్యూఎస్‌ కోటా అమలు
* కాలపట్టిక ప్రకటించిన ఇంటర్‌ బోర్డు
ఈనాడు, హైదరాబాద్‌: రాష్ట్రంలో అన్ని ప్రభుత్వ, ప్రైవేట్‌ జూనియర్‌ కళాశాలల్లో ఇంటర్మీడియట్‌ మొదటి సంవత్సరం ప్రవేశాలు చేసుకునేందుకు ఇంటర్‌బోర్డు పచ్చజెండా ఊపింది. ఈ మేరకు కాల పట్టికను సెప్టెంబ‌రు 16న‌ ప్రకటించింది. ఇదే తరుణంలో ప్రైవేటు కళాశాలల యాజమాన్యాలకు బోర్డు షాక్‌ ఇచ్చింది. గుర్తింపు పొందిన విద్యా సంస్థల జాబితాతో రూపొందిన వెబ్‌సైట్‌లో ఒక్క ప్రైవేటు కళాశాల పేరునూ చేర్చకుండా, మొదటి విడత ప్రవేశాలకు వాటికి అనుమతి లేదని చెప్పకనే చెప్పింది. ఈసారి కొత్తగా సీట్ల భర్తీలో ఆర్థికంగా వెనుకబడిన వర్గాలు(ఈడబ్ల్యూఎస్‌) కోటా 10 శాతం అమలు చేయనున్నట్టు ప్రకటించింది. ఇంటర్‌ మార్కుల మెమోల ఆధారంగా ప్రవేశాలు చేయవచ్చని, అమల్లో ఉన్న రిజర్వేషన్ల నియమాన్ని పాటించాలని ఆయా ప్రిన్సిపాళ్లను బోర్డు కార్యదర్శి జలీల్‌ ఆదేశించారు. ‘ప్రైవేట్‌ కళాశాలల్లో ప్రతి సెక్షన్‌లో 88 కంటే ప్రవేశాలు మించరాదు. బోర్డు మంజూరు చేసిన సెక్షన్లు, నిండిన సీట్లు తదితర వివరాలను కళాశాలల ప్రధాన ద్వారం వద్ద అందరికీ కనిపించేలా ప్రదర్శించాలి. వాటిని ఎప్పటికప్పుడు నవీకరిస్తూ ఉండాలి’ అని మార్గదర్శకాల్లో కార్యదర్శి పేర్కొన్నారు. రెండో విడత ప్రవేశాల కాలపట్టికను తర్వాత ప్రకటిస్తామన్నారు.
*  గుర్తింపు పొందిన కళాశాలల జాబితాను ఇంటర్‌బోర్డు అధికారిక వెబ్‌సైట్లలో  (tsbie.cgg.gov.in, acadtsbie.cgg.gov.in)  ఉంచామని, వాటిల్లో మాత్రమే ప్రవేశాలు పొందాలని బోర్డు కార్యదర్శి జలీల్‌ ఈ సందర్భంగా తల్లిదండ్రులకు సూచించారు.
ప్రైవేటు కళాశాలలకు అనుమతి ఉన్నట్టా? లేనట్టా?
గుర్తింపు పొందిన కళాశాలల పేర్లు వెబ్‌సైట్‌లో నమోదు చేశామని ప్రకటించిన ఇంటర్‌బోర్డు, ఆ జాబితాలో కేవలం ప్రభుత్వ జూనియర్‌ కళాశాలలు, మోడల్‌, కేజీవీబీ, ఇతర రెసిడెన్షియల్‌ కళాశాలల వివరాలను జిల్లాల వారిగా పొందుపరిచింది. నిజానికి రాష్ట్రవ్యాప్తంగా 1,588 ప్రైవేటు జానియర్‌ కళాశాలలు అనుబంధ గుర్తింపు కోసం దరఖాస్తు చేసుకున్నాయి. అగ్నిమాపక శాఖ నిరభ్యంతర పత్రం(ఎన్‌వోసీ) తప్పనిసరైతే 130 కళాశాలలకే అనుమతి వస్తుందని గతంలో బోర్డు ప్రభుత్వానికి నివేదించినట్టు సమాచారం. కనీసం సదరు కళాశాలల పేర్లయినా వెబ్‌సైట్‌లో లేకపోవడం గమనార్హం. దీన్నిబట్టి చూస్తే మొదటి విడతలో ఒక్క ప్రైవేటు కళాశాలకు కూడా ప్రవేశాలకు అనుమతి మంజూరు చేయనట్టే లెక్క. ఇదిలా ఉండగా, ఇప్పటికే అధిక శాతం విద్యార్థులు ప్రైవేటు కళాశాలల్లో ప్రవేశాలు పొందారు. ఆన్‌లైన్‌ తరగతులకూ హాజరవుతున్నారు. వాటికి అనుమతి ఉందా? లేదా? అనేది చెప్పకపోతే తర్వాత సదరు విద్యార్థుల పరిస్థితి ఏమిటనే ప్రశ్న ఉత్పన్నమవుతోంది. వాటికి రెండో విడతలో అనుమతి ఇస్తారా? లేదా? అనేదీ తేల్చి చెప్పకపోవడం పలు అనుమానాలు తావిస్తోందని నిపుణులు అభిప్రాయపడుతున్నారు.
ఇదీ కాలపట్టిక
* సెప్టెంబరు 16:  మొదటి విడత ప్రవేశాలు ప్రారంభం
* 18వ తేదీ:  ఆన్‌లైన్‌ తరగతులు ప్రారంభం
* సెప్టెంబరు 30:  ప్రవేశాలకు తుది గడువు.
కొవిడ్‌ లక్షణాలుంటే ప్రత్యేక గది!
* 20 నుంచి 16,208 సచివాలయ పోస్టులకు పరీక్షలు
* అభ్యర్థులు బూట్లు వేసుకురావద్దు
* నిమిషం ఆలస్యమైనా అనుమతి లేదు!
* మంత్రులు పెద్దిరెడ్డి, బొత్స వెల్లడి
ఈనాడు డిజిటల్‌-అమరావతి: గ్రామ, వార్డు సచివాలయాల్లో 16,208 పోస్టుల భర్తీకి సెప్టెంబ‌రు 20 నుంచి 26 వరకు రాత పరీక్షలు నిర్వహించనున్నట్లు పంచాయతీరాజ్, గ్రామీణాభివృద్ధి శాఖ మంత్రి పెద్దిరెడ్డి రామచంద్రారెడ్డి వెల్లడించారు. కొవిడ్‌ లక్షణాలున్న అభ్యర్థులకు ప్రత్యేక గది ఏర్పాటు చేస్తామని, పరీక్ష మొదలయ్యాక నిమిషం ఆలస్యమైనా అనుమతించబోమన్నారు. సెప్టెంబ‌రు 16న‌ తాడేపల్లిలోని పంచాయతీరాజ్‌ కమిషనర్‌ కార్యాలయంలో పరీక్షల నిర్వహణపై మంత్రులు బొత్స సత్యనారాయణ, పెద్దిరెడ్డి... జిల్లాల అధికారులతో వీడియో కాన్ఫరెన్స్‌ ద్వారా సమీక్షించారు. అనంతరం విలేకర్లతో మాట్లాడారు. వివరాలు వారి మాటల్లో...
కొవిడ్‌ బాధితులకు ప్రత్యేక గది..
అభ్యర్థులు తప్పనిసరిగా మాస్కు ధరించి రావాలి. థర్మల్‌ స్కానింగ్‌ చేశాకే లోనికి అనుమతిస్తారు. భౌతికదూరం ఉండేలా ఒక్కో గదిలో 14 నుంచి 20 మంది మాత్రమే పరీక్ష రాస్తారు. ఇప్పటికే కొవిడ్‌ వచ్చిన వారికి, అనుమానిత లక్షణాలున్న వారికి, శరీర సగటు ఉష్టోగ్రత అధికంగా ఉన్నవారికి ప్రత్యేక గదులు కేటాయిస్తాం. ఇన్విజిలేటర్లకు పీపీఈ కిట్లు ఇస్తాం.
* మొత్తం 13 రకాల పోస్టుల కోసం 10.56 లక్షల మంది దరఖాస్తు చేసుకున్నారు. 20న ఉదయం, మధ్యాహ్నం జరిగే పరీక్షలకు 6.81 లక్షల మంది హాజరవుతున్నారు. అందుకే 3,289 కేంద్రాల్లో పరీక్ష నిర్వహిస్తున్నాం. 77,558 మంది సిబ్బందిని ఏర్పాటుచేశాం.
* అభ్యర్థులు గంట ముందే కేంద్రం లోపలికి వెళ్లొచ్చు. పరీక్ష మొదలయ్యాక మాత్రం నిమిషం ఆలస్యమైనా అనుమతించబోం. బూట్లు ధరించి రాకూడదు. శానిటైజర్లు, పారదర్శక చేతి తొడుగులతో రావచ్చు. ఓఎమ్‌ఆర్‌ షీటు కార్బన్‌ కాపీని వెంట తీసుకెళ్లొచ్చు.
* దివ్యాంగులు మరొకరితో పరీక్ష రాయించేలా ఏర్పాట్లు చేశాం. వీరికి గంటకు 25 నిమిషాల చొప్పున అదనపు సమయం ఇస్తాం.
* ఏపీఎస్‌ఆర్టీసీ బస్సుల్లో కేవలం అభ్యర్థుల్ని మాత్రమే తీసుకెళ్లాలని ఆదేశాలిచ్చాం.
అర్హతలున్న వారికే హాల్‌టికెట్లు..
ఉద్యాన, పశు సంవర్థక సహాయకుల పోస్టుల కంటే దరఖాస్తు చేసుకున్న అభ్యర్థుల సంఖ్యే తక్కువగా ఉంది. అలాగని ఉద్యోగ ప్రకటనలో పేర్కొన్న అర్హతలను తగ్గిస్తే ప్రభుత్వ ఉద్దేశం దెబ్బతింటుంది. ఈ రెండు పోస్టుల కోసం దరఖాస్తు చేసుకున్న వారిలో నిర్దేశిత అర్హతలున్న వారికే హాల్‌టికెట్లు వస్తాయి.
* వ్యవసాయ సహాయకుడి పోస్టుకు బీఎస్సీ బోటనీ అభ్యర్ధులు అర్హులు కారు
వ్యవసాయశాఖలో బహుళ ప్రయోజన విస్తరణ అధికారులు(ఎంపీఈఓ)గా పనిచేస్తూ డిగ్రీలో వృక్షశాస్త్రం(బోటనీ) ఒక పాఠ్యాంశంగా చదివిన వారు.. గ్రామ వ్యవసాయ సహాయకుల(గ్రేడ్‌-2) పరీక్ష రాయడానికి అనర్హులని సంబంధిత శాఖ కమిషనర్‌ అరుణ్‌కుమార్‌ తెలిపారు. ఒకవేళ పరీక్ష రాసినా... వారి అభ్యర్ధిత్వాన్ని పరిగణనలోకి తీసుకోబోమని స్పష్టంచేశారు.
ఎంసెట్‌కు‘నిమిషం’ నిబంధన
* 17 నుంచి ప్రవేశ పరీక్ష ప్రారంభం
ఈనాడు, అమరావతి: ఎంసెట్‌లో ‘నిమిషం’ నిబంధనను అమలు చేస్తున్నట్లు ఉమ్మడి ప్రవేశ పరీక్షల ప్రత్యేక అధికారి సుధీర్‌రెడ్డి తెలిపారు. ఒక్క నిమిషం ఆలస్యమైనా పరీక్షకు అనుమతించరని, విద్యార్థులను గంటన్నర ముందు నుంచే పరీక్ష కేంద్రం ఆవరణలోకి అనుమతిస్తారని వెల్లడించారు. ఏపీ ఎంసెట్‌ సెప్టెంబ‌రు 17 నుంచి ప్రారంభం కానుంది. 7 రోజుల పాటు రోజుకు రెండు విడతలుగా నిర్వహించనున్నారు. ఏపీ, తెలంగాణలో కలిపి 118 పరీక్ష కేంద్రాలను ఏర్పాటుచేశారు. ఇంజినీరింగ్‌కు 1,85,263 మంది, వ్యవసాయ, వైద్యవిద్యకు 87,637 మంది దరఖాస్తు చేశారు. హాల్‌టికెట్‌తో కొవిడ్‌-19 స్వీయ ధ్రువీకరణ పత్రాన్ని డౌన్‌లోడ్‌ చేసుకొని, దాన్ని పూరించి, పరీక్ష కేంద్రం వద్ద సమర్పించాలి. పరీక్ష కేంద్రం రూట్‌మ్యాప్‌ను వెబ్‌సైట్‌ నుంచి డౌన్‌లోడ్‌ చేసుకునే అవకాశం కల్పించారు.
15 నిమిషాల ముందు పాస్‌వర్డ్‌
*  హాల్‌టికెట్‌పై ఉన్న బార్‌కోడ్‌ను సిబ్బంది స్కాన్‌ చేసి, కంప్యూటర్‌ ల్యాబ్‌కు దారి చూపిస్తారు.
*  పరీక్షకు 15 నిమిషాల ముందు మాత్రమే కంప్యూటర్‌ లాగిన్‌ ఐడీ, పాస్‌వర్డ్‌ ఇస్తారు.
*  నెగెటివ్‌ మార్కులు లేవు.
*  విద్యార్థులు తమ సమాధానాలను పరీక్ష ముగిసేలోపు ఎప్పుడైనా మార్చుకోవచ్చు.
*  కంప్యూటర్‌లో ఏమైనా సాంకేతిక సమస్యలు ఏర్పడితే వెంటనే ఇన్విజిలేటర్‌కు సమాచారం అందించాలి. మరో కంప్యూటర్‌ ఏర్పాటు చేస్తారు. పరీక్ష ఎక్కడ నిలిచిపోతే.. అక్కడినుంచి సమయం ప్రారంభమవుతుంది.
డిగ్రీ, పీజీ పరీక్షలకు తొలగిన అడ్డంకులు
* ప్రభుత్వ విధాన నిర్ణయంలో జోక్యం చేసుకోం: హైకోర్టు
* ఎస్‌ఓపీ అమలు చేయాలంటూ సూచన
ఈనాడు, హైదరాబాద్‌: తెలంగాణలో అన్ని రకాల డిగ్రీ, పీజీ పరీక్షలకు ఉన్న అడ్డంకులు తొలగిపోయాయి. స్వయంప్రతిపత్తి(అటానమస్‌) కలిగిన విశ్వవిద్యాలయాలు, కళాశాలలు నచ్చిన రీతిలో పరీక్షలు నిర్వహించుకోవడానికి అనుమతించామని హైకోర్టు తెలిపింది. అనుబంధ(అఫిలియేటెడ్‌) కాలేజీల్లో ఆన్‌లైన్‌ పరీక్షలు ఉండబోవని, భౌతిక పరీక్షలు మాత్రమే నిర్వహిస్తామంటూ ప్రభుత్వం తీసుకున్న విధాన నిర్ణయంలో జోక్యం చేసుకోలేమని సెప్టెంబ‌రు 15న‌ తేల్చి చెప్పింది. అంతేగాకుండా ప్రభుత్వ నిర్ణయంలో చట్టవిరుద్ధమైన అంశాలేమిటో పిటిషనర్లు నిరూపించలేకపోయారంది. కొవిడ్‌ నేపథ్యంలో ప్రామాణిక నిర్వహణ పద్ధతి (ఎస్‌ఓపీ) అయిన శానిటైజేషన్, భౌతిక దూరం తదితరాలను పాటించాలని సూచించింది. సప్లిమెంటరీ పరీక్షలను ఫలితాలను వెల్లడించాక వీలైనంత త్వరగా నిర్వహించే అంశాన్ని పరిశీలించాలని సూచించింది. కొవిడ్‌-19 తీవ్రమవుతున్న నేపథ్యంలో ప్రవేశ పరీక్షలతోపాటు డిగ్రీ, పీజీ పరీక్షలను నిర్వహించరాదంటూ రాష్ట్ర ఎన్‌ఎస్‌యూఐ అధ్యక్షుడు బి.వి.నర్సింగరావు మరొకరు దాఖలు చేసిన ప్రజాప్రయోజన వ్యాజ్యాలపై ప్రధాన న్యాయమూర్తి జస్టిస్‌ ఆర్‌.ఎస్‌.చౌహాన్, జస్టిస్‌ బి.విజయ్‌సేన్‌రెడ్డితో కూడిన ధర్మాసనం మరోసారి విచారణ చేపట్టి పై మేరకు ఆదేశాలు జారీ చేసి పిటిషన్‌ను కొట్టివేసింది.
యూజీసీ నెట్‌ పరీక్షలు 24కు వాయిదా
దిల్లీ: యూజీసీ-నెట్‌ పరీక్షలను వాయిదా వేస్తున్నట్లు కేంద్ర విద్యాశాఖ పరీక్షల నిర్వహణ ఏజెన్సీ తెలిపింది. సెప్టెంబ‌రు 24 నుంచి నిర్వహించనున్నట్లు పేర్కొంది. ఈ పరీక్షలను 16 నుంచి 25 వరకు నిర్వహించాలని తొలుత నిర్ణయించారు. అయితే భారత వ్యవసాయ పరిశోధన మండలి(ఐసీఏఆర్‌)కి సంబంధించిన పరీక్షలు కూడా సెప్టెంబ‌రు 17, 22, 23 తేదీల్లో ఉండటంతో యూజీసీ-నెట్‌ పరీక్షలను వాయిదా వేయాల్సి వచ్చిందని జాతీయ పరీక్షల నిర్వహణ ఏజెన్సీ సీనియర్‌ డైరెక్టర్‌ సాధన పరాశర్‌ తెలిపారు. సబ్జెక్టులవారీగా పరీక్షల తేదీలను త్వరలో వెల్లడిస్తామన్నారు.
ఒకేసారి గ్రూపు-1, ఎస్‌ఎస్‌సీ పరీక్షలు
* ఆందోళనలో అభ్యర్థులు
ఈనాడు, అమరావతి: గ్రూపు-1 ప్రధాన పరీక్షలు జరిగే తేదీల్లోనే.. ‘కంబైన్డ్‌ గ్రాడ్యుయేట్‌ లెవల్‌’ పరీక్షలు జరగనుండటంతో అభ్యర్థులు ఆందోళన చెందుతున్నారు. గతంలో వాయిదా వేసిన గ్రూపు-1 ప్రధాన పరీక్షలను నవంబరు 2 నుంచి నిర్వహించేందుకు ఏపీపీఎస్సీ ఏర్పాట్లు చేస్తోంది. స్టాఫ్‌ సెలక్షన్‌ కమిషన్‌ ఆధ్వర్యంలో జరిగే పరీక్షలూ నవంబరు 2 నుంచి 5 వరకు జరగబోతున్నాయి. కొందరు అభ్యర్థులు రెండు పరీక్షలనూ రాస్తారు. ఈ విషయాన్ని కేంద్ర, రాష్ట్ర ప్రభుత్వాలు గుర్తించి, తగిన చర్యలు తీసుకోవాలని అభ్యర్థులు కోరుతున్నారు.
సైన్స్‌లో మెరికలకు చేయూత
* ఇంటర్, డిగ్రీ విద్యార్థుల కోసం కేవీపీవై ఫెలోషిప్పులు
బేసిక్‌ సైన్సెస్‌పై పట్టు, పరిశోధనల్లో ఆసక్తి ఉన్న యువ కిశోరాలను ప్రోత్సహించడానికి జాతీయ పురస్కారాలు సిద్ధంగా ఉన్నాయి. కేంద్ర సైన్స్‌ అండ్‌ టెక్నాలజీ మంత్రిత్వశాఖ ఆధ్వర్యంలో ఐఐఎస్సీ ఈ పురస్కారాలకు అర్హులను ఎంపిక చేస్తుంది. ఇందుకోసం ఏటా పరీక్ష, ఇంటర్వ్యూలు నిర్వహిస్తోంది. సైన్స్‌ సబ్జెక్టుల్లో ఇంటర్, డిగ్రీ ప్రథమ సంవత్సరం కోర్సులు చదువుతున్న విద్యార్థులు కిశోర్‌ వైజ్ఞానిక ప్రోత్సాహన్‌ యోజన (కేవీపీవై)కు దరఖాస్తు చేసుకోవచ్చు. ఎంపికైనవారికి డిగ్రీలో ఉన్నప్పుడు మూడేళ్లపాటు ప్రతినెలా రూ.5000 చెల్లిస్తారు. పీజీలో రూ.7000 చొప్పున అందిస్తారు.
     జాతీయ స్థాయిలో జరిగే ఆన్‌లైన్‌ పరీక్షలో ప్రతిభ చూపినవారిని ఈ ఫెలోషిప్పులకు ఎంపిక చేస్తారు. ఈ ఏడాదికి ఇంటర్వ్యూ రద్దు చేశారు. (గత ఏడాది వరకు పరీక్షతోపాటు ఇంటర్వ్యూ తప్పనిసరి. ఆప్టిట్యూడ్‌ పరీక్షలో పొందిన మార్కుల్లో 75 శాతం + ఇంటర్వ్యూ మార్కుల్లో 25 శాతం కలిపి మెరిట్‌ లిస్ట్‌ తయారు చేసేవారు) అభ్యర్థి ప్రస్తుత విద్యార్హతను బట్టి పరీక్ష నిర్వహిస్తారు.
     సైన్స్‌ సబ్జెక్టుల్లో పరిశోధనలను ప్రోత్సహించడానికీ, సైన్స్‌ విభాగాల్లో విద్యార్థులు రాణించేలా.. సైన్స్‌ను కెరియర్‌గా మలచుకునేలా చేసే లక్ష్యంతో భారత ప్రభుత్వానికి చెందిన సైన్స్‌ అండ్‌ టెక్నాలజీ డిపార్ట్‌మెంట్‌ (డీఎస్టీ) 1999లో కేవీపీవైను ప్రారంభించింది. సైన్స్‌ సబ్జెక్టుల్లో ఆసక్తి, ప్రావీణ్యం ఉన్న విద్యార్థులను గుర్తించి ప్రోత్సహించడం దీని లక్ష్యం. బీఎస్సీ ప్రథమ సంవత్సరంలో ఉంటుండగానే మొదలయ్యే ఈ ఫెలోషిప్పు పీజీ పూర్తయ్యే వరకు కొనసాగుతుంది. అలాగే ఎంపికైనవారికి దేశంలోని ప్రముఖ సైన్స్‌ పరిశోధనా సంస్థలు, విద్యా సంస్థల్లో సమ్మర్‌ క్యాంప్‌ నిర్వహిస్తారు. ఇండియన్‌ ఇన్‌స్టిట్యూట్‌ ఆఫ్‌ సైన్సెస్, బెంగళూరు వీటిని పర్యవేక్షిస్తోంది.
ఆన్‌లైన్‌ పరీక్షలో...
ఆన్‌లైన్‌లో పరీక్ష నిర్వహిస్తారు. ప్రశ్నపత్రం హిందీ, ఇంగ్లిష్‌ మాధ్యమాల్లో ఉంటుంది. ప్రత్యేకమైన సిలబస్‌ అంటూ నిర్దేశించలేదు. విద్యార్థికి సైన్స్‌ సబ్జెక్టుల్లో ఉన్న అవగాహన, అర్థం చేసుకునే తీరు, విశ్లేషణను పరిశీలిస్తారు. అయితే ప్రశ్నలు సాధారణంగా వాళ్లు రాసే స్ట్రీమ్‌ బట్టి పదో తరగతి, ఇంటర్, డిగ్రీ / ఇంటిగ్రేటెడ్‌ పీజీ ప్రథమ సంవత్సరంలోని మ్యాథ్స్, ఫిజిక్స్, కెమిస్ట్రీ, బయాలజీ సబ్జెక్టుల నుంచే ఉంటాయి.
     ఎస్‌ఏ స్ట్రీమ్‌ ప్రశ్నపత్రం వంద మార్కులకు ఉంటుంది. పరీక్ష వ్యవధి 3 గంటలు. ఇందులో రెండు భాగాలు. పార్ట్‌ ఎలో 60 ప్రశ్నలు 60 మార్కులకు ఉంటాయి. పార్ట్‌ బిలో 20 ప్రశ్నలకు 40 మార్కులు. ఎస్‌బీ, ఎస్‌ఎక్స్‌ స్ట్రీమ్‌ల్లోనూ రెండు భాగాలు ఉంటాయి. పరీక్ష వ్యవధి 3 గంటలు. ప్రశ్నపత్రానికి 160 మార్కులు కేటాయించారు. మొదటి భాగంలో 80 ప్రశ్నలకు 80 మార్కులు. రెండో భాగంలో 40 ప్రశ్నలకు 80 మార్కులు. అన్ని స్ట్రీమ్‌ల పరీక్షల్లోనూ రుణాత్మక మార్కులున్నాయి. పార్ట్‌ ఎలో ప్రశ్నలకు తప్పు సమాధానం గుర్తిస్తే పావు మార్కు, అదే పార్ట్‌ బిలో అయితే అర మార్కు చొప్పున తగ్గిస్తారు.
     2009 నుంచి ఇప్పటిదాకా నిర్వహించిన పరీక్షల ప్రశ్నపత్రాలు, జవాబులు కేవీపీవై వెబ్‌సైట్‌లో ఉన్నాయి. వీటిద్వారా ప్రశ్నల సరళిని అర్థం చేసుకోవచ్చు. ఆన్‌లైన్‌ మాక్‌ టెస్టును కేవీపీవై వెబ్‌సైట్‌లో అందుబాటులో ఉంచుతారు. దాన్ని అభ్యాసం చేసి ఆన్‌లైన్‌ పరీక్షపై అవగాహన పెంచుకోవచ్చు. పరీక్షలో సాధించిన మెరిట్‌ ప్రకారం అర్హులకు స్కాలర్‌షిప్పులు అందిస్తారు. ఎస్సీ, ఎస్టీ, దివ్యాంగుల కోసం కొన్ని స్కాలర్‌షిప్పులు కేటాయించారు.
     కేవీపీవై-2019 ఫెలోషిప్పులకు జనరల్‌ కేటగిరీలో ఎస్‌ఏలో 53, ఎస్‌ఎక్స్‌లో 55, ఎస్‌బీలో 50 శాతం మార్కులు సాధించినవారు ఎంపికయ్యారు.(పరీక్ష, ఇంటర్వ్యూ కలిపి వందకు కుదించడం ద్వారా పొందిన మార్కులు).
వీటిలో చేరితేనే...
బీఎస్సీ/ బీఎస్‌/బీస్టాట్‌/ బీమ్యాథ్స్‌/ఇంటిగ్రేటెడ్‌ ఎమ్మెస్సీ/ ఎంఎస్‌ - ఫిజిక్స్, కెమిస్ట్రీ, మ్యాథ్స్, స్టాటిస్టిక్స్, బయో కెమిస్ట్రీ, మైక్రోబయాలజీ, సెల్‌ బయాలజీ, ఎకోలజీ, మాలిక్యులర్‌ బయాలజీ, బోటనీ, జువాలజీ, ఫిజియోలజీ, బయోటెక్నాలజీ, న్యూరో సైన్సెస్, బయో ఇన్ఫర్మాటిక్స్, మెరైన్‌ బయాలజీ, జియాలజీ, హ్యూమన్‌ బయాలజీ, జెనెటిక్స్, బయో మెడికల్‌ సైన్సెస్, అప్లయిడ్‌ ఫిజిక్స్, మెటీరియల్‌ సైన్స్, ఎన్విరాన్‌మెంటల్‌ సైన్స్, జియో ఫిజిక్స్‌ వీటిలో ఏదైనా సబ్జెక్టులో చేరితేనే స్కాలర్‌షిప్పు అందుతుంది.
కేవీపీవైలో స్ట్రీమ్‌లు...
ఎస్‌ఏ: ప్రస్తుత విద్యా సంవత్సరం (2020-21)లో సైన్స్‌ సబ్జెక్టుల్లో (ఫిజిక్స్, కెమిస్ట్రీ, మ్యాథ్స్, బయాలజీ) జూనియర్‌ ఇంటర్‌ చదువుతున్న విద్యార్థులు ఈ విభాగంలోకి వస్తారు. పదో తరగతిలో మ్యాథ్స్, సైన్స్‌ సబ్జెక్టుల్లో కనీసం 75 శాతం మార్కులు సాధించినవారు అర్హులు. ఎస్సీ, ఎస్టీ, దివ్యాంగులైతే 65 శాతం మార్కులు ఉండాలి. వీరు కనీసం 60 శాతం (ఎస్సీ, ఎస్టీ, దివ్యాంగులు 50 శాతం) మార్కులతో ఇంటర్‌ పూర్తి చేయాలి. దీంతోపాటు 2022-23 విద్యా సంవత్సరంలో బేసిక్‌ సైన్సెస్‌ (బీఎస్సీ, బీఎస్, బీస్టాట్, బీమ్యాథ్స్, ఇంటిగ్రేటెడ్‌ ఎమ్మెస్సీ, ఇంటిగ్రేటెడ్‌ ఎంఎస్‌) కోర్సుల్లో చేరితేనే ఈ స్కాలర్‌షిప్‌ వర్తిస్తుంది. వీళ్లు సీనియర్‌ ఇంటర్‌లో ఉన్న సమయాన్ని ఇంటెరిమ్‌ పీరియడ్‌గా పరిగణిస్తారు. ఈ వ్యవధిలో ప్రాంతీయ, జాతీయ స్థాయి సైన్స్‌ క్యాంపులకు ఆహ్వానిస్తారు. ఇందుకయ్యే ప్రయాణ ఖర్చులు భరిస్తారు. వసతి, భోజన సౌకర్యాలు కల్పిస్తారు.
ఎస్‌ఎక్స్‌: ఈ విద్యా సంవత్సరంలో అంటే 2020-21లో సైన్స్‌ సబ్జెక్టుల్లో (ఫిజిక్స్, కెమిస్ట్రీ, మ్యాథ్స్, బయాలజీ) సీనియర్‌ ఇంటర్‌ చదువుతున్న వాళ్లు ఎస్‌ఎక్స్‌ స్ట్రీమ్‌ కిందికి వస్తారు. వీరంతా పదో తరగతిలో మ్యాథ్స్, సైన్స్‌ సబ్జెక్టుల్లో కనీసం 75 శాతం (ఎస్సీ, ఎస్టీ, దివ్యాంగులు 65 శాతం) మార్కులు పొందినవారై ఉండాలి. అలాగే సైన్స్‌ సబ్జెక్టుల్లో కనీసం 60 శాతం (ఎస్సీ, ఎస్టీ, దివ్యాంగులైతే 50 శాతం) మార్కులతో ఇంటర్‌ పూర్తిచేయాలి. దీంతోపాటు 2021-22 విద్యా సంవత్సరంలో బీఎస్సీ, బీఎస్, బీస్టాట్, బీమ్యాథ్స్, ఇంటిగ్రేటెడ్‌ ఎమ్మెస్సీ, ఇంటిగ్రేటెడ్‌ ఎమ్మెస్‌ కోర్సుల్లో చేరితేనే స్కాలర్‌షిప్‌ వర్తిస్తుంది.
ఎస్‌బీ: ఈ విద్యా సంవత్సరంలో అంటే 2020-21లో ప్రథమ సంవత్సరం బీఎస్సీ/బీఎస్‌/బీస్టాట్‌/బీమ్యాథ్స్‌/ ఇంటిగ్రేటెడ్‌ ఎమ్మెస్సీ/ఎంఎస్‌ కోర్సులు చదువుతున్న వాళ్లు ఎస్‌బీ స్ట్రీమ్‌ కిందికి వస్తారు. వీళ్లు సైన్స్‌ సబ్జెక్టుల్లో కనీసం 60 శాతం (ఎస్సీ, ఎస్టీ, దివ్యాంగులు 50 శాతం) మార్కులతో ఇంటర్‌లో ఉత్తీర్ణత సాధించాలి. ఇంటర్‌ తర్వాత అకడమిక్‌ గ్యాప్‌ ఉండరాదు. అలాగే వీరు డిగ్రీ/ ఇంటిగ్రేటెడ్‌ పీజీ ప్రథమ సంవత్సరం పరీక్షల్లో 60 శాతం (ఎస్సీ, ఎస్టీ, దివ్యాంగులు 50 శాతం) మార్కులతో ఉత్తీర్ణత సాధిస్తేనే స్కాలర్‌షిప్‌కి ఎంపికవుతారు.
ప్రోత్సాహకాలు...
బీఎస్సీ, బీఎస్, బీస్టాట్, బీమ్యాథ్స్, ఇంటిగ్రేటెడ్‌ ఎమ్మెస్సీ/ ఎంఎస్‌ కోర్సుల్లో చేరిన విద్యార్థులకు ప్రతి నెల రూ.5000 చొప్పున చెల్లిస్తారు. ఏటా రూ.20,000 కాంటింజెన్సీ గ్రాంట్‌ అందుతుంది. ఎమ్మెస్సీ లేదా ఇంటిగ్రేటెడ్‌ పీజీ చివరి రెండేళ్లు ప్రతినెల రూ.7000 అందుతాయి. కాంటింజెన్సీ ఏడాదికి రూ.28,000 ఉంటుంది. వీటికి ఎంపికైనవారు జాతీయ ప్రయోగశాలలు, విశ్వవిద్యాలయాల్లో గ్రంథాలయం, ప్రయోగ సౌకర్యాలను ఉపయోగించుకోవచ్చు.
     ఏటా మెరుగైన అకడమిక్‌ ప్రతిభ చూపితేనే ఫెలోషిప్‌ తర్వాత విద్యా సంవత్సరంలో కొనసాగుతుంది. లేదంటే ఆ విద్యా సంవత్సరానికి వర్తించదు. అంటే ప్రతి విద్యా సంవత్సరంలోనూ సైన్స్‌ సబ్జెక్టుల్లో తొలి ప్రయత్నంలోనే కనీసం 60 శాతం మార్కులు (ఎస్సీ, ఎస్టీ, దివ్యాంగులు 50 శాతం) సాధించాలి. దీంతోపాటు సమ్మర్‌ క్యాంప్, సమ్మర్‌ ప్రాజెక్టుల్లో సంతృప్తికరమైన పనితీరు కనబరచడం తప్పనిసరి. ప్రభుత్వ, ప్రైవేటు రంగాలకు చెందిన ఇతర ప్రోత్సాహకాలు పొందినవారు కేవీపీవైకు అనర్హులు.
సమ్మర్‌ ప్రోగ్రాం
సైన్స్‌లో పరిశోధనాసక్తి మరింత పెంపొందించే లక్ష్యంతో సమ్మర్‌ ప్రోగ్రాంలు ఏర్పాటు చేశారు. వేసవి సెలవుల్లో ఈ కార్యక్రమాన్ని నిర్వహిస్తారు. వారం లేదా రెండు వారాల వరకు ఈ ప్రోగ్రాంలు కొనసాగుతాయి. ఇందులో భాగంగా సైన్స్‌ సంబంధించిన వివిధ అంశాల్లో నిపుణులు ఉపన్యాసాలిస్తారు. శాస్త్రవేత్తలతోనూ మాట్లాడటానికి అవకాశం ఉంటుంది. సైన్స్‌ అంశాలను ప్రయోగాత్మకంగా చూపిస్తారు. సైన్స్‌లో పరిశోధనలు కొనసాగిస్తున్న విద్యార్థులతోనూ భేటీ కావొచ్చు. ఏ అంశంపైనైనా ప్రత్యేక ఆసక్తి ఉంటే అందులో ఇప్పటికే పరిశోధన కొనసాగిస్తున్న నిపుణులతో సందేహాలు నివృత్తి చేసుకోవడమే కాకుండా ప్రయోగాలు కూడా చేసుకునే అవకాశాన్ని కల్పిస్తారు. అలాగే ఆ అంశానికి సంబంధించిన కెరియర్‌ అవకాశాలనూ తెలుసుకోవచ్చు. సాధారణంగా ఈ సమ్మర్‌ క్యాంప్‌లు జాతీయ, అంతర్జాతీయ స్థాయిలో పేరొందిన పరిశోధనా సంస్థలు, సైన్స్‌ విద్యాలయాల్లో ఉంటాయి. నివాస ప్రాంతానికి దగ్గరలో ఉన్న పరిశోధనా సంస్థలు, ప్రయోగశాలలకూ తీసుకెళ్తారు. కేవీపీవైకు ఎంపికైన ప్రతి విద్యార్థికీ గుర్తింపు కార్డు మంజూరు చేస్తారు. దీనిద్వారా జాతీయ ప్రయోగ శాలలు/యూనివర్సిటీల్లో లైబ్రరీ, ల్యాబొరేటరీ సౌకర్యాలను వినియోగించుకోవచ్చు.
ఆన్‌లైన్‌ దరఖాస్తుకు గడువు: అక్టోబరు 5
దరఖాస్తు ఫీజు: ఎస్సీ, ఎస్టీ, దివ్యాంగులకు రూ.625. మిగిలిన అందరికీ రూ.1250.
పరీక్ష తేది: జనవరి 31, 2021
ప్రవేశపత్రాలు: జనవరి రెండోవారం నుంచి కేవీపీవై వెబ్‌లో అందుబాటులో ఉంటాయి.
పరీక్ష కేంద్రాలు: ఏపీలో.. కర్నూలు, రాజమండ్రి, తిరుపతి, విజయవాడ, విశాఖపట్నం.
తెలంగాణలో హైదరాబాద్, కరీంనగర్, వరంగల్‌.
వెబ్‌సైట్‌: http://kvpy.iisc.ernet.in
ఎంసెట్‌ దరఖాస్తుకు మరో అవకాశం
ఈనాడు, అమరావతి: ఎంసెట్‌ సహా నాలుగు ఉమ్మడి ప్రవేశ పరీక్షలకు అపరాధ రుసుముతో దరఖాస్తు చేసుకునేందుకు గడువును పొడిగిస్తూ ఏపీ ఉన్నత విద్యా మండలి ప్రకటన విడుదల చేసింది. కరోనా కారణంగా దరఖాస్తు చేసుకోలేకపోయిన విద్యార్థులకు అవకాశం కల్పించేందుకు ఈ నిర్ణయం తీసుకున్నట్లు పేర్కొంది. ఎస్‌డబ్ల్యూ-3 కింద ప్రత్యేక పరీక్ష ద్వారా ప్రవేశాలు నిర్వహించేందుకు కళాశాలలు రిజిస్ట్రేషన్‌ చేసుకోవాలని సూచించింది. వాటికి ఎంసెట్‌తో సంబంధం లేకుండా ఉన్నత విద్య నియంత్రణ, పర్యవేక్షణ కమిషన్‌ ప్రత్యేకంగా పరీక్ష నిర్వహిస్తుంది.
4.. 7.. 8.. ర్యాంకులు మనోళ్లవే..
* జేఈఈ జాతీయస్థాయి 10 ర్యాంకర్లలో ముగ్గురు తెలుగు విద్యార్థులే
* జితేంద్ర అగ్రగణ్యుడు, శశాంక్‌కు 7... శివకృష్ణకు 8వ ర్యాంకు
* అమ్మాయిల్లో టాపర్ తనూజకు 20వ ర్యాంకు
* ఈసారి జనరల్‌ విభాగం తప్ప మిగిలిన కేటగిరీల్లో తగ్గిన కటాఫ్‌
ఈనాడు, హైదరాబాద్‌: జేఈఈ మెయిన్‌లో తొలి 10 స్థానాల్లో మూడింటిని తెలుగు విద్యార్థులు కైవసం చేసుకున్నారు. గత ఏడాది మాదిరిగానే ఈసారీ మూడు ర్యాంకులు దక్కాయి. పోయిన సంవత్సరం ఏపీ, తెలంగాణలో ఉత్తమ ర్యాంకు అయిదుకాగా...ఈసారి నాలుగు. ఏపీకి చెందిన జితేంద్ర 4వ ర్యాంకు, హైదరాబాద్‌కు చెందిన శశాంక్‌ అనిరుధ్‌ 7, సాగి శివకృష్ణ 8వ ర్యాంకు సాధించారు. మొత్తం 20 ర్యాంకులలోపు ఏడుగురు తెలుగు విద్యార్థులకు చోటు దక్కింది. దేశంలో 100 పర్సంటైల్‌ సాధించిన 24 మందిలో చుక్కా తనూజ ఒక్కరే అమ్మాయి కాగా...ఆమె 20వ ర్యాంకు పొందారు. జనరల్‌ విభాగంలో కటాఫ్‌ పర్సంటైల్‌ స్వల్పంగా పెరిగినా మిగిలిన కేటగిరీల్లో బాగా తగ్గడం చర్చనీయాంశమైంది. ఈసారి ఈడబ్ల్యూఎస్‌ కేటగిరీపై అవగాహన పెరుగుతుందని, దానివల్ల గత ఏడాది కంటే కటాఫ్‌ పర్సంటైల్‌ పెరుగుతుందని భావించారు. అయితే ఈసారి ఈడబ్ల్యూఎస్‌తో పాటు ఇతర కేటగిరీల్లో కూడా కటాఫ్‌ బాగా తగ్గింది. ఈ కటాఫ్‌ సాధించిన వారికి మాత్రమే సెప్టెంబ‌రు 27వ తేదీన జరిగే జేఈఈ అడ్వాన్స్‌డ్‌ రాయడానికి అర్హత ఉంటుంది. జేఈఈ శిక్షణా నిపుణుడు ఉమాశంకర్‌ మాట్లాడుతూ పరీక్షలు వాయిదా పడుతూ రావడం.. బాగా ఆలస్యం కావడంతో విద్యార్థుల్లో ఆసక్తి తగ్గిందని, ఫలితంగా పరీక్షలు రాసేవారి సంఖ్య కూడా తగ్గడంతో కటాఫ్‌ తగ్గిందని చెప్పారు. మరో నిపుణుడు కృష్ణ చైతన్య మాట్లాడుతూ ఈసారి కరోనా వల్ల ఆన్‌లైన్‌ శిక్షణతో ముఖ్యంగా ఆర్థికంగా వెనుకబడిన వారు, పేద వర్గాల పిల్లలు బాగా ఇబ్బంది పడ్డారని చెప్పారు.
(గమనిక: పర్సంటైల్‌ ఒకటే అయినా ర్యాంకు కేటాయించేటప్పుడు మొదట గణితంలో వచ్చిన మార్కులు, ఆ తర్వాత భౌతిక, రసాయనశాస్త్రాలను పరిగణనలోకి తీసుకుంటారు. అవి కూడా సమానమైతే వయసును లెక్కలోకి తీసుకుంటారు. అంటే గణితంలో అధిక మార్కులు సాధించిన వారు ర్యాంకుల్లో ముందుంటారు)
విజేతల మనోగతాలు
బొంబాయి ఐఐటీలో కంప్యూటర్‌ సైన్సు చదువుతాం
జేఈఈ మెయిన్స్‌ టాపర్ల మనోగతం
ఎక్కువ మంది ర్యాంకర్లు ఐఐటీ బొంబాయిలో కంప్యూటర్‌ సైన్సు చదవడానికే ప్రాధాన్యమిస్తున్నారు. కొందరు విద్యార్థులు ఇంజినీరింగ్‌ తర్వాత వ్యాపారవేత్తలుగా ఎదగాలనే లక్ష్యంతో ఉన్నారు. మరికొందరు మంచి ఉద్యోగాలు సాధిస్తామంటున్నారు. 20లోపు ర్యాంకు సాధించిన తెలుగు విద్యార్థుల మనోగతాలివి.

సాఫ్ట్‌వేర్‌ కంపెనీ ఏర్పాటు చేస్తా.. (ర్యాంకు 4)
ఐఐటీ బొంబాయిలో సీటు సాధించేందుకు కష్టపడుతున్నా. ఇంజినీరింగ్‌ పూర్తయ్యాక సాఫ్ట్‌వేర్‌ కంపెనీ స్థాపించాలన్నదే లక్ష్యం. అనుకున్న అధ్యాయాల్లో నుంచి ప్రశ్నలు రాకపోవడంతో సెప్టెంబరులో మార్కులు కొద్దిగా తగ్గాయి. - లండా జితేంద్ర, గరివిడి, విజయనగరం.
ఐఐటీ మద్రాస్‌లో చదువుతా.. (ర్యాంకు7)
జేఈఈ అడ్వాన్స్‌డ్‌లోనూ మంచి మార్కులు సాధించి ఐఐటీ మద్రాస్‌లో సీఎస్‌ఈ చదవాలనుకుంటున్నా. మెయిన్‌లో ఏడో ర్యాంకు రావడం సంతోషదాయకం. జనవరితో పోల్చితే సెప్టెంబరులో 60 మార్కులు పెరగడంతో ర్యాంకు మెరుగుపడింది. - రాచపల్లె శశాంక్‌ అనిరుధ్‌, కడప.
అడ్వాన్సుడ్‌లోనూ ర్యాంకు సాధిస్తా.. (ర్యాంకు 8)
‘ఐఐటీ బొంబాయిలో కంప్యూటర్‌ సైన్సు చదవాలన్నది కల. అడ్వాన్స్‌డ్‌లోనూ మంచి ర్యాంకు సాధించేందుకు ప్రయత్నిస్తున్నా. - సాగి శివకృష్ణ, ఉప్పల్‌, హైదరాబాద్‌.
ఐఐటీ బొంబాయిలో సీటు సాధిస్తా.. (ర్యాంకు 15)
ఐఐటీ బొంబాయిలో సీటు సంపాదించాలన్న పట్టుదలతో అడ్వాన్స్‌డ్‌కు సిద్ధమవుతున్నా. సాఫ్ట్‌వేర్‌ ఇంజినీర్‌ కావాలన్నది లక్ష్యం. మెయిన్‌లో 292 మార్కులు పొందినప్పటికీ గణితం, భౌతిక శాస్త్రంలో రెండు ప్రశ్నలకు చేసిన తప్పుల వల్ల ర్యాంకు 15 వచ్చింది. - తడవర్తి విష్ణు శ్రీసాయిశంకర్‌, బాపట్ల, గుంటూరు.
ఔత్సాహిక పారిశ్రామికవేత్తనవుతా.. (ర్యాంకు19)
ఐఐటీ బొంబాయిలో ఇంజినీరింగ్‌ చదివి ఔత్సాహిక పారిశ్రామికవేత్తగా ఎదగాలనుకుంటున్నా. అడ్వాన్స్‌డ్‌లో మంచి ర్యాంకు సాధించే లక్ష్యంతో చదువుతున్నా. - రంగోల అరుణ్‌ సిద్ధార్థ, గొల్లప్రోలు, తూర్పుగోదావరి జిల్లా
అడ్వాన్సుడ్‌లో 60వ ర్యాంకు సాధిస్తా (మహిళా విభాగంలో 1వ ర్యాంకు)
చిన్నప్పటినుంచి గణితమంటే ఇష్టం. ఐఐటీ బొంబాయిలో సీఎస్‌ఈ చదవాలనుకుంటున్నా. అడ్వాన్సుడ్‌లో 60లోపు ర్యాంకు సాధిస్తా. మెయిన్‌లో 100 పర్సంటైల్‌ వస్తుందని ఊహించలేదు. - తనూజ, విజయనగరం.
ఐఏఎస్‌నవుతా..
సివిల్స్‌లో ర్యాంకు సాధించి ఐఏఎస్‌ కావాలన్నదే నా లక్ష్యం. జేఈఈ మెయిన్స్‌లో మంచి ర్యాంకు వస్తుందనే భావించా. మధురవాడ నుంచి ప్రతి రోజూ విశాఖ వచ్చి డేస్కాలర్‌గా చదువుకున్నా. చదువుతోపాటు నిత్యం ఆటలు కూడా ఆడేవాణ్ని. ప్రణాళికాబద్ధంగా చదవడంతో మంచి ర్యాంకు వచ్చింది. - వై.ఎస్‌.ఎస్‌.నరసింహనాయుడు, ప్రథమర్యాంకర్‌ (ఈడబ్ల్యూఎస్‌ విభాగం), విశాఖపట్నం
అడ్వాన్స్‌డ్‌కు మనోళ్లు కనీసం 40 వేల మంది!..
జేఈఈ అడ్వాన్స్‌డ్‌ రాసేందుకు 2.50 లక్షల మంది అర్హత సాధించగా వారిలో తెలుగు రాష్ట్రాల నుంచి కనీసం 40 వేల మంది ఉంటారని నిపుణుల అంచనా. ప్రతిసారి అర్హత సాధించిన వారందరూ అడ్వాన్స్‌డ్‌ రాయరని, ఈసారి ఆ సంఖ్య మరింత తగ్గుతుందని చెబుతున్నారు. మొదటి 100 ర్యాంకుల్లో ఏపీ, తెలంగాణ నుంచి కనీసం 25-30 మంది ఉంటారని ప్రాథమిక సమాచారం.
13న నీట్‌ పరీక్ష..!
* 15 లక్షలకు పైగా హాజరుకానున్న విద్యార్థులు
దిల్లీ: దేశవ్యాప్తంగా ఈ నెల 13న‌ ‘నేషనల్‌ ఎలిజిబులిటీ కమ్‌ ఎంట్రెన్స్‌ టెస్ట్‌(నీట్‌)’ పరీక్షను నిర్వహించనున్నారు. కొవిడ్‌-19 నేపథ్యంలో అన్ని రకాల జాగ్రత్తలను చేపట్టినట్లు అధికారులు పేర్కొన్నారు. విద్యార్థుల మధ్య భౌతిక ఎడం పాటించేందుకు పరీక్ష కేంద్రాలను 2,546 నుంచి 3,843కు పెంచినట్లు తెలిపారు. అలాగే ఒక్కో గదిలో విద్యార్థుల సంఖ్యను 24 నుంచి 12కు తగ్గించినట్లు వివరించారు. దేశవ్యాప్తంగా నీట్‌-2020కి మొత్తం 15.97 లక్షల మంది దరఖాస్తు చేసుకున్నారు. పరీక్షకు హాజరయ్యే ప్రతి అభ్యర్థి తప్పనిసరిగా మాస్క్, సానిటైజర్‌తో కేంద్రం వద్దకు రావాలని, అక్కడ ఒక్కో అభ్యర్థికి మూడు పొరలున్న ప్రత్యేక మాస్క్‌లను అందజేస్తారని అధికారులు పేర్కొన్నారు.
ఐఐటీ, ఎన్‌ఐటీ, ట్రిపుల్‌ఐటీల్లో సీట్ల భర్తీకి కాలపట్టిక
* అక్టోబరు 6 నుంచి ఆరు విడతల కౌన్సెలింగ్‌
ఈనాడు, హైదరాబాద్‌: దేశవ్యాప్తంగా ఐఐటీలు, ఎన్‌ఐటీలు, ట్రిపుల్‌ ఐటీలతోపాటు కేంద్ర ప్రభుత్వ ఆర్థిక సహకారంతో నడిచే మరికొన్ని సాంకేతిక విద్యాసంస్థల్లో బీఈ/బీటెక్‌ సీట్ల భర్తీకి జాయింట్‌ సీట్‌ అలకేషన్‌ అథారిటీ (జోసా) సెప్టెంబరు 11న కాలపట్టిక ప్రకటించింది. ఈసారి అక్టోబరు 6 నుంచి ఈ ప్రక్రియ మొదలై నవంబరు 7వ తేదీతో ఆరు విడతల సీట్ల కేటాయింపు ముగుస్తుంది. ఇప్పటికే ఆలస్యం కావడంతో గత ఏడాది కంటే ఈసారి ఒక విడత కౌన్సెలింగ్‌ తగ్గింది. మొదటి విడత సీట్ల కేటాయింపు కంటే ముందుగా రెండుసార్లు నమూనా (మాక్‌) కౌన్సెలింగ్‌ నిర్వహిస్తారు. అప్పటికే వెబ్‌ ఆప్షన్లు (ఛాయిస్‌ ఫిల్లింగ్‌) ఇచ్చుకున్న వారికి ఎక్కడ సీట్లు రావచ్చో దీనివల్ల తెలుస్తుంది. అవసరమైతే విద్యార్థులు తమ ఆప్షన్లను మార్చుకొని మళ్లీ నమోదు చేసుకోడానికి ఇలా చేస్తారు. ఈసారి సీటు వచ్చాక స్వయంగా వెళ్లి రిపోర్టు చేయాల్సిన అవసరం లేదు. కరోనా నేపథ్యంలో అంతా ఆన్‌లైన్‌లోనే పూర్తి చేసేలా నియమావళిని మార్చారు. ఆరు విడతల కౌన్సెలింగ్‌ తర్వాత ఎన్‌ఐటీలు, ఇతర సంస్థల్లో సీట్లు ఖాళీగా ఉంటే వాటి భర్తీకి మరో రెండు విడతల కౌన్సెలింగ్‌ను ప్రత్యేకంగా నిర్వహిస్తారు.
111 సంస్థల్లో ప్రవేశాలకు కౌన్సెలింగ్‌
*  ఐఐటీలు: 23
*  ఎన్‌ఐటీలు, ఐఐఈఎస్‌టీ షిబ్పూర్‌: 32
*  ట్రిపుల్‌ ఐటీలు: 26
*  ఇతర సంస్థలు: 30
*  మొత్తం: 111
(తెలుగు రాష్ట్రాల్లోని ఐఐటీలు, ఎన్‌ఐటీలతోపాటు హైదరాబాద్‌లోని హెచ్‌సీయూ (ఎంటెక్‌లోని కంప్యూటర్‌ సైన్స్‌ సీట్లకే), విజయవాడలోని స్కూల్‌ ఆఫ్‌ ప్లానింగ్‌ అండ్‌ ఆర్కిటెక్చర్‌, కర్నూలు, శ్రీసిటీలోని ట్రిపుల్‌ఐటీల్లో సీట్లను జోసా భర్తీ చేస్తుంది)
ఆరు విడతల కౌన్సెలింగ్‌ కాలపట్టిక
*  అక్టోబరు 6: రిజిస్ట్రేషన్‌/ఛాయిస్‌ ఫిల్లింగ్‌ ప్రారంభం
*  12వ తేదీ: మొదటి నమూనా సీట్ల కేటాయింపు
*  14వ తేదీ: రెండోసారి నమూనా సీట్ల కేటాయింపు
*  16వ తేదీ: మొదటి విడత సీట్ల కేటాయింపు
*  అక్టోబరు 21: 2వ విడత, 26వ తేదీ: 3వ విడత, 30వ తేదీ: 4వ విడత, నవంబరు 3వ తేదీ: 5వ విడత, నవంబరు 7వ తేదీ: 6వ విడత సీట్ల కేటాయింపు
12 నుంచి ‘ఏపీ సచివాలయ’ హాల్‌టికెట్లు
ఈనాడు డిజిటల్, అమరావతి: ఆంధ్ర‌ప్ర‌దేశ్‌ గ్రామ/వార్డు సచివాలయ పోస్టులకు దరఖాస్తు చేసుకున్న అభ్య‌ర్థులు ఈ నెల 12 నుంచి ఆన్‌లైన్‌లో హాల్‌టికెట్లు పొందవచ్చని రాష్ట్ర‌ పంచాయతీరాజ్, గ్రామీణాభివృద్ధిశాఖ 11న ఒక ప్రకటనలో తెలిపింది. దానికి సంబంధించిన‌ వెబ్‌సైట్‌లో హాల్‌టికెట్లు అందుబాటులో ఉంటాయని వెల్లడించింది. ఈ నెల 20 నుంచి 26 వరకు పరీక్షలు జరగనున్నాయని, పరీక్షా కేంద్రాల వివరాలను వెబ్‌సైట్‌లో ఉంచినట్లు పేర్కొంది.
టీఎస్ ఈసెట్‌ ఫలితాలు విడుదల
హైదరాబాద్: తెలంగాణలో పాలిటెక్నిక్‌, బీఎస్సీ గణితం పూర్తయిన విద్యార్థులు బీటెక్‌, బీఫార్మసీలో రెండో ఏడాదిలో ప్రవేశాలకు నిర్వహించిన ఈసెట్‌ ఫలితాలు విడుదలయ్యాయి. ఈ ఫలితాలను ఉన్నత విద్యామండలి ఛైర్మన్‌ ఆచార్య పాపిరెడ్డి విడుదల చేశారు. ఈ ఏడాది 97.58శాతం మంది ఉత్తీర్ణత సాధించినట్టు ఆయన వెల్లడించారు. కరోనాతో నెలకొన్న పరిస్థితుల్లో రాష్ట్రంలో తొలిసారి నిర్వహించిన పరీక్ష ఇదే కావడం గమనార్హం. ఆగస్టు 31న దాదాపు 56 పరీక్షా కేంద్రాల్లో కంప్యూటర్‌ బేస్డ్‌ డెసట్‌ను కొవిడ్‌ -19 మార్గదర్శకాలకు అనుగుణంగా ఈసెట్‌ నిర్వహించిన విషయం తెలిసిందే.
రెండు తెలుగు రాష్ట్రాల్లో నిర్వహించిన ఈ పరీక్షకు 90.83 శాతం మంది అభ్యర్థులు హాజరయ్యారు. తెలంగాణలో 14 నగరాలు/పట్టణాలు, ఏపీలో 4 నగరాల్లో పరీక్ష నిర్వహించారు. 28,016 మంది దరఖాస్తు చేసుకోగా 25,448 మంది పరీక్ష రాశారు. గత ఏడాదితో పోలిస్తే దాదాపు 6 శాతం హాజరు తగ్గింది. తెలంగాణలో 92 శాతానికిపైగా, ఏపీలో 87 శాతం మంది పరీక్ష రాశారు.
జేఈఈ మెయిన్ పేప‌ర్‌-1 ఫలితాలు విడుద‌ల‌
ఈనాడు, హైదారాబాద్: జేఈఈ మెయిన్ పేప‌ర్‌-1 ఫ‌లితాల‌ను సెప్టెంబ‌రు 11న విడుద‌ల చేశారు. 2020 జ‌న‌వ‌రిలో జ‌రిగిన ఈ ప‌రీక్ష‌ల‌కు బీఈ/ బీటెక్‌లో చేరేందుకు 9.26ల‌క్ష‌ల మంది హాజ‌ర‌య్యారు. మెయిన్‌లో క‌నీస మార్కులు సాధించిన 2-50 ల‌క్ష‌ల మందికి సెప్టెంబ‌రు 27న జ‌ర‌గ‌నున్న జేఈఈ అడ్వాన్స్‌డ్ ప‌రీక్ష రాసెందుకు అర్హ‌త క‌ల్పిస్తారు.
మార్చి 24 నుంచి ఇంటర్‌ పరీక్షలు
* 2020-21 విద్యా క్యాలెండర్‌ను ఖరారు చేసిన బోర్డు
* దసరాకు 3.. సంక్రాంతికి 2 రోజుల సెలవులు
* మొత్తంగా తగ్గిన పనిదినాలు: 40
ఈనాడు, హైదరాబాద్‌: ఇంటర్‌బోర్డు ఈ విద్యా సంవత్సరం(2020-21) క్యాలెండర్‌ను ఖరారు చేసింది. వార్షిక పరీక్షలు 2021 మార్చి 24నుంచి ప్రారంభం అవుతాయని తెలిపింది. సాధారణంగా ఇంటర్‌ పరీక్షలు మార్చి మొదటి వారంలో మొదలవుతాయి. 2019-20లో మార్చి 4 నుంచి ప్రారంభమయ్యాయి. ఈసారి విద్యా సంవత్సరం ప్రారంభం బాగా ఆలస్యమైనందున చివరి పరీక్షలు కూడా ఆలస్యంగా జరుగుతాయా? గతంలో మాదిరిగానే మార్చిలో ఉంటాయా? అనే సందిగ్ధత నెలకొంది. అయితే గత ఏడాదితో పోలిస్తే చివరి పరీక్షలు 20 రోజులు ఆలస్యంగా మొదలుకానున్నాయి.
సెప్టెంబ‌రు 1 నుంచి రెండో ఏడాది విద్యార్థులకు డిజిటల్‌ తరగతులు ప్రారంభమయ్యాయి. అప్పటి నుంచి విద్యా సంవత్సరం మొదలైనట్లుగా పరిగణనలోకి తీసుకున్నారు. వచ్చే ఏడాది ఏప్రిల్‌ 16 చివరి పనిదినంగా పేర్కొన్నారు. అంటే మొత్తం 228 రోజులు. అందులో ఆదివారాలు, ఇతర సెలవులు 46 మినహాయిస్తే 182 రోజులు పనిదినాలుగా ఉంటాయి. దసరాకు ఈసారి ఆదివారంతో కలిపి మూడు రోజులు, సంక్రాంతికి రెండు రోజులు సెలవులిచ్చారు. సాధారణంగా జూన్‌ 1 నుంచి విద్యా సంవత్సరం మొదలవుతుంది. ఈసారి మూడు నెలలు ఆలస్యమైంది. ఈ నేపథ్యంలో సెలవులు కుదించినా దాదాపు 40 రోజుల పనిదినాలు తగ్గాయి. విద్యా సంవత్సరాన్ని గాడిలో పెట్టేందుకు ఇంతకంటే మార్గం కూడా లేదని ప్రభుత్వ జూనియర్‌ కళాశాలల అధ్యాపకుల సంఘం రాష్ట్ర అధ్యక్షుడు మధుసూదన్‌రెడ్డి అభిప్రాయపడ్డారు. ఆగ‌స్టు 31వ తేదీ సంతకంతో విద్యా క్యాలెండర్‌ను ఇంటర్‌బోర్డు సెప్టెంబ‌రు 10న‌ కళాశాలల ప్రిన్సిపాళ్లకు పంపింది.
ప్రిన్సిపాళ్లకు, యాజమాన్యాలకు సూచనలు.. హెచ్చరికలు
‘‘ప్రభుత్వం ప్రకటించిన మేరకు సెలవులను తప్పనిసరిగా పాటించాలి. ప్రవేశాలను ఇంటర్‌బోర్డు కాలపట్టిక ప్రకారమే చేపట్టాలి. ప్రవేశాల కోసం పీఆర్‌ఓలను నియమించుకోవడం, ఇతరత్రా ప్రచారం చేసే మార్కెటింగ్‌ వ్యూహాలను అమలు చేయరాదు. హోర్డింగ్, కరపత్రాలు, గోడలపై రాతలతో ప్రచారం చేయరాదు. జవాబుపత్రాల మూల్యాంకనానికి అర్హులైన అధ్యాపకులను పంపించకుంటే ప్రైవేట్‌ కళాశాలల యాజమాన్యాలపై కఠిన చర్యలు తీసుకుంటాం’’ అని ఇంటర్‌బోర్డు కార్యదర్శి సయ్యద్‌ ఉమర్‌ జలీల్‌ హెచ్చరించారు.
వార్షిక విద్యా క్యాలెండర్‌ ఇదీ...
మొత్తం పని దినాలు: 182
విద్యా సంవత్సరం ప్రారంభం: సెప్టెంబరు 1
దసరా సెలవులు: అక్టోబరు 23, 24, 25
సంక్రాంతి సెలవులు: 2021 జనవరి 13, 14
ప్రీ ఫైనల్‌ పరీక్షలు: 2021 ఫిబ్రవరి 22-27
ప్రయోగ పరీక్షలు: 2021 మార్చి 1-20
చివరి పరీక్షలు: 2021 మార్చి 24- ఏప్రిల్‌ 12
చివరి పని దినం: 2021 ఏప్రిల్‌ 16
వేసవి సెలవులు: 2021 ఏప్రిల్‌ 17- మే 31
సప్లిమెంటరీ పరీక్షలు: 2021 మే చివరి వారం
2021-22 విద్యా సంవత్సరం మొదలు: 2021 జూన్‌ 1
డిగ్రీ, పీజీ పరీక్షలపై హైకోర్టులో విచారణ
హైదరాబాద్‌: తెలంగాణలో డిగ్రీ, పీజీ చివరి సెమిస్టర్‌ పరీక్షల నిర్వహణపై హైకోర్టులో విచారణ జరిగింది. వసతి గృహాలు మూసి ఉన్నందున పరీక్షలు రాసేందుకు విద్యార్థులు ఇబ్బంది పడతారని పిటిషనర్లు కోర్టుకు తెలిపారు. పరీక్షలను ఆన్‌లైన్‌లో నిర్వహించాలని న్యాయస్థానానికి విజ్ఞప్తి చేశారు. దీనిపై హైకోర్టు స్పందిస్తూ ఆన్‌లైన్‌లో పరీక్షలు నిర్వహించగలరా? సప్లిమెంటరీలో ఉత్తీర్ణులైన వారిని రెగ్యులర్‌గా పరిగణిస్తారా? అని అడ్వొకేట్‌ జనరల్‌ బీఎస్‌ ప్రసాద్‌ను ప్రశ్నించింది. ఇంజినీరింగ్‌ కోర్సులకు నిర్వహించవచ్చని ఉన్నత న్యాయస్థానం అభిప్రాయపడింది. దీనిపై అడ్వొకేట్‌ జనరల్‌ స్పందిస్తూ ప్రభుత్వాన్ని అడిగి తెలియజేస్తానని సమాధానమిచ్చారు. అనంతరం తదుపరి విచారణను హైకోర్టు సెప్టెంబ‌రు 15కి వాయిదా వేసింది.
టీఎస్‌ పాలిసెట్‌ ఫలితాలు విడుదల
హైదరాబాద్‌: తెలంగాణలో పాలిసెట్‌ ఫలితాలు సెప్టెంబ‌రు 10న‌ విడుదలయ్యాయి. సాంకేతిక విద్యాశాఖ కమిషనర్‌ నవీన్‌ మిత్తల్‌ నాంపల్లిలోని తన కార్యాలయంలో ర్యాంకులు విడుదల చేశారు. సెప్టెంబ‌రు 2వ తేదీన జరిగిన ప్రవేశ పరీక్షకు 56,814 మంది విద్యార్థులు హాజరయ్యారు.
ఇంజినీరింగ్‌ పరీక్ష తేదీలు నెలాఖరుకల్లా వెల్లడి
* శాసనమండలి ప్రశ్నోత్తరాల్లో మంత్రి సబితా ఇంద్రారెడ్డి
ఈనాడు, హైదరాబాద్: ఇంజినీరింగ్‌ చివరి సంవత్సరం విద్యార్థులకు కచ్చితంగా పరీక్షలు నిర్వహిస్తామని.. ఆ తేదీల్ని నెలాఖరుకల్లా వెల్లడిస్తామని విద్యాశాఖ మంత్రి సబితా ఇంద్రారెడ్డి తెలిపారు. ఈ పరీక్షల్ని ఆన్‌లైన్‌లో నిర్వహించాలా? మరో విధానంలోనా? అన్నది ప్రభుత్వం ఆలోచించి నిర్ణయం తీసుకుంటుందని చెప్పారు. సెప్టెంబ‌రు 9న‌ శాసనసమండలి ప్రశ్నోత్తరాల్లో మంత్రి మాట్లాడారు. ప్రథమ, ద్వితీయ, తృతీయ సంవత్సరం విద్యార్థుల పరీక్షలు తర్వాత ఉంటాయన్నారు. మార్కెట్లో డిమాండ్‌ ఉన్న 14 రకాల కొత్త కోర్సులను ప్రవేశపెట్టడానికి 70 కళాశాలలు ముందుకు వచ్చాయని వివరించారు.
25,26 తేదీల్లో తెలంగాణ ఎంసెట్‌ ఫలితాలు!
ఈనాడు, హైద‌రాబాద్‌: తెలంగాణ ఎంసెట్‌ ర్యాంకులను సెప్టెంబ‌రు 24వ తేదీ తర్వాత విడుదల చేయాలని ఉన్నత విద్యామండలి తాజాగా నిర్ణయించినట్టు తెలిసింది. సాధ్యమైనంత త్వరగా కౌన్సెలింగ్‌ పూర్తిచేసి ఆన్‌లైన్‌లో తరగతులను ప్రారంభించాలనే ఆలోచనతో ఈ నిర్ణయం తీసుకున్నట్టు సమాచారం. ‘సెప్టెంబ‌రు 14వ తేదీతో ఎంసెట్‌ ఇంజినీరింగ్‌ పరీక్షలు ముగుస్తాయి. ఫలితాలు ఇవ్వడానికి 10 రోజుల సమయం పడుతుంది. సెప్టెంబ‌రు 25 లేదా 26 తేదీల్లో ఫలితాలను ప్రకటించేందుకు ఇబ్బంది ఉండదు’ అని తెలంగాణ ఉన్నత విద్యామండలి ఛైర్మన్‌ తుమ్మల పాపిరెడ్డి చెప్పారు. ఫలితాలు వెల్లడైన మరుసటి రోజే కౌన్సెలింగ్‌కు ప్రకటన జారీ చేస్తామన్నారు.
కరోనా ఉంటే పరీక్షలకు అనుమతి లేదు
* శరీర ఉష్ణోగ్రత 99.4 డిగ్రీలు దాటితే చివరి రోజున అవకాశం
* సెప్టెంబ‌రు 9 నుంచి ఎంసెట్‌ ఇంజినీరింగ్‌ ఆన్‌లైన్‌ పరీక్షలు
ఈనాడు, హైదరాబాద్‌: కరోనా పాజిటివ్‌గా నిర్ధారణయిన విద్యార్థులు రాష్ట్ర ప్రభుత్వ పరిధిలోని ప్రవేశ పరీక్షలు రాయడానికి వీల్లేదు. ఎంసెట్‌ రాసేందుకు కూడా వారిని అనుమతించడం లేదని ఎంసెట్‌ కన్వీనర్‌ గోవర్ధన్‌ స్పష్టంచేశారు. ‘అలాంటి వారు ఎంసెట్‌ వెబ్‌సైట్లో పేర్కొన్న మెయిల్‌కు వినతి పంపితే, దాన్ని ప్రభుత్వానికి పంపుతాం. అక్కడి నుంచి వచ్చే ఆదేశాల మేరకు పరీక్ష నిర్వహణపై నిర్ణయం తీసుకుంటాం. ఒకవేళ ఎంసెట్‌ ముగిసే లోపు నెగిటివ్‌గా నివేదిక వస్తే ఏదో ఒకరోజు వారిని పరీక్ష రాయడానికి అనుమతిస్తామని’ ఆయన తెలిపారు. ఉన్నత విద్యామండలి ఛైర్మన్‌ తుమ్మల పాపిరెడ్డి మాట్లాడుతూ, థర్మల్‌ స్కానింగ్‌లో శరీర ఉష్ణోగ్రత 99.4 డిగ్రీల సెల్సియస్‌ దాటిన వారికి చివరి రోజు పరీక్ష నిర్వహిస్తామని, వాళ్లకు ఎక్కడ పరీక్ష కేంద్రం కేటాయిస్తారనేది తర్వాత ప్రకటిస్తామని వెల్లడించారు. పరీక్షకు 1.43 లక్షల మంది దరఖాస్తు చేశారని, తెలంగాణలో 79, ఏపీలో 23 కేంద్రాలను ఏర్పాటు చేశామన్నారు.
గంటన్నర ముందుగా కేంద్రాల్లోకి అనుమతి..
ఎంసెట్‌ ఇంజినీరింగ్‌ ఆన్‌లైన్‌ పరీక్షలు సెప్టెంబ‌రు 9, 10, 11, 14వ తేదీల్లో జరగనున్నాయి. ప్రతిరోజూ రెండు విడతల్లో (ఉదయం 9-12, మధ్యాహ్నం 3-6 గంటల మధ్య) పరీక్షలు జరుగుతాయి. పరీక్ష ప్రారంభ సమయానికి గంటన్నర ముందే విద్యార్థులను పరీక్ష కేంద్రాల్లోకి అనుమతిస్తారు. ప్రతి ఒక్కరూ తనకు కరోనా లక్షణాలు లేవంటూ స్వీయ ధ్రువీకరణ పత్రాన్ని (సెల్ఫ్‌ డిక్లరేషన్‌) ఇన్విజిలేటర్‌కు అందించాలి. అభ్యర్థులు శానిటైజర్, నీళ్ల సీసా తెచ్చుకోవచ్చు.
11 లేదా 12న ఈసెట్‌ ఫలితాలు...
ఆగ‌స్టు 31న జరిగిన ఈసెట్‌ ఫలితాలను సెప్టెంబ‌రు 11 లేదా 12వ తేదీన వెల్లడించేందుకు అధికారులు సన్నద్ధమవుతున్నారు. ఫలితాల వెల్లడి తర్వాత అంతే త్వరగా కౌన్సెలింగ్‌ ప్రక్రియ పూర్తి చేయాలని ఉన్నత విద్యామండలి అధికారులు భావిస్తున్నారు.
దోస్త్‌ రిజిస్ట్రేషన్‌ గడువు పెంపు
ఈనాడు, హైదరాబాద్‌: డిగ్రీ ఆన్‌లైన్‌ సర్వీసెస్‌-తెలంగాణ(దోస్త్‌) ద్వారా డిగ్రీ కోర్సుల్లో ప్రవేశాలకు సంబంధించి రిజిస్ట్రేషన్‌ ప్రక్రియ గడువును సెప్టెంబ‌రు 8 వరకు పొడిగించినట్లు కన్వీనర్‌ ఆచార్య ఆర్‌.లింబాద్రి ఒక ప్రకటనలో తెలిపారు. తొలుత ప్రకటించిన ప్రకారం ఆ గడువు సెప్టెంబ‌రు 7తో ముగిసేది. వెబ్‌ ఆప్షన్లకు మాత్రం ముందుగా ప్రకటించినట్లుగానే సెప్టెంబ‌రు 8వ తేదీ తుది గడువు అని పేర్కొన్నారు.
పరీక్ష రాయని ఇంటర్‌ విద్యార్థులూ పాస్‌!
* ప్రభుత్వానికి బోర్డు ప్రతిపాదన
* త్వరలోనే పచ్చజెండా
* దాదాపు 27 వేల మందికి ప్రయోజనం
ఈనాడు, హైదరాబాద్‌: మార్చిలో వార్షిక పరీక్షలు రాసేందుకు రుసుములు చెల్లించి.. హాజరుకాలేకపోయిన ఇంటర్‌ ద్వితీయ సంవత్సరం విద్యార్థులనూ ఉత్తీర్ణులను చేయాలని ప్రభుత్వం భావిస్తోంది. దీనిపై ఇటీవలే ఇంటర్‌ బోర్డు ప్రభుత్వానికి ప్రతిపాదన సమర్పించింది. సర్కారు నుంచి వచ్చిన సంకేతాల మేరకే ప్రతిపాదన అందినందున త్వరలోనే ఆమోదం తెలుపుతూ అధికారిక నిర్ణయం వెలువడే అవకాశం ఉన్నట్లు సమాచారం. దీంతో రాష్ట్రవ్యాప్తంగా ఇంటర్‌ రెండో సంవత్సరానికి చెందిన సుమారు 27 వేల మంది ప్రయోజనం పొందనున్నారు. మార్చిలో పరీక్షలకు రెండో ఏడాది విద్యార్థులు సుమారు 4.30 లక్షల మంది హాజరుకాగా వారిలో 2,83,462 మంది ఉత్తీర్ణులయ్యారు. కరోనా నేపథ్యంలో.. తప్పిన విద్యార్థులకు అడ్వాన్స్‌డ్‌ సప్లిమెంటరీ పరీక్షలు జరిపే అవకాశం లేకపోవడంతో వాటిని రద్దు చేశారు. పరీక్షలు రాసి తప్పిన ద్వితీయ సంవత్సరం విద్యార్థులను పాస్‌ చేస్తున్నట్లు జులై 19వ తేదీన ప్రభుత్వం ప్రకటించింది. అలా దాదాపు 1.47 లక్షల మందికి తప్పిన సబ్జెక్టుల్లో కనీస పాస్‌ మార్కులు ఇచ్చి ఉత్తీర్ణులను చేశారు. రుసుములు చెల్లించి వివిధ కారణాల వల్ల పరీక్షలు రాయలేకపోయిన వారు ఇంకా 27 వేల మంది వరకు ఉన్నట్లు ఇంటర్‌ బోర్డు లెక్కలు తీసింది. వారందరూ సప్లిమెంటరీ రాయాలని అనుకున్నా ఇప్పట్లో సాధ్యమయ్యేలా లేదు. ఈ క్రమంలో వారికి కూడా కనీస మార్కులు ఇచ్చి పాస్‌ చేయాలన్నది ప్రభుత్వ ఆలోచనగా చెబుతున్నారు.
పాలిసెట్‌ ప్రవేశాల షెడ్యూల్‌ ఖరారు
హైదరాబాద్‌: తెలంగాణ పాలిసెట్‌ ఫలితాలను సెప్టెంబ‌రు 9న ప్రకటించనున్నారు. ఈ నేపథ్యంలో ప్రవేశాల ప్రక్రియ ప్రారంభించేందుకు సాంకేతిక విద్యాశాఖ షెడ్యూల్‌ ఖరారు చేసింది. సెప్టెంబ‌రు 12 నుంచి 17వరకు అభ్యర్థులు ఆన్‌లైన్‌లో సమాచారాన్ని నింపి స్లాట్‌ బుక్‌ చేసుకోవాలి. సెప్టెంబ‌రు 14 నుంచి 18 వరకు ధ్రువపత్రాల పరిశీలన చేపట్టనున్నారు. సెప్టెంబ‌రు 14 నుంచి 20 వరకు పాలిసెట్ వెబ్ ఆప్షన్ల నమోదుకు అవకాశం ఉంటుంది. అనంతరం 22న పాలిటెక్నిక్ సీట్లను కేటాయించనున్నారు.
పాలిసెట్‌ సీట్లు పొందిన అభ్యర్థులు సెప్టెంబ‌రు 22 నుంచి 26 వరకు ఆన్‌లైన్‌లో ట్యూషన్ ఫీజు చెల్లించి సెల్ఫ్ రిపోర్టింగ్ చేయాలి. 30 నుంచి తుది విడత ప్రవేశాల ప్రక్రియ నిర్వహిస్తారు. సెప్టెంబ‌రు 30, అక్టోబరు 1న వెబ్ ఆప్షన్లు నమోదుకు అవకాశం ఉంటుంది. అనంత‌రం 3న తుది విడత పాలిటెక్నిక్ సీట్లను కేటాయిస్తారు. మరోవైపు అక్టోబరు 7 నుంచి పాలిటెక్నిక్ విద్యా సంవత్సరం ప్రారంభించాలని నిర్ణయించారు. ప్రైవేటు పాలిటెక్నిక్ కళాశాలల్లో స్పాట్ అడ్మిషన్లకు అక్టోబరు 8న మార్గదర్శకాలు జారీ చేస్తారు.
ఏపీలో విద్యాలయాలకు అనుమతి
* అన్‌లాక్-4 మార్గదర్శకాలను విడుదల చేసిన ప్రభుత్వం
అమరావతి: కేంద్రప్రభుత్వ నిబంధనలకు అనుగుణంగా ఏపీ అన్‌లాక్‌-4 మార్గదర్శకాలను విడుదల చేసింది. సెప్టెంబ‌రు 21 నుంచి 9, 10, ఇంటర్‌ విద్యార్థులు విద్యాలయాలకు వెళ్లేందుకు అనుమతినిస్తూ ఉత్తర్వులు జారీ చేసింది. దీనికోసం తల్లిదండ్రుల రాతపూర్వక అంగీకారం తప్పనిసరి చేసింది. అంతేకాకుండా అదే రోజునుంచి పీజీ, పీహెచ్‌డీ విద్యార్థులు కూడా కళాశాలలకు వెళ్లవచ్చని తెలిపింది. నైపుణ్యాభివృద్ధి కేంద్రాలు తెరచుకునేందుకు అనుమతినిచ్చింది.
సివిల్స్‌.. ఎయిర్‌ఫోర్స్‌ పరీక్షలు ఒకే రోజు
ఈనాడు, గుంటూరు: సివిల్స్‌ ప్రిలిమినరీ, ఇండియన్‌ ఎయిర్‌ఫోర్స్‌ కామన్‌ అడ్మిషన్‌ టెస్టు ఒకే రోజు నిర్వహించనుండటంతో రెండు పరీక్షలు రాయాలనుకునే అభ్యర్థుల్లో అయోమయం నెలకొంది. అక్టోబరు 4న సివిల్‌ సర్వీసెస్‌ ప్రిలిమినరీ దేశవ్యాప్తంగా జరగనుంది. మరోవైపు అక్టోబరు 3, 4 తేదీల్లో ఇండియన్‌ ఎయిర్‌ఫోర్స్‌లో పలు ఉద్యోగాలకు డిగ్రీ, ఇంజినీరింగ్‌ అర్హతలతో పరీక్ష జరగనుంది. ఈ రెండు పరీక్షలు ఒకే రోజు నిర్వహించడం వల్ల ఏదో ఒక పరీక్షను కోల్పోవాల్సి వస్తుందని అభ్యర్థులు వాపోతున్నారు.
డిగ్రీలో కొత్త కోర్సుల సీట్లు 13,720
* అందుబాటులో మొత్తం 4,24,315 సీట్లు
* దోస్త్‌ రిజిస్ట్రేషన్‌కు 7, వెబ్‌ ఆప్షన్ల నమోదుకు 8 తుది గడువు
ఈనాడు, హైదరాబాద్‌: రాష్ట్రవ్యాప్తంగా డిగ్రీలో ఈసారి ప్రవేశపెట్టిన రెండు కొత్త కోర్సుల్లో మొత్తం 13,720 సీట్లు అందుబాటులోకి వచ్చాయి. డిగ్రీ ఆన్‌లైన్‌ సర్వీసెస్‌-తెలంగాణ(దోస్త్‌) కింద రాష్ట్రంలో ఈ విద్యా సంవత్సరం(2020-21)లో 1,059 కళాశాలల్లో 4,24,315 సీట్లు అందుబాటులో ఉన్నాయి. అందులో బీఎస్సీ డేటా సైన్స్‌లో 6,780, బీకాం అనలిటిక్స్‌లో 6,940 సీట్లు కొత్తగా చేరాయి. డేటా సైన్స్‌ను 124 కళాశాలల్లో, బిజినెస్‌ అనలిటిక్స్‌ను 113 కళాశాలల్లో ప్రవేశపెట్టారు. ఉస్మానియా విశ్వవిద్యాలయం పరిధిలోని కళాశాలల్లోనే ఎక్కువగా ఈ కొత్త కోర్సులు ప్రవేశపెట్టాయి. ఈ కోర్సును బోధించేందుకు అవసరమైన అధ్యాపకులు హైదరాబాద్‌లో అందుబాటులో ఉండటం, నగరంలోని కళాశాలల్లో చదివేందుకు ఎక్కువ మంది విద్యార్థులు ఆసక్తి చూపుతుండటంతో ఓయూ పరిధిలోని కళాశాలలే ఎక్కువగా ఈ కోర్సులను ప్రవేశపెట్టేందుకు ముందుకు వచ్చాయని నిపుణులు చెబుతున్నారు. గత విద్యా సంవత్సరం దోస్త్‌ పరిధిలో 1,046 కళాశాలలు ఉండగా వాటిల్లో 4,12,805 సీట్లు ఉన్నాయి. కాగా 2.22 లక్షల సీట్లు మాత్రమే భర్తీ అయ్యాయి. ఈసారి కళాశాలల సంఖ్య 1059కి పెరిగింది. సీట్ల సంఖ్య కూడా 4.24 లక్షలకు చేరుకుంది.
1.41 లక్షల మంది రిజిస్ట్రేషన్‌..
సెప్టెంబ‌రు 6వరకు రాష్ట్రవ్యాప్తంగా 1,41,553 మంది రిజిస్ట్రేషన్‌ చేసుకున్నారు. అందులో 1.12 లక్షల మంది దరఖాస్తులు సమర్పించగా...వెబ్‌ ఆప్షన్లు ఇచ్చుకున్నది 83,526 మంది మాత్రమే. రిజిస్ట్రేషన్‌ చేసుకోవడానికి 7, దరఖాస్తుల సమర్పణ, వెబ్‌ ఆప్షన్లకు 8 తుది గడువు అని దోస్త్‌ కన్వీనర్‌ లింబాద్రి తెలిపారు. రిజిస్ట్రేషన్‌ చేసుకున్న విద్యార్థులందరూ వెబ్‌ ఆప్షన్లు ఇచ్చుకోవాలని ఆయన కోరారు. ఇప్పటివరకు రిజిస్ట్రేషన్‌ చేసుకున్న వారిలో 52.59 శాతం మంది మొబైల్‌ ద్వారానే ప్రక్రియ పూర్తి చేశారని తెలిపారు.
డిసెంబరు 15 నుంచి ‘రైల్వే’ పరీక్షలు
ఈనాడు, దిల్లీ: గతంలో ప్రకటించిన 1,40,640 ఖాళీల భర్తీకి డిసెంబరు 15వ తేదీ నుంచి కంప్యూటర్‌ ఆధారిత పరీక్షలు నిర్వహించనున్నట్లు రైల్వే శాఖ సెప్టెంబ‌రు 5న ఒక ప్రకటనలో తెలిపింది. గార్డులు, క్లర్కులు, కమర్షియల్‌ కర్కుల్లాంటి 35,208 నాన్‌ టెక్నికల్‌ పోస్టులు, 1,663 స్టెనో, టీచర్‌ పోస్టులు, 1,03,769 లెవెల్‌-1 (ట్రాక్‌ మెయింటెయినర్స్‌, పాయింట్స్‌మెన్‌) పోస్టుల భర్తీకి రైల్వే రిక్రూట్‌మెంట్‌ బోర్డు ఇప్పటికే ప్రకటన జారీచేసింది. 2.42 కోట్ల దరఖాస్తులు వచ్చాయి. పరీక్షలు కొవిడ్‌ కారణంగా వాయిదా పడ్డాయి. ఇప్పుడు జేఈఈ, నీట్‌ పరీక్షలు నిర్వహణకు చర్యలు తీసుకున్న నేపథ్యంలో ఈ పరీక్షలూ నిర్వహించడానికి రైల్వేశాఖ సిద్ధమైంది. ఇందులో తొలిదశ ఆన్‌లైన్‌ కంప్యూటర్‌ ఆధారిత పరీక్షను డిసెంబరు 15 నుంచి మొదలుపెట్టాలని నిర్ణయించి అందుకు తగ్గ ఏర్పాట్లు మొదలుపెట్టింది.
ఎల్‌పీసెట్‌ పరీక్ష 6కు వాయిదా
ఈనాడు, హైదరాబాద్‌: ఐటీఐ విద్యార్థులు పాలిటెక్నిక్‌ కోర్సుల్లో ప్రవేశాల కోసం నిర్వహించే ఎల్‌పీసెట్‌ను సెప్టెంబ‌రు 5 తేదీకి బదులు 6వ తేదీన జరుపుతామని కన్వీనర్‌ డాక్టర్‌ సి.శ్రీనాథ్‌ తెలిపారు. ఉదయం 11 గంటల నుంచి మధ్యాహ్నం ఒంటిగంట వరకు పేపర్‌-1, మధ్యాహ్నం 2.30 గంటల నుంచి సాయంత్రం 4.30 గంటల వరకు పేపర్‌-2 నిర్వహిస్తామన్నారు.
22 నుంచి సీబీఎస్‌ఈ 10, 12 సప్లిమెంటరీ పరీక్షలు
దిల్లీ: సీబీఎస్‌ఈ.. 10,12 తరగతి సప్లిమెంటరీ పరీక్షల తేదీలను సెప్టెంబ‌రు 4న‌ విడుదలచేసింది. ఈ పరీక్షలు..సెప్టెంబర్‌ 22 నుంచి 29 వరకు జరుగుతాయి. కొవిడ్‌-19 నేపథ్యంలో పరీక్షకు హాజరయ్యే విద్యార్థులు మాస్కులు ధరించాలి. చేతి శానిటైజర్లను సొంతంగా తీసుకురావాలి. ముక్కును, నోటిని మాస్క్‌ లేదా, గుడ్డతో కప్పుకోవాలి. ఈ మేరకు సీబీఎస్‌ఈ పరీక్షల నియంత్రణ అధికారి సన్యమ్‌ భరధ్వాజ్‌ ప్రకటన విడుదల చేశారు. అంతకుముందు కరోనా నేపథ్యంలో విద్యార్థుల ఆరోగ్యాన్ని దృష్టిలో ఉంచుకొని సప్లిమెంటరీ పరీక్షలు వాయిదా వేయాలంటూ వేసిన పిటిషన్‌ను సుప్రీంకోర్టులో సీబీఎస్‌ఈ తీవ్రంగా వ్యతిరేకించింది. అవసరమైన అన్ని సురక్షిత చర్యలు తీసుకుంటున్నామని కోర్టుకు తెలిపింది. కేసును కోర్టు సెప్టెంబర్‌ 10కి వాయిదా వేసింది.
జేఈఈ, నీట్‌ పై రివ్యూపిటిషన్‌ కొట్టివేత
* పరీక్షల నిర్వహణకే సుప్రీం మొగ్గు
దిల్లీ: ఇంజినీరింగ్‌, మెడికల్‌ కళాశాలల్లో ప్రవేశాల కోసం జాతీయ స్థాయిలో నిర్వహించే జేఈఈ, నీట్‌ పరీక్షల వాయిదా అంశాన్ని సుప్రీం కోర్టు మరోసారి తోసిపుచ్చింది. పరీక్షల విషయంలో గతంలో ఇచ్చిన తీర్పును పునఃసమీక్షించాలంటూ భాజపాయేతర పార్టీల పాలనలోని ఆరు రాష్ట్రాలు సుప్రీం కోర్టును ఆశ్రయించాయి. కరోనా వైరస్‌ నేపథ్యంలో విద్యార్థుల ఆరోగ్యాన్ని దృష్టిలో పెట్టుకుని ఈ అంశాన్ని పరిశీలించాలంటూ రివ్యూ పిటిషన్‌ దాఖలు చేశాయి. పిటిషన్‌ను తోసిపుచ్చుతూ పరీక్షల నిర్వహణకే సుప్రీం మొగ్గు చూపింది.
గతంలో 11 రాష్ట్రాలకు చెందిన 11 మంది విద్యార్థులు ఈ పరీక్షల వాయిదాను కోరుతూ సుప్రీంను ఆశ్రయించగా... పరీక్షలు నిర్వహించాల్సిందేనని సర్వోన్నత న్యాయస్థానం స్పష్టంచేసింది. పరీక్షలను వ్యతిరేకిస్తూ పిటిషన్‌ దాఖలు చేసిన వాటిలో మహారాష్ట్ర, బెంగాల్‌, పంజాబ్‌, రాజస్థాన్‌, ఝార్ఖండ్‌, ఛత్తీస్‌గఢ్‌, పుదుచ్ఛేరి రాష్ట్రాలు ఉన్నాయి. ఇప్పటికే జేఈఈ పరీక్షలు సెప్టెంబర్‌ 1 నుంచి ప్రారంభం కాగా.. నీట్ సెప్టెంబ‌రు 13న జరగనుంది.
12 నుంచి ఆన్‌లైన్‌లో సచివాలయ హాల్‌టికెట్లు
* 20 నుంచి రాతపరీక్షల నిర్వహణ
ఈనాడు డిజిటల్‌, అమరావతి: గ్రామ, వార్డు సచివాలయ ఉద్యోగాల రాతపరీక్షల హాల్‌టికెట్లను సెప్టెంబరు 12 నుంచి ఆన్‌లైన్‌లో అందుబాటులో ఉంచనున్నట్లు పంచాయతీరాజ్‌, గ్రామీణాభివృద్ధి శాఖ ఉన్నతాధికారులు పేర్కొన్నారు. 20 నుంచి రాతపరీక్షలు నిర్వహించనున్నట్లు తెలిపారు. పరీక్ష కేంద్రాల గుర్తింపు, ఓఎంఆర్‌ షీట్ల ముద్రణ పూర్తయిందన్నారు.
ఆన్‌లైన్‌లో తెలుగు వర్సిటీ దూరవిద్య తరగతులు
నారాయణగూడ, న్యూస్‌టుడే: పొట్టి శ్రీరాములు తెలుగు విశ్వవిద్యాలయం దూరవిద్యా కేంద్రం ద్వారా 2019-20 విద్యాసంవత్సరంలో వివిధ కోర్సుల్లో ప్రవేశాలు పొందిన విద్యార్థులకూ, ఇది వరకే ప్రవేశాలు పొందినవారికీ మే, జూన్‌ (2020) నెలల్లో కాంటాక్ట్‌ తరగతులను వర్సిటీ ఆవరణలో నిర్వహించాల్సి ఉంది. కొవిడ్‌ కారణంగా ఆ తరగతులను ఆన్‌లైన్‌ ద్వారా నిర్వహించాలని వర్సిటీ నిర్ణయించింది. విద్యార్థులు వెబ్‌సైట్‌ని సందర్శించి ఆన్‌లైన్‌ క్లాసుల వివరాలను అప్‌డేట్‌ చేసుకోవాలని వర్సిటీ దూరవిద్యా కేంద్రం ఇన్‌ఛార్జి డైరెక్టర్‌ ఆచార్య సి.మురళీకృష్ణ సూచించారు.
3వ తేదీ నుంచే టీఎస్‌ ఎంసెట్‌ హాల్‌టికెట్లు
* 102 కేంద్రాల్లో ప‌రీక్ష‌కు ఏర్పాట్లు
ఈనాడు, హైదరాబాద్‌: టీఎస్‌ ఎంసెట్‌-2020(ఇంజినీరింగ్‌) హాల్‌టికెట్లు సెప్టెంబ‌రు 3వ తేదీ నుంచి 7వ తేదీ వరకు డౌన్‌లోడ్‌ చేసుకునేందుకు రాష్ట్ర ప్రభుత్వం అవకాశం కల్పించింది. https://eamcet.tsche.ac.in నుంచి వీటిని పొందవచ్చని టీఎస్‌ ఎంసెట్‌ కన్వీనర్‌ డాక్టర్‌ ఎ.గోవర్ధన్‌ తెలిపారు. సెప్టెంబ‌రు 9, 10, 11, 14 తేదీల్లో ఆన్‌లైన్‌ పద్ధతిలో జేఎన్టీయూ-హెచ్‌ ఈ ప్రవేశ పరీక్షను నిర్వహిస్తోంది. 1,43,165 మంది విద్యార్థులు దరఖాస్తు చేసుకున్నారు. వీరు పరీక్ష రాసేందుకు తెలంగాణ, ఆంధ్రప్రదేశ్‌ రాష్ట్రాల్లోని 102 కేంద్రాల్లో ఏర్పాట్లు చేస్తున్నారు. కేటాయించిన పరీక్ష కేంద్రాలను అభ్యర్థులు ముందుగా వచ్చి చూసుకోవడం మేలని కన్వీనర్‌ సూచించారు. వెబ్‌సైట్‌లో నమూనా పరీక్షలు(మాక్‌టెస్టులు) అందుబాటులో ఉన్నట్లు ఆయన తెలిపారు.
‘బీఎస్‌సీ వ్యవసాయ’ సీట్ల రెట్టింపు
<* రెండు ప్రైవేటు విశ్వవిద్యాలయాల్లో కోర్సుకు అనుమతి
ఈనాడు, హైదరాబాద్‌: రాష్ట్రంలో నాలుగేళ్ల బీఎస్‌సీ వ్యవసాయ (అగ్రికల్చర్‌) సీట్లు ఒక్కసారిగా రెట్టింపు కానున్నాయి. గత విద్యా సంవత్సరం వరకు 500 సీట్లు ఉండగా.. ఈ ఏడాది మరో 500 వరకు అదనంగా రానున్నాయి. రెండు ప్రైవేటు విశ్వవిద్యాలయాల్లో ఈ కోర్సును ప్రవేశపెడుతుండటమే కారణం. హైదరాబాద్‌లోని మల్లారెడ్డి, వరంగల్‌లోని ఎస్‌ఆర్‌ విశ్వవిద్యాలయాల్లో ఈ కోర్సులు అందుబాటులోకి వస్తున్నాయి. మల్లారెడ్డి వర్సిటీలో ఈ ఏడాది 240 సీట్లకు ఇప్పటికే ప్రవేశాలు మొదలుపెట్టారు. ఎస్‌ఆర్‌ వర్సిటీలో 180 సీట్లకు ప్రవేశాలు ప్రారంభమయ్యాయి. విద్యార్థుల నుంచి వచ్చే డిమాండ్‌ను బట్టి మరో 120 సీట్లు పెంచుకునే ఆలోచనలో మల్లారెడ్డి వర్సిటీ ఉన్నట్లు తెలుస్తోంది. ఈ కోర్సును ప్రారంభించాలంటే 75 ఎకరాల స్థలం తప్పనిసరి. ఈ మేరకు స్థలం అందుబాటులో ఉన్నట్లు రెండు వర్సిటీలు ప్రభుత్వానికి దరఖాస్తు చేశాయని తెలిసింది. అయితే, అఖిల భారత వ్యవసాయ పరిశోధన మండలి(ఐకార్‌) అనుమతి లేకుండానే కోర్సులను ప్రారంభిస్తున్నారని.. దానివల్ల ఆ డిగ్రీ పట్టాలకు గుర్తింపు లేక విద్యార్థులు నష్టపోతారని కొందరు విద్యాశాఖ అధికారులకు ఫిర్యాదు చేసినట్లు సమాచారం. దీనిపై మల్లారెడ్డి వర్సిటీ ఉపకులపతి వీఎస్‌కే రెడ్డిని ‘ఈనాడు’ వివరణ కోరగా.. కోర్సును ప్రారంభించే ముందే ఐకార్‌ గుర్తింపు అవసరం లేదని, మూడో సంవత్సరంలోకి విద్యార్థులు ప్రవేశించిన తర్వాత ఆ గుర్తింపు కోసం దరఖాస్తు చేస్తామన్నారు.
ఏటా ఇతర రాష్ట్రాలకు 5 వేల మందికి పైనే..
రాష్ట్రంలో తక్కువ సీట్లు ఉండటంతో ఏటా కనీసం 5 వేల మంది మహారాష్ట్ర, కర్ణాటక, తమిళనాడు, రాజస్థాన్‌ తదితర రాష్ట్రాలకు వెళ్లి బీఎస్‌సీ అగ్రికల్చర్‌ కోర్సును అభ్యసిస్తున్నారు. తెలంగాణలో సాగు విస్తీర్ణం పెరుగుతున్న క్రమంలో వ్యవసాయ విద్యార్థుల అవసరం పెరుగుతోంది. దానికితోడు విత్తన, ఫెర్టిలైజర్‌ పరిశ్రమల్లోనూ నిపుణుల అవసరం ఎక్కువగా ఉన్నట్లు చెబుతున్నారు.
ఇప్పటి వరకు సీట్లు ఇవీ..
* జయశంకర్‌ వర్సిటీ పరిధిలోని వ్యవసాయ కళాశాలలు: రాజేంద్రనగర్, జగిత్యాల, అశ్వరావుపేట, పాలెం(మహబూబ్‌నగర్‌), వరంగల్, సిరిసిల్ల
* వాటిలో మొత్తం సీట్లు: 507 (ఇందులో 75 పేమెంట్‌ సీట్లు)
జేఎన్టీయూహెచ్‌ , జేఎన్టీయూకే ఫైనలియర్‌ పరీక్ష తేదీలు ఖరారు
< ఈనాడు, హైదరాబాద్‌:  ముందుగా నిర్ణయించినట్లు బీటెక్‌, బీఫార్మసీ, ఎంబీఏ చివరి సంవత్సరం చివరి సెమిస్టర్‌ పరీక్షలను సెప్టెంబ‌రు 16వ తేదీ నుంచి ప్రారంభిస్తున్నట్లు జేఎన్టీయూహెచ్‌ వెల్లడించింది. సెప్టెంబ‌రు 16, 18, 21, 23, 25 తేదీల్లో పరీక్షలు జరుగుతాయి. ఈ మేరకు ఆయా పరీక్షల కాలపట్టికను వెబ్‌సైట్లో ఉంచింది.
కాకినాడ (భానుగుడి సెంటర్‌), న్యూస్‌టుడే: జవహర్‌లాల్‌ నెహ్రూ సాంకేతిక విశ్వవిద్యాలయం కాకినాడ (జేఎన్టీయూకే) ఇంజినీరింగ్‌ ఆఖరి సంవత్సరం తుది సెమిస్టర్‌ పరీక్షల తేదీలు ఖరారు చేసినట్లు రెక్టార్‌ జీవీఆర్‌ ప్రసాద్‌రాజు సెప్టెంబ‌రు 1న తెలిపారు. సెప్టెంబ‌రు 13, 14, 15, 16, 19 తేదీల్లో పరీక్షలు నిర్వహించనున్నట్లు పేర్కొన్నారు. సెప్టెంబ‌రు 17, 18 తేదీల్లో ఏపీ ఎంసెట్‌ ఉన్నందున ఆ తేదీలను మినహాయించారు.
సెప్టెంబ‌రు 2న‌ పాలిసెట్‌
* నిమిషం నిబంధన అమలు
ఈనాడు, హైదరాబాద్‌: పాలిటెక్నిక్‌ డిప్లొమా కోర్సుల్లో ప్రవేశాల కోసం నిర్వహిస్తున్న తెలంగాణ పాలిసెట్‌ను సెప్టెంబ‌రు 2న‌ జరపనున్నారు. ఇందుకోసం రాష్ట్రవ్యాప్తంగా 50 నగరాలు, పట్టణాల్లో 285 పరీక్ష కేంద్రాలు ఏర్పాటు చేశారు. మొత్తం 73,918 మంది విద్యారులు దరఖాస్తు చేశారు. ఉదయం 11 గంటల నుంచి మధ్యాహ్నం 1.30 గంటల వరకు పరీక్ష జరగనుంది. విద్యార్థులను 10 గంటల నుంచే కేంద్రాల్లోకి అనుమతిస్తామని కన్వీనర్‌ శ్రీనాథ్‌ తెలిపారు. నిమిషం ఆలస్యంగా వచ్చినా అనుమతించేది లేదన్నారు. మాస్కు ధరించడంతో పాటు శానిటైజర్‌ బాటిల్‌ వెంట తెచ్చుకోవాలని విద్యార్థులకు ఆయన సూచించారు.
జేఈఈ మెయిన్‌లో సరికొత్త నిబంధనలు
* హాల్‌టికెట్‌ బయటికి తెస్తే అనర్హత వేటు
* పరీక్ష అయ్యాక అక్కడే చెత్త డబ్బాలో వేయాలి
* కరోనా నేపథ్యంలో సరికొత్త నిబంధన
ఈనాడు, హైదరాబాద్‌- దిల్లీ: జేఈఈ మెయిన్‌ పరీక్ష రాశాక హాల్‌టికెట్‌(అడ్మిట్‌ కార్డు)తోపాటు పరీక్షా కేంద్రంలో ఇచ్చిన తెల్ల చిత్తు కాగితాలను(రఫ్‌ షీట్లు) సిబ్బంది చూస్తుండగా చెత్త బుట్టలో వేయాలి. అలా చేయని విద్యార్థులు ఆ పరీక్ష రాయనట్లుగా పరిగణించి, వారిపై అనర్హత వేటు వేస్తారు. కరోనా పరిస్థితుల్లో దేశవ్యాప్తంగా సెప్టెంబ‌రు 1 నుంచి జరగనున్న జేఈఈ మెయిన్‌లో ఈ సరికొత్త నిబంధనలను జాతీయ పరీక్షల మండలి(ఎన్‌టీయే) అమలు చేస్తోంది. విద్యార్థులు పట్టుకున్న ఆ కాగితాలను ఇతరులు పట్టుకోకుండా ఉండేందుకు ఈ నిబంధన విధించారు. వెబ్‌సైట్‌ నుంచి డౌన్‌లోడ్‌ చేసుకునేదే కాబట్టి తర్వాత అవసరమైతే మరో హాల్‌టికెట్‌ తీసుకోవచ్చని చెబుతున్నారు.
      దేశవ్యాప్తంగా రోజుకు రెండు విడతల్లో.. ఉదయం 9-12 గంటలు, మధ్యాహ్నం 3-6 గంటల వరకు ఆన్‌లైన్‌ పరీక్ష జరుగుతుంది. మొదటి రోజు మంగళవారం బీఆర్క్‌, బీ ప్లానింగ్‌ కోర్సుల్లో ప్రవేశాలకు పేపర్‌-2 పరీక్ష జరుగుతుంది. దీనికి లక్ష మంది వరకు హాజరవుతారని అంచనా. బీఆర్క్‌, బీ ప్లానింగ్‌ రెండూ రాసే వారికి డ్రాయింగ్‌, ప్లానింగ్‌ విభాగాల ప్రశ్నలను రాయాల్సి ఉండటంతో మధ్యాహ్నం 3 గంటల నుంచి 6.30 గంటల వరకు సమయం ఇస్తారు. సెప్టెంబరు 2 నుంచి 6వ తేదీ వరకు బీఈ/బీటెక్‌లో చేరేందుకు పేపర్‌-1 పరీక్ష నిర్వహిస్తారు.
విద్యార్థులు పరీక్ష కేంద్రంలోకి ప్రవేశించాక.. తాము అందించే మాస్కులనే ఉపయోగించాలని ఎన్‌టీయే అధికారులు తెలిపారు. పరీక్ష కేంద్రాల్లో, ప్రవేశ ద్వారాల వద్ద శానిటైజర్లను అందుబాటులో ఉంచుతామని వెల్లడించారు.
ఉచిత వాహన సౌకర్యం: జీహెచ్‌ఎంసీ పరిధిలో జేఈఈ మెయిన్‌కు హాజరయ్యే విద్యార్థులకు టీమ్‌ సాయి టాస్క్‌ఫోర్స్‌ తరఫున ఉచితంగా వాహన సౌకర్యం కల్పిస్తామని బీజేవైఎం రాష్ట్ర మాజీ ఉపాధ్యక్షుడు సాయిప్రసాద్‌ ఒక ప్రకటనలో తెలిపారు. వాహన సౌకర్యం అవసరమైనవారు 88975 71494, 83744 14365, 85558 38979 నంబర్లలో సంప్రదించాలన్నారు.
తెలంగాణలో పరీక్షలు జరిగే నగరాలు: హైదరాబాద్‌, కరీంనగర్‌, వరంగల్‌, ఖమ్మం, నల్గొండ, మహబూబ్‌నగర్‌.
మొత్తం కేంద్రాలు: 27
హాజరయ్యే విద్యార్థుల సంఖ్య: 67,319
సెప్టెంబరు 1నుంచి జేఈఈ మెయిన్స్‌
* కొవిడ్‌ నేపథ్యంలో పరీక్షా కేంద్రాల్లో జాగ్రత్తలు
* విద్యార్థులకు అండగా నిలవాలని రాష్ట్రాలకు కేంద్రం విజ్ఞప్తి
దిల్లీ:ఇంజినీరింగ్‌ ప్రవేశ పరీక్ష జేఈఈ మెయిన్స్‌ను సెప్టెంబ‌రు 1నుంచి నిర్వహించేందుకు ‘నేషనల్‌ టెస్టింగ్‌ ఏజెన్సీ (ఎన్‌టీయే)’ సన్నద్ధమైంది. దేశవ్యాప్తంగా కరోనా ఉద్ధృతి కొనసాగుతున్న నేపథ్యంలో పరీక్ష కేంద్రాలన్నింటిలో విద్యార్థులు భౌతిక దూరం వంటి ప్రమాణాలను పాటించేలా ఏర్పాట్లు చేసింది. మరోవైపు- కొవిడ్‌ భయపెడుతున్న వేళ కఠిన పరిస్థితుల్లో ఈ పరీక్షకు హాజరవబోతున్న విద్యార్థులకు అండగా నిలవాలని అన్ని రాష్ట్రాలకు కేంద్ర ప్రభుత్వం విజ్ఞప్తి చేసింది. అభ్యర్థులకు తాము రవాణా సదుపాయం కల్పిస్తామని ఒడిశా, మధ్యప్రదేశ్, ఛత్తీస్‌గఢ్‌ ప్రభుత్వాలు ఇప్పటికే ప్రకటించాయి. ఐఐటీలు, ఎన్‌ఐటీలు, కేంద్ర ప్రభుత్వ నిధులతో నడిచే సాంకేతిక విద్యాసంస్థలు (సీఎఫ్‌టీఐ)ల్లో ప్రవేశానికి ఉద్దేశించిన జేఈఈ మెయిన్స్‌ను వాస్తవానికి ఈ ఏడాది ఏప్రిల్‌ 7-11 తేదీల మధ్య నిర్వహించాలని తొలుత నిర్ణయించారు. కరోనా ముప్పు నేపథ్యంలో అది వాయిదా పడుతూ వచ్చింది. ఎట్టకేలకు సెప్టెంబ‌రు 1నుంచి 6 వరకు ఈ పరీక్షను షిఫ్టులవారీగా నిర్వహించనున్నారు. 8.58 లక్షల మంది అభ్యర్థులు ఇందుకోసం రిజిస్టర్‌ చేసుకున్నారు. కరోనా ముప్పు పొంచి ఉండటంతో ఎన్‌టీయే ఈ దఫా పరీక్ష కేంద్రాల సంఖ్యను పెంచింది. విద్యార్థులు దూరం దూరంగా కూర్చునేలా ఏర్పాట్లు చేసింది. ప్రతి పరీక్ష షిఫ్ట్‌ ప్రారంభమయ్యేముందు, ముగిశాక అన్ని సీట్లను శానిటైజ్‌ చేయనున్నట్లు ఎన్‌టీయే అధికారులు తెలిపారు. కీబోర్డులనూ శుభ్రం చేస్తామని చెప్పారు.
మాస్కులిస్తారు
విద్యార్థులు పరీక్ష కేంద్రంలోకి ప్రవేశించాక.. తాము అందించే మాస్కులనే ఉపయోగించాల్సి ఉంటుందని ఎన్‌టీయే అధికారులు తెలిపారు. పరీక్షల్లో అవకతవకలను నివారించేందుకే ఈ ఏర్పాటు చేసినట్లు చెప్పారు. పరీక్ష కేంద్రాల్లో, ప్రవేశ ద్వారాల వద్ద శానిటైజర్లను అందుబాటులో ఉంచుతామని వెల్లడించారు. కొవిడ్‌ ఉద్ధృతి నేపథ్యంలో జేఈఈ మెయిన్స్‌తోపాటు నీట్‌ను వాయిదా వేయాలని ఇటీవల బలమైన డిమాండ్లు వినిపించిన సంగతి తెలిసిందే. నీట్‌ను సెప్టెంబ‌రు 13న నిర్వహించనున్న సంగతి గమనార్హం.
శోధిస్తారు.. సాధిస్తారు!
* భూగర్భశాస్త్రంలో భలే కెరియర్‌
* విభిన్న రకాల కోర్సులు
బంగారం ఎక్కడ దొరుకుతుంది? విలువైన నిక్షేపాల కోసం ఏ ప్రాంతంలో అన్వేషించవచ్చు? సముద్రంలో చేపలవేట ఎక్కడ బాగుంటుంది? భూకంపాలను ముందుగానే పసిగట్టడం ఎలా? డైనోసార్లు ఎందుకు అంతరించిపోయాయి?... ఇలా ఎన్నో ప్రశ్నలకు భూగర్భశాస్త్రం సవివరంగా సమాధానాలు అందించగలదు. నింగీ, నీరూ, నేలల గురించి లోతుగా తెలుసుకోవాలనుకునేవారికి సరైన మార్గం చూపగలదు.
   అన్వేషణపై ఆసక్తి, శోధించాలనే తపన ఉన్నవారు భూగర్భశాస్తాన్న్రి అస్త్రంగా ఉపయోగించుకోవచ్చు. జియాలజిస్టులుగా సుస్థిర కెరియర్‌ను సొంతం చేసుకోవచ్చు. ప్రభుత్వ శాఖలు, అనుబంధ విభాగాలు, ప్రైవేటు సంస్థలు... అన్ని చోట్లా వీరికి ఉద్యోగాలు లభిస్తున్నాయి. విదేశాల్లో రాణించడానికీ అవకాశాలు ఉన్నాయి!
   భూగర్భశాస్త్రంపై ఆసక్తి ఉన్నవారు యూజీ డిగ్రీ నుంచి దీన్ని ఒక సబ్జెక్టుగా చదువుకోవచ్చు. ఇంటర్‌ సైన్సు విద్యార్థులు జియాలజీ కోర్సుల్లో చేరవచ్చు. తెలుగు రాష్ట్రాల్లో ఎక్కువగా ప్రభుత్వ డిగ్రీ కళాశాలల్లో ఈ కోర్సు అందుబాటులో ఉంది. కొన్ని కేంద్రీయ విద్యా సంస్థలు ఇంటిగ్రేటెడ్‌ ఎమ్మెస్సీ జియాలజీ కోర్సును అయిదేళ్ల వ్యవధితో ఇంటర్‌ పూర్తిచేసుకున్నవారికోసం అందిస్తున్నాయి. డిగ్రీ అనంతరం విశ్వవిద్యాలయాల్లో పీజీ కోర్సుల్లో చేరవచ్చు. పీజీలో కోరుకున్న స్పెషలైజేషన్‌ తీసుకోవచ్చు. జియాలజీతోపాటు అప్లైడ్‌ జియాలజీ, హైడ్రో జియాలజీ, మెరైన్‌ జియాలజీ...ఇలా నచ్చిన కోర్సులో చేరవచ్చు. ఎంటెక్‌లోనూ అప్లైడ్‌ జియాలజీ, మెరైన్‌ జియాలజీ కోర్సులను కొన్ని ఐఐటీలతోపాటు చాలా సంస్థలు అందిస్తున్నాయి. పీజీ తర్వాత పీహెచ్‌డీ చేస్తే ఈ విభాగంలో మరింతగా రాణించవచ్చు.
   ఈ కోర్సుల్లో చేరినవారు పర్వతాలు ఎలా ఏర్పడ్డాయి, వాటిలో రకాలు, ఖనిజ లవణాలు అంటే ఏమిటి, వాటిని గ్రహించే విధానం, భూమి లోపలి పొరలు, సముద్ర గర్భంలోని విశేషాలు.. మొదలైనవి తెలుసుకుంటారు. క్షేత్ర పర్యటనలు, సేకరించిన నమూనాను ప్రయోగశాలలో పరిశీలించడం, భూమిలోపల ఫలకాల పరిస్థితి, భూకంపాలకు కారణం, వాటిని ముందుగా గుర్తించే విధానం, విపత్తుల సమయంలో చురుగ్గా వ్యవహరించడం...ఇవన్నీ సిలబస్‌లో భాగమే. పై తరగతులకు వెళ్లేకొద్దీ ఎంచుకున్న అంశాలపై లోతైన అధ్యయనం ఉంటుంది. నేల, నీరు, నింగిల గురించి తెలుసుకుని వాటిద్వారా ప్రయోజనం పొందడం, వాటిని పరిరక్షించే చర్యలు జియాలజిస్టుల కర్తవ్యం.
ఏ హోదాలు?
చదువుకున్న కోర్సు (స్పెషలైజేషన్‌), చేరిన కంపెనీ, చేస్తోన్న ఉద్యోగం ఆధారంగా హోదాలు కేటాయిస్తారు.
మెరైన్‌ జియాలజిస్టులు: సముద్ర వాతావరణాన్ని అధ్యయనం చేస్తారు. రిమోట్‌ సెన్సర్ల ద్వారా అందులోని పురాతన శిలాజాలు, మొక్కలను అన్వేషిస్తారు. వాటి ప్రభావం సముద్రం, పర్యావరణంపై ఏ విధంగా ఉంటుందో అంచనా వేస్తారు.
పెట్రోలజిస్టులు: చమురు, గ్యాస్‌ నిక్షేపాలు ఇంకా ఎక్కడున్నాయో తెలుసుకోవడానికి పరిశోధన చేస్తారు. ఈ పరిశోధనలు సముద్రం లోపల, బయట నుంచి కొనసాగుతాయి. నిక్షేపాలు ఎక్కడైనా గుర్తిస్తే తవ్వకాలు మొదలుపెట్టడానికి ముందే భూ భౌతిక సర్వే చేస్తారు. భూకంపాలకు అవకాశం ఉందా అనేదీ పరిశీలిస్తారు.
మినరాలజిస్టులు: రాళ్లలోని ఖనిజాలపై పరిశోధిస్తారు. సముద్రగర్భ విశేషాలు తెలుసుకుంటారు.
జియోహైడ్రాలజిస్టులు: నీటి వనరుల కోసం అన్వేషిస్తారు. లభ్యం కావడానికి అవకాశం ఉన్న చోట్ల ప్రయోగాలు నిర్వహిస్తారు. అలాగే ఆ జలం కాలుష్య కారకాలపై అంచనా వేస్తారు.
పాలియాంటాలజిస్టులు: శిలాజాల గురించి తెలుసుకుంటారు. చనిపోయిన జీవులు, మొక్కలపై అధ్యయనం చేస్తారు. వాటి వయసును నిర్ధారిస్తారు. అవి ఎలా ఆవిర్భవించాయి, ఆ సమయంలో భూమండలం ఎలా ఉండేది, వాటి అంతానికి కారణం .. మొదలైనవి అంచనా వేస్తారు.
సిస్మాలజిస్టులు: భూకంపానికి కారణమైన భూమిలోపల ఉన్న ఫలకాలపై అధ్యయనం చేస్తారు. వాటి కదలికలను పసిగడతారు. ప్రమాదాన్ని గుర్తించి హెచ్చరికలు జారీ చేస్తారు. భూకంప శాస్త్రవేత్తలగా సేవలు అందించేది వీరే..
సర్వేయర్లు: భూమి, సముద్రం... వీటి సమాచారం సేకరించి వివరాలు భద్రపరుస్తారు. గత డేటాను వర్తమాన సమాచారంతో పోలుస్తారు. డేటాలో మార్పులపై అధ్యయనం చేస్తారు.
విధులు ఇలా...
జియాలజిస్టులు క్షేత్రంలో సేకరించిన నమూనాలను ప్రయోగశాలలో పరీక్షిస్తారు. వృత్తిలో భాగంగా మారుమూల ప్రాంతాలకు వెళ్లాల్సి వస్తుంది. అభ్యర్థి ఎంచుకున్న విభాగం, చేరిన సంస్థను అనుసరించి పని ఆధారపడి ఉంటుంది. చమురు కంపెనీల్లో ముఖ్యంగా నూనెలు అన్వేషించిన చోట సముద్రం మధ్యలో పనిచేయాల్సి వస్తుంది. ఆటుపోట్లకు సిద్ధంగా ఉండాలి. ప్రకృతి విపత్తుల నుంచి రక్షణలోనూ వీరి సేవలు కీలకం. విధుల్లో భాగంగా పర్వతాల అంచులకు, సముద్ర గర్భంలోకీ వెళ్లాల్సి రావచ్చు. క్షేత్రంతో అనుసంధానమైన విభాగం కాబట్టి ఫీల్డ్‌ వర్క్‌కి సిద్ధంగా ఉండాలి.
ప్రముఖ విద్యాసంస్థలు
* దిల్లీ యూనివర్సిటీ, అన్నా యూనివర్సిటీ, జాదవ్‌పూర్‌ యూనివర్సిటీ, మద్రాస్‌ యూనివర్సిటీ, మహాత్మా గాంధీ యూనివర్సిటీ, కొచ్చిన్‌ యూనివర్సిటీ ఆఫ్‌ సైన్స్‌ అండ్‌ టెక్నాలజీ, పంజాబ్‌ యూనివర్సిటీ, బెనారస్‌ హిందూ వర్సిటీ.
* ఐఐటీల్లో: ఐఐటీ బాంబే, ఐఐటీ ధన్‌బాద్‌ (ఐఎస్‌ఎం), ఐఐటీ రూర్కీలు ఎమ్మెస్సీ అప్లైడ్‌ జియాలజీ కోర్సు అందిస్తున్నాయి. ఐఐటీ ఖరగ్‌పూర్, ఐఐటీ భువనేశ్వర్‌లో ఎమ్మెస్సీ జియాలజీ కోర్సు ఉంది. వీటిలో ప్రవేశం జాయింట్‌ అడ్మిషన్‌ టెస్టు ఫర్‌ ఎమ్మెస్సీ (జామ్‌)తో లభిస్తోంది. నేషనల్‌ జియో ఫిజికల్‌ రిసెర్చ్‌ ఇన్‌స్టిట్యూట్, వాడియా ఇన్‌స్టిట్యూట్‌ ఆఫ్‌ హిమాలయన్‌ జియాలజీ..మొదలైనవి పరిశోధనాత్మక కోర్సులు అందిస్తున్నాయి.
* హైదరాబాద్‌ కేంద్రీయ విశ్వవిద్యాలయం అయిదేళ్ల వ్యవధితో ఇంటిగ్రేటెడ్‌ ఎమ్మెస్సీ అప్లయిడ్‌ జియాలజీ అందిస్తోంది. ఇంటర్‌ సైన్స్‌ విద్యార్థులు దరఖాస్తు చేసుకోవచ్చు.
* తెలుగు రాష్ట్రాల్లో: ఆంధ్రా, ఉస్మానియా, శ్రీవెంకటేశ్వర, ఆచార్య నాగార్జున, కాకతీయ వర్సిటీలు జియాలజీ పీజీ కోర్సులు అందిస్తున్నాయి.
ఉద్యోగాలెన్నో...
ప్రభుత్వ, ప్రైవేటు, పరిశోధన, బోధన రంగాల్లో వివిధ ఉద్యోగాలు జియాలజీ చదివినవారికోసం అందుబాటులో ఉన్నాయి.
యూపీఎస్సీ: ఏటా కంబైన్డ్‌ జియో సైంటిస్ట్‌ పరీక్షను నిర్వహిస్తోంది. ఈ సర్వీస్‌ ద్వారా ఎంపికైనవారు జియలాజికల్‌ సర్వే ఆఫ్‌ ఇండియా (జీఎస్‌ఐ), మినిస్ట్రీ ఆఫ్‌ మైన్స్, సెంట్రల్‌ గ్రౌండ్‌ వాటర్‌ బోర్డు, మినిస్ట్రీ ఆఫ్‌ వాటర్‌ రిసోర్సెస్‌... తదితర సంస్థల్లో గ్రూప్‌- ఎ ఆఫీసర్‌ హోదాతో సేవలు అందించవచ్చు. జియాలజీ లేదా అనుబంధ విభాగాల్లో పీజీ పూర్తిచేసుకున్నవారు ఈ పరీక్షకు దరఖాస్తు చేసుకోవచ్చు. రాత పరీక్ష, ఇంటర్వ్యూల్లో చూపిన ప్రతిభతో అభ్యర్థులను ఎంపిక చేస్తారు.
పీఎస్‌యూల్లో: ఆయిల్‌ అండ్‌ నేచురల్‌ గ్యాస్‌ కార్పొరేషన్‌ లిమిటెడ్‌ (ఓఎన్‌జీసీ), నేషనల్‌ హైడ్రో పవర్‌ కార్పొరేషన్‌ (ఎన్‌హెచ్‌పీసీ), నేషనల్‌ థర్మల్‌ పవర్‌ కార్పొరేషన్‌ (ఎన్టీపీసీ), మినరల్స్‌ అండ్‌ మెటల్స్‌ ట్రేడింగ్‌ కార్పొరేషన్‌ (ఎంఎంటీసీ), నేషనల్‌ రిమోట్‌ సెన్సింగ్‌ ఏజెన్సీ (ఎన్‌ఆర్‌ఎస్‌ఏ), స్టేట్‌ మైనింగ్‌ కార్పొరేషన్‌ (ఎస్‌ఎంసీ), నేషనల్‌ మినరల్‌ డెవలప్‌మెంట్‌ కార్పొరేషన్‌ (ఎన్‌ఎండీసీ), నేషనల్‌ అల్యూమినియం కంపెనీ (నాల్కో), హిందూస్థాన్‌ జింక్‌ లిమిటెడ్‌ (హెచ్‌జడ్‌ఎల్‌), భారత్‌ పెట్రోలియం కార్పొరేషన్‌ లిమిటెడ్‌ (బీపీసీఎల్‌), థెరీ హైడ్రో డెవలప్‌మెంట్‌ కార్పొరేషన్‌ (టీహెచ్‌డీసీ), మినరల్‌ ఎక్స్‌ప్లోరేషన్‌ అథారిటీ.. మొదలైన వాటిలో దాదాపు ఏటా ఉద్యోగాలను భర్తీ చేస్తున్నారు. ఎక్కువ సంస్థలు గేట్‌ స్కోర్‌తో అవకాశం కల్పిస్తున్నాయి. కొన్నిసార్లు ప్రత్యేక ప్రకటన విడుదల చేసి పోస్టులు భర్తీ చేస్తాయి. ఎమ్మెస్సీ జియాలజీ లేదా ఎంటెక్‌ జియాలజీ కోర్సులు చదివినవారు ఈ పోస్టులకు అర్హులు. ఇవన్నీ మహారత్న, నవరత్న, మినీరత్న సంస్థలు. వీటిలో అవకాశం వచ్చినవారికి రూ.6 నుంచి రూ.12 లక్షలు, ఆ పైన వార్షిక వేతనం లభిస్తుంది.
ప్రత్యేక సంస్థల్లో: డైరెక్టరేట్‌ ఆఫ్‌ జియాలజీ అండ్‌ మైనింగ్‌ (డీజీఎం), ఇండియన్‌ బ్యూరో ఆఫ్‌ మైన్స్‌ (ఐబీఎం), డిఫెన్స్‌ రిసెర్చ్‌ అండ్‌ డెవలప్‌మెంట్‌ ఆర్గనైజేషన్‌ (డీఆర్‌డీవో), ఇండియన్‌ స్పేస్‌ రిసెర్చ్‌ ఆర్గనైజేషన్‌ (ఇస్రో), నేషనల్‌ జియో ఫిజికల్‌ రిసెర్చ్‌ ఇన్‌స్టిట్యూట్‌ (ఎన్‌జీఆర్‌ఐ)- హైదరాబాద్, వాడియా ఇన్‌స్టిట్యూట్‌ ఆఫ్‌ హిమాలయన్‌ జియాలజీ, భాభా అటామిక్‌ రిసెర్చ్‌ సెంటర్‌ (బార్క్‌), నేషనల్‌ అంటార్కిటికా రిసెర్చ్‌ సెంటర్‌- గోవా, నేషనల్‌ రిమోట్‌ సెన్సింగ్‌ సెంటర్‌ (ఎన్‌ఆర్‌ఎస్సీ)-హైదరాబాద్, స్పేస్‌ అప్లికేషన్‌ సెంటర్‌ (ఎస్‌ఏసీ)- అహ్మదాబాద్, ఇండియన్‌ ఇన్‌స్టిట్యూట్‌ ఆప్‌ రిమోట్‌ సెన్సింగ్‌ (ఐఐఆర్‌ఎస్‌)- దెహ్రాదూన్, అటామిక్‌ మినరల్‌ డెవలప్‌మెంట్‌ కార్పొరేషన్, యురేనియం కార్పొరేషన్‌ ఆఫ్‌ ఇండియా..
మొదలైన ప్రభుత్వ ఆధ్వర్యంలోని సంస్థల్లో మేటి కొలువులు జియాలజీ చదివిన వారికి లభిస్తున్నాయి. యూపీఎస్సీ లేదా ఆయా సంస్థలు విడుదల చేసిన ప్రకటనల ద్వారా వీటిలో ఖాళీలు భర్తీ చేస్తున్నారు. డిఫెన్స్, పారామిలటరీల్లోనూ జియాలజిస్టులు సేవలు అందిస్తున్నారు. రాష్ట్ర స్థాయిలోనూ గనుల శాఖ, భూగర్భ జలాల విభాగాల్లో అవకాశాలు ఉంటాయి.
ప్రైవేటు సంస్థల్లో: బ్రోకెన్‌ హిల్, రియో టినాట్, డిబీర్స్, కెయిర్న్, రిలయన్స్‌ ఎనర్జీ, షెల్, ఎస్సార్‌ ఆయిల్‌.. తదితర ప్రైవేటు సంస్థల్లోనూ జియాలజిస్టుల నియామకాలు జరుగుతున్నాయి. ఇవన్నీ పెద్ద మొత్తంలో వేతనాలు చెల్లిస్తున్నాయి. పెట్రోలియం పరిశ్రమలో ఎక్కువ అవకాశాలుంటాయి. భారత్‌లో గనుల సంస్థల్లో పెద్దఎత్తున తవ్వకాలు జరుగుతున్నాయి. ఈ పరిణామాలు తాజా గ్రాడ్యుయేట్లకు ఎంతో మేలు చేస్తున్నాయి. మినరల్, హైడ్రోలాజికల్, రిమోట్‌ సెన్సింగ్, జీఐఎస్, జీపీఎస్‌... మొదలైన విభాగాల్లో కన్సల్టెన్సీ సేవలకు అవకాశం ఉంది. ఇందుకోసం పని అనుభవం, నైపుణ్యాలు తప్పనిసరి.
విదేశాల్లో: అమెరికా, ఆస్ట్రేలియా, కెనడాల్లోనే కాకుండా అభివృద్ధి చెందుతోన్న దేశాల్లో జియాలజిస్టుల సేవలు కీలకమయ్యాయి. ఇండోనేసియా, మలేసియా, సౌదీ అరేబియా, యూఏఈ, కువైట్, వియత్నాం, థాయ్‌లాండ్, అప్ఘానిస్తాన్, బంగ్లాదేశ్‌...మొదలైన దేశాల్లో రహదారులు, విమానాశ్రయాలు, డ్యామ్‌లు, పైపులైన్లు నిర్మాణానికి జియాలజిస్టుల అవసరం ఉంది. మధ్యప్రాచ్యంలో చమురు అన్వేషణ జియాలజిస్టులకు వరంగా మారింది.
కావాల్సిన నైపుణ్యాలు
* అన్వేషణపై ఆసక్తి
* పరిశోధనపై మక్కువ
* పరిశీలన దృక్పథం
* శాస్త్రీయంగా ఆలోచించడం
* ఏ వాతావరణంలోనైనా ఇమడగలగడం
* కొత్త విషయాలు తెలుసుకునే తపన
* ప్రయాణాలకు సంసిద్ధత
టీఎస్‌ ఈసెట్‌కు ఏర్పాట్లు పూర్తి
* నిమిషం ఆలస్యమైనా అనుమతించరు
ఈనాడు, హైదరాబాద్‌: టీఎస్‌-ఈసెట్‌కు అన్ని ఏర్పాట్లు పూర్తయ్యాయి. కరోనా కష్టకాలం మొదలయ్యాక జరగనున్న తొలి ప్రవేశ పరీక్ష కావడంతో సర్వత్రా ఆసక్తి నెలకొంది. ఆగ‌స్టు 31న ఉదయం 9-12 గంటల వరకు తొలి విడత, మధ్యాహ్నం 3-6 గంటల వరకు రెండు విడతగా ఆన్‌లైన్‌ పద్ధతిలో పరీక్ష నిర్వహించనున్నారు. తెలంగాణ, ఆంధ్రప్రదేశ్‌లలో 56 కేంద్రాలు ఏర్పాటు చేశారు. నిమిషం ఆలస్యమైనా లోపలకు ప్రవేశం ఉండదని ప్రభుత్వం స్పష్టం చేసింది. కొవిడ్‌ నిబంధనలు పాటిస్తూ తెలంగాణ రాష్ట్ర ఉన్నత విద్యామండలి ఆదేశాల మేరకు జేఎన్‌టీయూ తరఫున నిర్వహిస్తున్నట్లు వర్సిటీ రిజిస్ట్రార్‌, ఈసెట్‌ కన్వీనర్‌ డాక్టర్‌ మంజూర్‌ హుస్సేన్‌ తెలిపారు. 26,700 మందికి పైగా విద్యార్థులు కొత్త హాల్‌ టికెట్లు డౌన్‌లోడ్‌ చేసుకున్నారని పేర్కొన్నారు. 59 మంది పరిశీలకులు, 9 మంది ప్రత్యేక పరిశీలకులను నియమించామని చెప్పారు. ఒకరోజు ముందే విద్యార్థులు తమ పరీక్ష కేంద్రాలను పరిశీలించుకోవాలని సూచించారు. సెట్‌ రాయనున్న విద్యార్థులు నాణ్యమైన మాస్కు, శానిటైజర్‌ తెచ్చుకోవాలని, గుంపులుగా ఉండరాదని స్పష్టం చేశారు. చేతి గడియారాలు, ఎలక్ట్రానిక్‌ పరికరాలు అనుమతించబోమన్నారు.
ఈసెట్‌కు దరఖాస్తు
* చేసుకున్న విద్యార్థులు: 28,015
* తొలి విడతలో పరీక్ష రాసేవారు: 14,415
* రెండో విడతలో రాసేవారు: 13600
వైద్య విద్యలో పీజీ డిప్లొమా కోర్సుల పునరుద్ధరణ
దిల్లీ: దేశంలో వైద్య విద్యను మరింతగా అందుబాటులోకి తెచ్చేలా కేంద్ర ప్రభుత్వం చర్యలు చేపట్టింది. పీజీ డిప్లొమా కోర్సుల పునరుద్ధరణకు వీలు కల్పిస్తూ నిర్ణయం వెలువరించింది. ఎంబీబీఎస్‌ అనంతరం నీట్‌-పీజీ పరీక్షలో అర్హత సాధించిన అభ్యర్థులు ఇకపై పోస్ట్‌ గ్రాడ్యుయేట్‌ డిప్లొమా కోర్సులను చేయవచ్చు. పీజీ డిప్లొమా కోర్సుల నిర్వహణకు అవసరమైన గుర్తింపు (అక్రెడిటేషన్‌) కోసం కనీసం 100 పడకలున్న ఆసుపత్రులు ‘జాతీయ పరీక్షల బోర్డు (ఎన్‌బీఏ)’కు దరఖాస్తు చేసుకోవచ్చని ఆ సంస్థ‌ అధికారులు పేర్కొన్నారు. అనెస్తీషియాలజీ, అబ్‌స్టెట్రిక్స్‌-గైనకాలజీ, పీడియాట్రిక్స్, ఫ్యామిలీ మెడిసిన్, ఆఫ్తామాలజీ, రేడియో డయాగ్నోసిస్, ఈఎన్‌టీ-ట్యూబర్‌క్యులోసిస్, చెస్ట్‌ డిసీజ్‌ వంటి 8 వైద్య విభాగాల్లో పీజీ డిప్లొమా కోర్సులను ఎన్‌బీఏ ప్రారంభించింది. అయితే దేశంలో వైద్య విద్యలో బోధనా సిబ్బందికి ఉన్న కొరతను దృష్టిలో ఉంచుకొని ‘భారత వైద్య మండలి(ఎంసీఐ)’ 2019లో పీజీ డిప్లొమా కోర్సులను డిగ్రీ కోర్సులుగా మార్చిన విషయం తెలిసిందే. ఇదిలా ఉండగా జిల్లా స్థాయిలో నైపుణ్యం కలిగిన వైద్య సిబ్బంది కొరత తీర్చేందుకు డిప్లొమా కోర్సులు దోహదం చేస్తాయని ఎన్‌బీఏ కార్యనిర్వాహక సంచాలకులు ప్రొఫెసర్‌ పవనీంద్ర లాల్‌ పేర్కొన్నారు. ప్రభుత్వ, జిల్లా ఆసుపత్రుల్లో డిప్లొమా కోర్సుల నిర్వహణకు ఎన్‌బీఏ అధిక ప్రాధాన్యం ఇస్తుందని లాల్‌ తెలిపారు. వైద్య సిబ్బంది విషయంలో రాష్ట్రాల అవసరాలను దృష్టిలో ఉంచుకొని, డిప్లొమా కోర్సుల్లో 50 సీట్లను జిల్లా ఆసుపత్రుల్లో వైద్య సేవలందిస్తున్న (ఇన్‌ సర్వీస్‌) అభ్యర్థుల‌కు రిజర్వు చేశామని వివరించారు. ఈ నిర్ణయంతో టైర్‌-1 నగరాలపై వైద్య సేవల విషయంలో ఒత్తిడి తగ్గుతుందని చెప్పారు.
15 నుంచి చివరి సెమిస్టర్‌ పరీక్షలు!
* జేఎన్‌టీయూహెచ్‌ మాత్రం 16-25 వరకు నిర్వహణ
ఈనాడు, హైదరాబాద్‌: యూజీ, పీజీ చివరి సెమిస్టర్‌ పరీక్షల నిర్వహణకు సుప్రీంకోర్టు పచ్చజెండా ఊపడంతో రాష్ట్రంలోని విశ్వవిద్యాలయాలు పరీక్షల ఏర్పాట్లపై సన్నద్ధమవుతున్నాయి. సెప్టెంబరు 15వ తేదీ నుంచి పరీక్షలను జరిపేందుకు వర్సిటీ అధికారులు సిద్ధమయ్యారు. రాష్ట్ర వ్యాప్తంగా సుమారు 3 లక్షల మంది పరీక్షలు రాయాల్సి ఉంది. న్యాయస్థానం తీర్పు నేపథ్యంలో తెలంగాణ రాష్ట్ర ఉన్నత విద్యామండలి ఛైర్మన్‌ తుమ్మల పాపిరెడ్డి ఆగ‌స్టు 28న‌ విశ్వవిద్యాలయాల రిజిస్ట్రార్లతో వెబినార్‌ నిర్వహించారు. సెప్టెంబరు 15 నుంచి పరీక్షలను ప్రారంభించేందుకు సిద్ధంగా ఉన్నామని కొందరు రిజిస్ట్రార్లు తెలిపారు. అందరూ ఒకేసారి పరీక్షలను ప్రారంభిస్తే బాగుంటుందని ఛైర్మన్‌ సూచించినట్లు తెలిసింది. జేఎన్‌టీయూహెచ్‌ మాత్రం సెప్టెంబరు 16 నుంచి 25 వరకు జరిపేందుకు ఇప్పటికే నిర్ణయం తీసుకుంది. విద్యార్థులు ఎక్కడ ఉంటే అక్కడికి సమీపంలోని ఇంజినీరింగ్‌ కళాశాలలో పరీక్షలు రాసుకునే అవకాశం ఇచ్చింది. ఛైర్మన్‌ పాపిరెడ్డి ‘ఈనాడు’తో మాట్లాడుతూ యూజీసీ నిర్దేశించిన గడువు సెప్టెంబరు 30లోపు పరీక్షలను పూర్తి చేస్తామని తెలిపారు. అనంతరం మూల్యాంకనం ముగించి.. డిగ్రీ పట్టాలను అందజేస్తామన్నారు. విద్యార్థుల సౌకర్యార్థం రెండు గంటల పరీక్ష, చదివిన చోటే పరీక్ష కేంద్రం లాంటి వెసులుబాట్లు కల్పిస్తున్నామన్నారు. పరీక్షల ఫీజు చెల్లించేందుకు వచ్చే వారం నుంచి విద్యార్థులకు మరోసారి అవకాశం ఇవ్వాలని ఓయూ నిర్ణయించింది.
ఆయా వర్సిటీల్లో చివరి సెమిస్టర్‌ విద్యార్థుల సంఖ్య
* జేఎన్‌టీయూహెచ్‌ బీటెక్‌, భీపార్మసీ, ఎంబీఏ: 83,630
* ఓయూ యూజీ: 70,598
* ఓయూ పీజీ: 35,476
* పాలమూరు వర్సిటీ యూజీ, పీజీ: సుమారు 9 వేలు
* అంబేడ్కర్‌ వర్సిటీ యూజీ: 37,367
యూజీ, పీజీ పరీక్షలకు సన్నద్ధం..!
* పరీక్షల బాధ్యతలు విశ్వవిద్యాలయాలకే
* ఇప్పటికే షెడ్యూల్‌ ప్రకటించిన పలు వర్సిటీలు
ఈనాడు, అమరావతి: అండర్‌ గ్రాడ్యుయేషన్, పోస్టుగ్రాడ్యుయేషన్‌ చివరి ఏడాది పరీక్షలు నిర్వహించాలని విశ్వవిద్యాలయాల నిధుల సంఘం(యూజీసీ) ఇచ్చిన ఆదేశాలను సుప్రీంకోర్టు సమర్థించిన నేపథ్యంలో పరీక్షల నిర్వహణ తప్పనిసరిగా మారింది. సెప్టెంబ‌రు 30లోపు వీటిని పూర్తి చేయాలని గతంలో యూజీసీ ఆదేశాలు జారీ చేయగా.. కరోనా దృష్ట్యా రాష్ట్రాలకు ఇబ్బందులు ఉంటే సమయం పెంపు కోసం యూజీసీని సంప్రదించాలని న్యాయస్థానం సూచించింది. సమయం పెంపు కోసం యూజీసీని అడిగే విషయంపై ప్రభుత్వం ఇంకా నిర్ణయం తీసుకోలేదు. ఒక పక్క కరోనా ఉద్ధృతి.. మరోపక్క పరీక్షలు నిర్వహిస్తామనడంతో విద్యార్థులు, వారి తల్లిదండ్రులు ఆందోళనకు గురవుతున్నారు. చాలాచోట్ల వర్సిటీల్లోని వసతిగృహాలు, ఇంజినీరింగ్, డిగ్రీ కళాశాలల్లో క్వారంటైన్‌ కేంద్రాలుగా కూడా ఉండటం గమనార్హం. రాష్ట్రంలో పరీక్షల నిర్వహణ బాధ్యతలను ఉన్నత విద్యాశాఖ అయా విశ్వవిద్యాలయాలకే అప్పగించింది. ఈ మేరకు కొన్ని వర్సిటీలు పరీక్షల షెడ్యూళ్లు ఇవ్వగా.. మరికొన్ని త్వరలో ఇచ్చేందుకు సన్నద్ధమవుతున్నాయి. విద్యార్థులు ఎక్కువ దూరం ప్రయాణం చేయకుండా ఉండేందుకు విద్యార్థుల నివాసాలకు సమీపంలోనే పరీక్ష కేంద్రాలను కేటాయించాలని జేఎన్‌టీయూ నిర్ణయించింది. ట్రిపుల్‌ఐటీ విద్యార్థులకు మాత్రం ఆన్‌లైన్‌లో పరీక్షలు నిర్వహించనున్నారు.
ఆఫ్‌లైన్‌ వైపే మొగ్గు
పరీక్షలను ఆన్‌లైన్‌ లేదా పెన్ను, పేపర్‌ విధానంలో నిర్వహించుకోవచ్చని యూజీసీ సూచించింది. రాజీవ్‌ గాంధీ విజ్ఞాన, సాంకేతిక విశ్వవిద్యాలయం మినహా రాష్ట్రంలోని వర్సిటీలు ఆన్‌లైన్‌లో పరీక్షలు నిర్వహించే పరిస్థితి కనిపించడం లేదు. ఎక్కువ మంది విద్యార్థులకు కంప్యూటర్లు, ల్యాప్‌టాప్‌లు లేకపోవడం, అంతర్జాల సమస్య కారణంగా ఆఫ్‌లైన్‌లో నిర్వహించేందుకు మొగ్గు చూపుతున్నాయి.
* జేఎన్‌టీయూ అనంతపురం సెప్టెంబరు మూడు నుంచి పరీక్షలు ప్రారంభించనుంది. జేఎన్‌టీయూ, కాకినాడ సెప్టెంబరు రెండో వారం నుంచి ప్రారంభించాలని భావిస్తోంది. శ్రీకృష్ణదేవరాయ వర్సిటీ సైతం అన్ని నియోజకవర్గ కేంద్రాల్లోని కళాశాలల్లో పరీక్ష కేంద్రాలు ఏర్పాటు చేస్తోంది. ఈ వర్సిటీలో 5నుంచి పరీక్షలు నిర్వహించనున్నారు. నాగార్జున వర్సిటీలో ఇప్పటికే కొన్ని పరీక్షలు పూర్తికాగా మిగతావి సెప్టెంబ‌రు 2నుంచి ప్రారంభం కానున్నాయి. శ్రీవేంకటేశ్వర వర్సిటీ సెప్టెంబరు 7నుంచి నిర్వహిస్తోంది. ఆంధ్రా యూనివర్సిటీ ఇంకా పరీక్షల షెడ్యూల్‌ను విడుదల చేయలేదు. అంబేడ్కర్‌ వర్సిటీ పరిధిలో పీజీ చివరి ఏడాది వారికి పరీక్షలు నిర్వహించాల్సి ఉండగా ఎప్పటి నుంచి నిర్వహిస్తారన్న దానిపై నిర్ణయం తీసుకోలేదు.
పరీక్షలు నిర్వహించాల్సిందే
* స్ప‌ష్టం చేసిన‌ సుప్రీం కోర్టు
దిల్లీ: వివిధ కోర్సుల్లో చివరి సెమిస్టర్‌ చదువుతున్న విద్యార్థులకు ఆఖరి సెమిస్టర్‌ పరీక్షలు సెప్టెంబరు 30లోగా నిర్వహించకుండా పై తరగతులకు ప్రమోట్‌ చేయొద్దని సుప్రీం కోర్టు తేల్చి చెప్పింది. ఈ మేరకు రాష్ట్రాలకు, వర్సిటీలకు సుప్రీంకోర్టు ఆగ‌స్టు 28న‌ ఆదేశాలు జారీ చేసింది. విద్యార్థులకు పరీక్షలు నిర్వహించిన తర్వాతే పై తరగతులకు ప్రమోట్‌ చేయాలన్న యూనివర్సిటీ గ్రాంట్స్‌ కమిషన్‌ (యూజీసీ) మార్గదర్శకాల్ని సుప్రీంకోర్టు సమర్థించింది.
యూజీసీ మార్గదర్శకాల్ని సవాల్‌ చేస్తూ దాఖలైన పిటిషన్లపై జస్టిస్‌ అశోక్‌భూషణ్‌ నేతృత్వంలోని ధర్మాసనం ఆగ‌స్టు 28న‌ విచారణ జరిపింది. చివరి సెమిస్టర్‌ పరీక్షలు నిర్వహించాల్సిందేనని స్పష్టం చేసింది. కరోనా దృష్టా పరీక్షల నిర్వహణకు ఇబ్బందులు ఉంటే యూజీసీని సంప్రదించాలని సూచించింది. పరీక్షల గడువు పెంచాలని రాష్ట్రాలు యూజీసీని కోరవచ్చని స్పష్టం చేసింది.
యూజీసీ మార్గదర్శకాలు ఇవీ...
* చివరి సెమిస్టర్‌ విద్యార్థులకు సెప్టెంబరు పూర్తయ్యేలోపు విశ్వవిద్యాలయాలు పరీక్షలు నిర్వహించాలి. ఆఫ్‌లైన్‌, ఆన్‌లైన్‌ పద్ధతుల్లో లేదా రెండింటి కలయికగా పరీక్షలు జరుపుకోవచ్చు. బ్యాక్‌లాగ్‌ సబ్జెక్టులు ఉంటే పరీక్షలు నిర్వహించాలి. వాటిని కూడా పైవిధానంలో జరపాలి.
* ఒకవేళ సెప్టెంబరులో పరీక్షలకు, ఏదైనా ఒక సబ్జెక్టు పరీక్షకు హాజరుకాలేని విద్యార్థులకు మరోసారి ప్రత్యేకంగా పరీక్షలు నిర్వహించాలి. ఇది 2019-20 విద్యార్థులకు ఈ ఒక్కసారి మాత్రమే అవకాశం ఇవ్వాలి.
* మిగిలిన సెమిస్టర్ల వారికి గత ఏప్రిల్‌లో సూచించినట్లుగా అంతర్గత పరీక్షలు, గత సెమిస్టర్‌ పరీక్షల మార్కులను పరిగణనలోకి తీసుకొని గ్రేడ్లు ఇచ్చుకోవచ్చు.
డిగ్రీతో కావొచ్చు.. దళపతి!
* సాయుధ బలగాల్లో 209 అసిస్టెంట్‌ కమాండెంట్‌ పోస్టులు
* యూపీఎస్‌సీ ప్రకటన విడుదల
శాసించే ఉద్యోగానికి యూనిఫారం తోడైతే ఆ లెక్క వేరుగా ఉంటుంది. అందులోనూ కేంద్ర సాయుధ దళాల్లో విధులు నిర్వర్తించడమంటే ఉత్సాహం ఉరకలెత్తుతుంది. అలాంటి అవకాశాన్ని సొంతం చేసుకోవడానికి పెద్ద చదువులతో పనిలేదు. సాధారణ డిగ్రీ సరిపోతుంది. రాతపరీక్షలో ప్రతిభ చూపి, ఫిజికల్‌ టెస్టులో సత్తా చాటి, మౌఖిక పరీక్షలో మెప్పిస్తే అసిస్టెంట్‌ కమాండెంట్‌ ఉద్యోగం ఖాయమైనట్లే! యూపీఎస్‌సీ ఏటా సెంట్రల్‌ ఆర్మ్‌డ్‌ పోలీస్‌ ఫోర్సెస్‌ (సీఏపీఎఫ్‌)లో ఈ పోస్టుల భర్తీకి ప్రకటన విడుదల చేస్తుంది. తాజాగా 2020 ప్రకటన వెలువడిన నేపథ్యంలో ఆ వివరాలు..
పోలీస్‌ శాఖలో అత్యున్నత ఉద్యోగానికి సివిల్‌ సర్వీసెస్‌ ప్రధాన రహదారి లాంటిది. అది కాకుండా వేరే దారులూ కొన్ని ఉన్నాయి. వాటిలో ముఖ్యమైన అసిస్టెంట్‌ కమాండెంట్స్‌ పరీక్ష విధానంలో ఎంపికైనవారు కేంద్ర సాయుధ దళాల్లో విధులు నిర్వర్తిస్తారు. వీరికి గ్రూప్‌-ఎ గెజిటెడ్‌ ఆఫీసర్‌ హోదా దక్కుతుంది. సివిల్‌ విభాగంలో అసిస్టెంట్‌ కమిషనర్‌ ఆఫ్‌ పోలీస్‌ (ఏసీపీ) / డిప్యూటీ సూపరింటెండెంట్‌ ఆఫ్‌ పోలీస్‌ (డీఎస్‌పీ)తో సమాన హోదా ఉన్న పోస్టులివి.
పాతికేళ్లలోపు పట్టభద్రులెవరైనా అసిస్టెంట్‌ కమాండెంట్‌ కొలువులకు ప్రయత్నించవచ్చు. మహిళలూ ఈ పరీక్షను రాయవచ్చు. అంతర్గత భద్రత ప్రధాన లక్ష్యంగా ఈ పోస్టులను రూపొందించారు. ఎంపికైనవారు సెంట్రల్‌ ఆర్మ్‌డ్‌ పోలీస్‌ ఫోర్సెస్‌ (సీఎపీఎఫ్‌)- బోర్డర్‌ సెక్యూరిటీ ఫోర్స్‌ (బీఎస్‌ఎఫ్‌), సెంట్రల్‌ రిజర్వ్‌డ్‌ పోలీస్‌ ఫోర్స్‌ (సీఆర్‌పీఎఫ్‌), సెంట్రల్‌ ఇంè్ర[స్టియల్‌ సెక్యూరిటీ ఫోర్స్‌ (సీఐఎస్‌ఎఫ్‌), ఇండో టిబెటన్‌ బోర్డర్‌ పోలీస్‌ ఫోర్స్‌ (ఐటీబీపీ), సశస్త్ర సీమా బల్‌ (ఎస్‌ఎస్‌బీ)లో విధులు నిర్వర్తిస్తారు. భవిష్యత్తులో వీరు సబంధిత విభాగంలో అడిషనల్‌ డైరెక్టర్‌ జనరల్‌ (ఏడీజీ) స్థాయికి చేరుకోవచ్చు. రాతపరీక్ష, ఫిజికల్‌ టెస్టు, ఇంటర్వ్యూల్లో చూపిన ప్రతిభతో ఉద్యోగంలోకి తీసుకుంటారు.
ఖాళీలు ఏ విభాగాల్లో?
మొత్తం ఖాళీలు: 209 (బీఎస్‌ఎఫ్‌: 78, సీఆర్‌పీఎఫ్‌: 13, సీఐఎస్‌ఎఫ్‌: 69, ఐటీబీపీ: 27, ఎస్‌ఎస్‌బీ: 22)
అర్హత: ఏదైనా డిగ్రీ ఉత్తీర్ణత
వయసు: ఆగస్టు 1, 2020 నాటికి కనిష్ఠంగా 20 ఏళ్లు; గరిష్ఠంగా 25 ఏళ్లు. రిజర్వ్‌డ్‌ అభ్యర్థులకు మూడేళ్లు గరిష్ఠ వయసులో సడలింపులు వర్తిస్తాయి.
ఆన్‌లైన్‌ దరఖాస్తుల గడువు: సెప్టెంబరు 7 సాయంత్రం 6 గంటలు.
దరఖాస్తు ఫీజు: మహిళలు, ఎస్‌సీ, ఎస్‌టీలు చెల్లించనవసరం లేదు.
మిగిలినవారికి రూ. 200
పరీక్ష తేదీ: డిసెంబరు 20
తెలుగు రాష్ట్రాల్లో పరీక్ష కేంద్రాలు: హైదరాబాద్, విశాఖపట్నం, తిరుపతి.
వెబ్‌సైట్లు: www.upsc.gov.in, www.upsconline.nic.in
ఎంపికైతే...
ఈ ఉద్యోగానికి ఎంపికైనవారికి ఆ విభాగాన్ని అనుసరించి సంబంధిత కేంద్రాల్లో ఏడాది పాటు శిక్షణ నిర్వహిస్తారు. ఉదాహరణకు సీఐఎస్‌ఎఫ్‌కి ఎంపికైనవారికి నేషనల్‌ ఇంè్ర[స్టియల్‌ సెక్యూరిటీ అకాడెమీ (ఎన్‌ఐఎస్‌ఎ)- హైదరాబాద్‌లో 53 వారాల పాటు ప్రాథమిక శిక్షణ ఉంటుంది. శిక్షణ అనంతరం ఆయా విభాగాల్లో విధులు నిర్వర్తిస్తారు. ఇందులో భాగంగా దేశ అంతర్గత భద్రతకు సంబంధించిన కార్యకలాపాల్లో పాలు పంచుకుంటారు. ముఖ్యంగా నక్సలైట్లు, ఉగ్రవాదులు, మావోయిస్టుల కదలికలను కనిపెడుతూ ప్రమాదం ఉన్నచోట ప్రత్యక్షమవుతారు. చేపట్టబోయే కార్యక్రమాలపై వ్యూహరచన చేస్తారు. అవసరమైనచోట ఎన్నికల విధులనూ నిర్వర్తిస్తారు. వీరికి రూ.56,100 (లెవెల్‌ 10) మూలవేతనం లభిస్తుంది. డీఏ, హెచ్‌ఆర్‌ఏ, అలవెన్సులు కలుపుకుని మొదటి నెల నుంచే దాదాపు లక్ష రూపాయల వేతనం అందుకోవచ్చు. తక్కువ వ్యవధిలోనే ఉన్నత స్థాయికి చేరుకోవచ్చు.
మొత్తం రెండు పేపర్లు
పరీక్షలో రెండు పేపర్లు ఉంటాయి. మొదటి పేపర్‌కు 250 మార్కులు. పరీక్ష వ్యవధి 2 గంటలు. ఇందులో జనరల్‌ ఎబిలిటీ అండ్‌ ఇంటలిజెన్స్‌ అంశాల నుంచి 125 ఆబ్జెక్టివ్‌ ప్రశ్నలు వస్తాయి. ప్రతి ప్రశ్నకు 2 మార్కులు. రుణాత్మక మార్కులున్నాయి. అంటే తప్పుగా గుర్తించిన ప్రతి జవాబుకూ మూడో వంతు మార్కులు తగ్గిస్తారు. పేపర్‌-2 మొత్తం 200 మార్కులకు డిస్క్రిప్టివ్‌ విధానంలో ఉంటుంది. వ్యవధి 3 గంటలు. ఇందులో జనరల్‌ స్టడీస్, ఎస్సే, కాంప్రహెన్షన్‌ల నుంచి ప్రశ్నలు అడుగుతారు. పేపర్‌-1లో అర్హత సాధిస్తేనే పేపర్‌ 2 మూల్యాంకనం చేస్తారు. పేపర్‌-2లో కనీసం 25 శాతం అంటే 50 మార్కులు తప్పనిసరి.
ఫిజికల్‌ పరీక్షలు
రాత పరీక్షలో అర్హులకు ఫిజికల్‌ స్టాండర్డ్‌ / ఫిజికల్‌ ఎఫిషియన్సీ పరీక్షలు నిర్వహిస్తారు. పురుషులు 165 సెం.మీ. ఎత్తు, 50 కి.గ్రా. బరువు ఉండాలి. ఛాతీ విస్తీర్ణం 81 సెం.మీ. ఉండాలి. ఊపిరి పీల్చిన తర్వాత 5 సెం.మీ. పెరగాలి. మహిళలు 157 సెం.మీ. ఎత్తు, 46 కి.గ్రా. బరువు తప్పనిసరి. వంద మీటర్ల దూరాన్ని పురుషులు 16, మహిళలు 18 సెకన్లలో పూర్తిచేయాలి. అనంతరం 800 మీటర్ల దూరాన్ని పురుషులు 3 నిమిషాల 45 సెకన్లలో, మహిళలు 4 నిమిషాల 45 సెకన్లలో చేరుకోవాలి. లాంగ్‌ జంప్‌లో పురుషులు మూడు ప్రయత్నాల్లో కనీసం ఒకసారి 3.5 మీటర్లు, మహిళలు 3 మీటర్లు జంప్‌ చేయగలగాలి. షాట్‌పుట్‌లో 7.26 కి.గ్రా. గుండును పురుషులు 4.5 మీటర్ల దూరానికి విసరాలి. మహిళలకు షాట్‌పుట్‌ లేదు.
ఇంటర్వ్యూ
ఫిజికల్‌ టెస్టుల్లో అర్హత సాధించినవారికి మెడికల్‌ పరీక్షలు నిర్వహిస్తారు. ఇందులోనూ విజయవంతమైతే మౌఖిక పరీక్ష (ఇంటర్వ్యూ)కు పిలుస్తారు. ఇంటర్వ్యూకి 150 మార్కులు కేటాయించారు. రాత పరీక్ష, ఇంటర్వ్యూల్లో సాధించిన మార్కుల ఆధారంగా తుది నియామకాలు చేపడతారు.
సన్నద్ధత ఇలా
1. సిలబస్‌లోని అంశాలను ఎన్‌సీఈఆర్‌టీ పుస్తకాల్లోంచి చదువుకోవాలి. హిస్టరీ, పాలిటీ, ఎకానమీ, జాగ్రఫీ .. వీటన్నింటినీ ఈ పుస్తకాలతో పూర్తిచేసుకోవచ్చు. ముఖ్యంగా 8 నుంచి 12 తరగతుల పుస్తకాలను బాగా చదువుకోవాలి.
2. జనరల్‌ స్టడీస్, ఎస్సే, కాంప్రహెన్షన్‌ పేపర్‌ పూర్తిగా డిస్క్రిప్టివ్‌ విధానంలో ఉంటుంది. అందువల్ల రాయడం అలవాటు చేసుకోవాలి. వ్యాసాన్ని బాగా రాయడానికి సమకాలీన అంశాలపై పట్టు పెంచుకోవడం ముఖ్యం. ఈ విభాగంలోని చాలా ప్రశ్నలు తాజా పరిణామాల ఆధారంగా వస్తున్నాయి. పత్రికల్లో వచ్చిన నిపుణుల అభిప్రాయాలు, గుర్తింపు పొందిన సంస్థల నివేదికలు బాగా చదవాలి.
3. పాత ప్రశ్నపత్రాలు బాగా పరిశీలించాలి. ఇవి యూపీఎస్‌సీ వెబ్‌సైట్‌లో లభిస్తాయి. ఆయా అంశాలు, విభాగాల వారీ ప్రాధాన్యం తెలుసుకుని అనుగుణంగా సన్నద్ధం కావాలి.
4. వర్తమాన అంశాలు, ఎస్సే ప్రశ్నలకు జవాబు రాయాలంటే ఏదైనా ఆంగ్ల పత్రికలోని ముఖ్యమైన వ్యాసాలు చదవాలి. ముఖ్యాంశాలను నోట్సు రాసుకోవాలి.
ఈ అంశాల్లో ప్రశ్నలు..
పేపర్‌ 1: ఆరు అంశాల్లో అభ్యర్థి అవగాహన, నైపుణ్యాలను పరీక్షిస్తారు. మెంటల్‌ ఎబిలిటీ విభాగంలో రీజనింగ్, క్వాంటిటేటివ్‌ ఆప్టిట్యూడ్‌ (న్యూమరికల్‌ ఎబిలిటీ, డేటా ఇంటర్‌ప్రిటేషన్‌) అంశాల నుంచి ప్రశ్నలు వస్తాయి. జనరల్‌ సైన్స్‌లో భాగంగా దైనందిన జీవితంలో సైన్స్‌తో ముడిపడే అంశాల నుంచి ప్రశ్నలు వస్తాయి. ఐటీ, బయోటెక్నాలజీ, పర్యావరణం అంశాలకు ప్రాధాన్యం ఉంటుంది. వర్తమాన సంఘటనల విభాగంలో జాతీయ, అంతర్జాతీయ స్థాయుల్లో ప్రాధాన్యం సంతరించుకున్న వివిధ అంశాలను చదువుకోవాలి. ఇందులో భాగంగా నాగరికత, కళలు, సాహిత్యం, క్రీడలు, పాలనా విభాగాలు, వర్తకం, పరిశ్రమలు, ప్రపంచీకరణ...మొదలైనవాటికి ప్రాధాన్యం ఉంటుంది. మరో విభాగం ఇండియన్‌ పాలిటీ అండ్‌ ఎకానమీలో దేశ రాజకీయ వ్యవస్థ, భారత రాజ్యాంగం, సామాజిక వ్యవస్థ, ప్రజా పరిపాలన, భారత ఆర్థిక పురోగతి, ప్రాంతీయ, అంతర్జాతీయ భద్రతా సమస్యలు; మానవ హక్కులు, వాటి సూచికలు మొదలైనవాటిపై ప్రశ్నలు వస్తాయి. భారత దేశ చరిత్ర విభాగం నుంచి సామాజిక, ఆర్థిక, రాజకీయ అంశాలతో ముడిపడే అంశాలను ప్రశ్నిస్తారు. జాతీయవాదం, స్వాతంత్య్రోద్యమ సంఘటనలకు సంబంధించిన ప్రశ్నలూ అడుగుతారు. చివరి అంశమైన జాగ్రఫీలో భౌతిక, సామాజిక, ఆర్థిక అంశాలకు సంబంధించిన జాతీయ, ప్రపంచ సంఘటనలకు ప్రాధాన్యం ఉంటుంది.
పేపర్‌ 2: రెండు భాగాలుంటాయి. పార్ట్‌-ఎలో వ్యాసాలపై ప్రశ్నలు వస్తాయి. వీటికి 80 మార్కులు. ఇంగ్లిష్‌ లేదా హిందీ మాధ్యమంలో సమాధానం రాయాలి. ఇందులో భాగంగా ఆధునిక భారతదేశ చరిత్రకు సంబంధించి స్వాతంత్య్రోద్యమం, జాగ్రఫీ, పాలిటీ, ఎకానమీ, భద్రత, మానవ హక్కులకు సంబంధించిన సంఘటనలు, అనలిటికల్‌ ఎబిలిటీ మొదలైన వాటిపై ప్రశ్నలు వస్తాయి. పార్ట్‌- బిలో అభ్యర్థి ఆంగ్ల నైపుణ్యాలను పరీక్షిస్తారు. కాంప్రహెన్షన్, ప్రెసీ, లాంగ్వేజ్‌ స్కిల్స్‌ నుంచి 120 మార్కులకు ప్రశ్నలు ఉంటాయి. ఈ విభాగానికి మొత్తం ఆంగ్లంలోనే జవాబులు రాయాలి.
కటాఫ్‌ ఇలా
పోస్టుల సంఖ్య, ఆశావహులు, ప్రశ్నపత్ర కఠినత్వం బట్టి కటాఫ్‌ మారుతుంది. అయితే జనరల్‌ కేటగిరీలో 55 శాతం మార్కులు సాధించినవారు తప్పక విజయం అందుకోవచ్చు. 2018 పరీక్షలో జనరల్‌ కేటగిరీలో పేపర్‌-1లో కటాఫ్‌ మార్కులు 95 గా ఉన్నాయి. కానీ 2017లో కటాఫ్‌ మార్కు 124. 2018లో పేపర్‌ 1, 2లు కలిపి 166 మార్కులు సాధించినవారు ఇంటర్వ్యూకు ఎంపికయ్యారు. 2017లో 206 సాధించినవారికి ఆ అవకాశం దక్కింది. మొత్తం మీద రాతపరీక్ష + ఇంటర్వ్యూ కలుపుకుని 600కు గానూ 282, ఆపైన మార్కులు పొందిన జనరల్‌ అభ్యర్థులు 2018లో ఉద్యోగానికి ఎంపికయ్యారు. 2017లో జనరల్‌ కేటగిరీలో 316 మార్కులు పొందినవారికి ఉద్యోగం దక్కింది.
సెప్టెంబరు 28 నుంచి డీఈడీ మొదటి ఏడాది పరీక్షలు
ఈనాడు, అమరావతి: డీఈడీ 2018-2020 బ్యాచ్‌ మొదటి ఏడాది విద్యార్థులకు సెప్టెంబరు 28నుంచి అక్టోబరు 5వరకు పరీక్షలు నిర్వహించనున్నట్లు ప్రభుత్వ పరీక్షల విభాగం సంచాలకులు ఎ.సుబ్బారెడ్డి తెలిపారు. ఉదయం 9గంటల నుంచి మధ్యాహ్నం 12గంటల వరకు నిర్వహించనున్నారు.
5 గంటల్లో 7 లక్షల నీట్‌ అడ్మిట్‌కార్డుల డౌన్‌లోడ్‌
* విద్యార్థులకు హాల్‌టికెట్లే ప్రయాణ పాస్‌లు
ఈనాడు, దిల్లీ: సెప్టెంబర్‌ 13న దేశవ్యాప్తంగా 3842 కేంద్రాల్లో నిర్వహించే నీట్‌ యూజీ పరీక్షకు అడ్మిట్‌ కార్డులను తొలి అయిదుగంటల్లోనే దాదాపు 7 లక్షలమంది డౌన్‌లోడ్‌ చేసుకున్నట్లు నేషనల్‌ టెస్టింగ్‌ ఏజెన్సీ(ఎన్టీఏ) వెల్లడించింది. 15.97 లక్షల మంది అభ్యర్థులు రిజిష్టర్‌ చేసుకున్న ఈ పరీక్ష కోసం ఆగ‌స్టు 26 నుంచి అడ్మిట్‌కార్డులు జారీ మొదలుపెట్టినట్లు పేర్కొంది. పరీక్ష మొదలయ్యేవరకూ వీటిని డౌన్‌లోడ్‌ చేసుకోవచ్చని, కంటైన్‌మెంట్‌ జోన్లలో ఉన్న విద్యార్థులకు ఇవి మూవ్‌మెంట్‌(ప్రయాణ) పాస్‌లుగా పనికొస్తాయని తెలిపింది. పరీక్ష పర్యవేక్షకులకు జారీచేసిన నియామక పత్రాలు వారికి పాస్‌లుగా పనిచేస్తాయన్నారు. విద్యార్థుల కోసం ప్రత్యేక రవాణా వ్యవస్థ ఏర్పాటుచేయాలని రాష్ట్ర ప్రభుత్వాలకు ఇప్పటికే ఆదేశాలు జారీచేసినట్లు చెప్పారు.
ప్రతి పరీక్షా కేంద్రంలో ఇదివరకటి కంటే విద్యార్థుల సంఖ్యను తగ్గించడంతోపాటు, మరోవైపు పర్యవేక్షకుల సంఖ్యను పెంచామని చెప్పారు. ఒక గదిలో 12 మంది విద్యార్థులకు మించి ఉండరన్నారు. జేఈఈ మెయిన్‌లో ప్రతి కంప్యూటర్‌ మధ్య ఒక మీటర్‌ దూరం ఉంటుందని, ఉదయం విద్యార్థులు బేసి సంఖ్య కంప్యూటర్‌పై, మధ్యాహ్నం సరి సంఖ్య కంప్యూటర్‌పై కూర్చొనేలా ఏర్పాటుచేశామని తెలిపారు. ప్రతి షిఫ్ట్‌కి ముందు, తర్వాత కేంద్రాలను పూర్తిగా శానిటైజ్‌ చేస్తున్నట్లు చెప్పారు. జేఈఈ మెయిన్‌ పరీక్షలకు హాజరవుతున్న 8.58 లక్షల విద్యార్థుల్లో ఆగ‌స్టు 25 సాయంత్రం వరకు 7.41 లక్షల మంది విద్యార్థులు అడ్మిట్‌ కార్డులను డౌన్‌లోడ్‌ చేసుకున్నారని ఎన్టీఏ అధికారి ఒకరు చెప్పారు.
వాయిదాతో విద్యార్థులకే నష్టం: జేఈఈ, నీట్‌ పరీక్షలు వాయిదా.. విద్యార్థుల భవిష్యత్తుపై తీవ్ర ప్రభావం చూపిస్తుందని ఐఐటీ దిల్లీ డైరెక్టర్‌ వి.రామ్‌గోపాలరావు హెచ్చరించారు. కరోనా మహమ్మారి ఇప్పుడప్పుడే పోదని.. కనీసం ఓ ఏడాది వరకు ఉంటుందని.. అప్పటివరకు చదువులు ఆపుకుంటే తెలివైన విద్యార్థుల కెరీర్‌ నాశనమయ్యే ప్రమాదం ఉందని ఆయన ఆందోళన వ్యక్తం చేశారు.
సెప్టెంబరు 1 నుంచి ఇంటర్‌ ఆన్‌లైన్‌ ప్రవేశాలు?
* విద్యార్థులకు జేఈఈ, ఎంసెట్‌ పరీక్షల మెటీరియల్‌ సరఫరా
ఈనాడు, అమరావతి: ఇంటర్మీడియట్‌ ఆన్‌లైన్‌ ప్రవేశాలు సెప్టెంబర్‌ ఒకటి నుంచి ప్రారంభించేందుకు ఇంటర్‌ విద్యా మండలి కసరత్తు చేస్తోంది. ఈ ఏడాది మొదటిసారిగా ఆన్‌లైన్‌ విధానంలో ప్రవేశాలు నిర్వహిస్తున్నారు. ప్రైవేటు జూనియర్‌ కళాశాలలకు కొత్త రుసుములను నిర్ణయించనందున పాత వాటితోనే సీట్ల భర్తీ చేపట్టనున్నారు. గతంలో సెక్షన్‌కు 88మంది ఉండగా..ఈసారి ఈ సంఖ్యను 40కి తగ్గించారు. ఒక కళాశాలకు ఆర్ట్స్‌తో కలిపి గరిష్ఠంగా 9సెక్షన్లకు మాత్రమే అనుమతులు ఇచ్చారు. విద్యార్థుల సంఖ్య తగ్గించడం, కరోనా కారణంగా పదో తరగతి విద్యార్థులందర్నీ ఉత్తీర్ణులను చేయడంతో ఇంటర్‌లో చేరేవారి సంఖ్య పెరుగుతుందనే ఉద్దేశంతో కొత్తగా సుమారు 120 కళాశాలలకు అనుమతులు ఇచ్చారు. మండలానికో ఉన్నత పాఠశాలను జూనియర్‌ కళాశాలగా మార్చేందుకు చేపట్టిన కసరత్తు పూర్తికానందున ఇవి ఈ ఏడాది అందుబాటులోకి వచ్చే అవకాశం కనిపించడం లేదు.
దరఖాస్తు ఇలా..
విద్యార్థులు ఎక్కడి నుంచైనా ప్రవేశాల కోసం ఆన్‌లైన్‌లో దరఖాస్తు చేసుకోవచ్చు. వారికి నచ్చిన కళాశాలను ఎంపిక చేసుకోవాల్సి ఉంటుంది. ఎన్ని కళాశాలలకైనా ఐచ్ఛికాలను ఇచ్చుకోవచ్చు. ఇంటర్‌ ప్రథమ సంవత్సరానికి గతంలో ఉన్న విధంగా రూ.3,119, రెండో ఏడాదికి రూ.3,432 మాత్రమే రుసుము వసూలు చేయాల్సి ఉంటుంది. ఎంసెట్, నీట్, జేఈఈ పరీక్షల కోచింగ్‌ కోసం కళాశాలలు ప్రత్యేకంగా అనుమతులు తీసుకోవాల్సి ఉంటుంది.
మెటీరియల్‌ సరఫరా..
జేఈఈ, ఎంసెట్‌ పరీక్షలకు విద్యార్థులు సన్నద్ధమయ్యేలా మెటీరియల్‌ను రూపొందిస్తున్నారు. సబ్జెక్టుల వారీగా వర్క్‌బుక్స్‌ను సిద్ధం చేస్తున్నారు. ప్రభుత్వ కళాశాలలకు ప్రింటింగ్‌ చేసిన వాటిని సరఫరా చేయాలని భావిస్తున్నారు. మిగతా వారి కోసం వీటిని ఆన్‌లైన్‌లో పెడతారు. ప్రస్తుతం రెండో ఏడాది వారికి ఆన్‌లైన్‌ తరగతులు నిర్వహిస్తుండగా 40శాతం మందికి మాత్రమే సెల్‌ఫోన్లు, కంప్యూటర్ల సదుపాయం ఉంది. మిగతా వారు పాఠాలను వినలేకపోతున్నారు. ఈ విద్యార్థులు బడుల్లోని వర్చువల్‌ తరగతికి హాజరై పాఠాలను వినే సదుపాయం కల్పించాలని యోచిస్తున్నారు.
బడుల్లో ప్రవేశాలకు అనుమతి
* నర్సరీ నుంచి ఆన్‌లైన్‌ తరగతులకూ పచ్చజెండా
* సర్కారు బడుల్లో 3-10 తరగతుల విద్యార్థులకే డిజిటల్‌ పాఠాలు
ఈనాడు, హైదరాబాద్‌: కొత్త విద్యా సంవత్సరం(2020-21)లో అన్ని ప్రభుత్వ, ఎయిడెడ్‌, ప్రైవేట్‌ పాఠశాలల్లో విద్యార్థులను చేర్చుకునేందుకు విద్యాశాఖ అనుమతి ఇచ్చింది. ఒకటో తరగతి, ఆరో తరగతిలో చేర్చుకోవడానికి ప్రవేశాల ప్రక్రియ ప్రారంభించుకోవచ్చు. ఇందుకోసం విద్యార్థులు భౌతికంగా పాఠశాలలకు వెళ్లాల్సిన అవసరం లేదు. తల్లిదండ్రులు వెళ్లి వివరాలు సమర్పిస్తే సరిపోతుంది. ఒకటి, ఆరు తరగతులు కాకుండా మిగిలిన వాటిల్లోనూ ప్రవేశాలు చేపట్టవచ్చని కాకపోతే వాటిని బదిలీలుగా మాత్రమే పరిగణిస్తామని అధికారులు చెబుతున్నారు. అలాగే ప్రైవేటు పాఠశాలలు నర్సరీ నుంచి ఆన్‌లైన్‌ తరగతులు నిర్వహించుకోవచ్చు. ప్రభుత్వ పాఠశాలల్లో మాత్రం 3వ తరగతి నుంచే డిజిటల్‌ పాఠాలు మొదలవుతాయి. ప్రభుత్వ పాఠశాల విద్యార్థులకైనా, ప్రైవేటు విద్యార్థులకైనా వారంలో అయిదు రోజులు మాత్రమే పాఠాల ప్రసారం ఉండాలి. తరగతులను బట్టి గరిష్ఠంగా రోజుకు 3 గంటలు అంటే 4 లేదా 5 తరగతులు(సెషన్లు) నిర్వహించాలి. పాఠశాల విద్యాశాఖ సంచాలకురాలు శ్రీదేవసేన ఈ మేరకు మార్గదర్శకాలు జారీ చేశారు.
ఎల్‌కేజీ, యూకేజీ విద్యార్థులకు వారంలో మూడు రోజులే
ఆన్‌లైన్‌ తరగతులకు సంబంధించి ప్రైవేటు విద్యా సంస్థలు కేంద్ర ప్రభుత్వం ప్రాజ్ఞత పేరిట జారీ చేసిన మార్గదర్శకాలను అనుసరించాలి. ఆ ప్రకారం నర్సరీ, ఎల్‌కేజీ, యూకేజీ విద్యార్థులకు రోజుకు 45 నిమిషాల చొప్పున వారంలో మూడు రోజులపాటు తరగతులు ఉండాలి. 1-5 తరగతులకు రోజుకు గంటన్నర, 6-8 తరగతులకు 2 గంటలు, 9-12 తరగతులకు రోజుకు 3 గంటల చొప్పున వారంలో ఐదు రోజులపాటు పాఠాలు బోధించవచ్చు. ప్రభుత్వ, ఎయిడెడ్‌ పాఠశాలల్లో మాత్రం 2వ తరగతి వరకు ఆన్‌లైన్‌ పాఠాలు ఉండవు. కేవలం 3-10 తరగతుల వారికే ఉంటాయి. బడులు తెరిస్తేనే మిగిలిన కింది తరగతులకు పాఠాలుంటాయని విద్యాశాఖ వర్గాలు తెలిపాయి. ‘ప్రభుత్వ బడుల్లో చదివించే పిల్లల తల్లిదండ్రులు ఎక్కువ పేదవారు ఉంటారు. వారికి పిల్లల పక్కన కూర్చొని చదివించే పరిస్థితి ఉండదు కాబట్టి 2వ తరగతి వరకు డిజిటల్‌ పాఠాలు పెట్టడం లేదు’ అని ఒక అధికారి తెలిపారు.
ఇంట్లో టీవీ లేకుంటే...
ఇంట్లో టీవీలు లేని విద్యార్థులు ఉంటే ప్రధానోపాధ్యాయులు చొరవ తీసుకొని గ్రామ పంచాయతీ, గ్రామంలోని ఏదైనా ప్రభుత్వ సంస్థ మద్దతు తీసుకోవాలి. లేదంటే టీవీ ఉన్న విద్యార్థులతో కలిపి వారికి పాఠాలు వినే సౌకర్యం కల్పించాలి. స్థానికంగా చదువుకున్న యువతను గుర్తించి వారి సేవలను కూడా వినియోగించుకోవచ్చు. ఈ సందర్భంగా కొవిడ్‌ నిబంధనలను పాటించాలి. పాఠ్య పుస్తకాలు, వర్క్‌ షీట్లు అందరికీ అందుబాటులో ఉంచాలి. ఉపాధ్యాయులు పిల్లలకు తగినంత హోం వర్క్‌ ఇవ్వాలి. చదువులో వెనుకంజలో ఉండే విద్యార్థులకు మొదటి నెల రోజులు సంసిద్ధత కార్యక్రమాలను చేపట్టాలి.
టీవీ కార్యక్రమాల గురించి ముందుగా తెలపాలి
‘‘రోజువారీ టీవీ పాఠాల వివరాలను ఉపాధ్యాయులు తల్లిదండ్రులకు తెలియజేయాలి. వివిధ ప్రసార మాధ్యమాల ద్వారా విద్యార్థుల సందేహాలను తీర్చాలి. తల్లిదండ్రులు సైతం పిల్లలు టీవీ పాఠాలను చూసేలా చర్యలు తీసుకోవాలి. స్మార్ట్‌ఫోన్‌, అంతర్జాలం ఉపయోగించినప్పుడు తగిన భద్రతా ప్రమాణాలను పాటించాలి’’ అని ప్రభుత్వం మార్గదర్శకాల్లో పేర్కొంది.
ప్రభుత్వ కళాశాల విద్యార్థులకూ ఆన్‌లైన్‌ క్లాసులు
* సెప్టెంబర్‌ 1 నుంచి ప్రారంభం
* నిర్ణయించిన తెలంగాణ ప్రభుత్వం
హైదరాబాద్‌: రాష్ట్రంలో ప్రభుత్వ కళాశాలల్లోనూ సెప్టెంబర్‌ 1 నుంచి ఆన్‌లైన్‌ తరగతులు నిర్వహించాలని రాష్ట్ర ప్రభుత్వం నిర్ణయించింది. ఇంటర్‌, డిగ్రీ, పీజీ విద్యార్థులకు ఆన్‌లైన్‌ తరగతుల ద్వారా బోధన నిర్వహిస్తామని విద్యాశాఖ ప్రకటించింది. ఆగ‌స్టు 27 నుంచి అధ్యాపకులందరూ కళాశాలలకు హాజరుకావాలని ఆదేశించింది. సుప్రీంకోర్టు కేసు తేలిన తర్వాత డిగ్రీ, యూజీ పరీక్షలపై నిర్ణయం తీసుకుంటామని తెలిపింది. మరోవైపు కరోనా జాగ్రత్తలు తీసుకుంటూనే అన్ని ప్రవేశపరీక్షలు నిర్వహించాలని విద్యాశాఖ నిర్ణయించింది.
ఇప్పటికే ప్రభుత్వ పాఠశాలల్లోనూ ఆన్‌లైన్‌ తరగతుల ప్రారంభంపై ప్రభుత్వం నిర్ణయం తీసుకుంది. అక్కడ కూడా సెప్టెంబర్‌ 1 నుంచే తరగతులు ప్రారంభించనున్నట్లు విద్యాశాఖ ప్రత్యేక ప్రధాన కార్యదర్శి చిత్రా రామచంద్రన్ ఆగ‌స్టు 24న‌ ఉత్తర్వులు జారీ చేశారు. పాఠశాల విద్యార్థులకు దూరదర్శన్ యాదగిరి ఛానల్‌, టీశాట్‌ ఛానళ్ల ద్వారా డిజిటల్‌ పాఠాలను ప్రసారం చేయనున్నారు.
డిగ్రీ మార్కులతో ఎంబీఏ ప్రవేశాలు
* ఏఐసీటీఈ ఆమోదం
దిల్లీ: ఎంబీయే, పోస్ట్‌ గ్రాడ్యుయేట్‌ డిప్లొమా ఇన్‌ మేనేజ్‌మెంట్‌ (పీజీడీఎం) కోర్సులను నిర్వహించే బిజినెస్‌ స్కూళ్లు, విద్యాసంస్థలు.. డిగ్రీలో విద్యార్థులు పొందిన మార్కులు ఆధారంగా ప్రవేశాలు చేపట్టేందుకు అఖిల భారత సాంకేతిక విద్యామండలి (ఏఐసీటీఈ) ఆమోదం తెలిపింది. కొవిడ్‌-19 కారణంగా అనేక ప్రవేశ పరీక్షలు నిర్వహించలేని పరిస్థితుల నేపథ్యంలోనే ఈ నిర్ణయం తీసుకున్నట్లు అధికారులు తెలిపారు. ఈ వెసులుబాటు 2020-21 విద్యా సంవత్సరానికి మాత్రమేనని, భవిష్యత్తు సంవత్సరాలకు వర్తించదని ఏఐసీటీఈ స్పష్టంచేసింది. కరోనా నేపథ్యంలో కొన్ని రాష్ట్రాలు ప్రవేశ పరీక్షలు నిర్వహించే విషయంలో స్పష్టత లేనందువల్లే ఈ నిర్ణయం తీసుకున్నట్లు అధికారులు తెలిపారు.
1 నుంచి ఆన్‌లైన్‌ తరగతులు
* ప్రభుత్వ పాఠశాలల విద్యార్థులకు దూరదర్శన్, టీశాట్‌ ద్వారా పాఠాలు
* 27 నుంచి ఉపాధ్యాయులందరూ విధులకు
* విద్యాశాఖ ఉత్తర్వులు
ఈనాడు, హైదరాబాద్‌: రాష్ట్రవ్యాప్తంగా ప్రభుత్వ పాఠశాలల్లోని విద్యార్థులకు సెప్టెంబరు 1 నుంచి ఆన్‌లైన్‌ తరగతులు ప్రారంభం కానున్నాయి. దూరదర్శన్‌ యాదగిరి ఛానల్, టీశాట్‌ ఛానళ్ల ద్వారా డిజిటల్‌ పాఠాలను ప్రసారం చేయనున్నారు. ఈ మేరకు విద్యాశాఖ ప్రత్యేక ప్రధాన కార్యదర్శి చిత్రారామచంద్రన్ ఆగ‌స్టు 24న‌ ఉత్తర్వులు జారీ చేశారు. ఆగ‌స్టు 5న జరిగిన మంత్రి మండలి సమావేశం ఆమోదం మేరకు ఈ నిర్ణయం తీసుకున్నట్లు ఉత్తర్వుల్లో పేర్కొన్నారు. పాఠశాలలను తిరిగి తెరవడం, సాధారణ తరగతుల ప్రారంభంపై కేంద్ర ప్రభుత్వ మార్గదర్శకాల ప్రకారం ప్రత్యేక సూచనలు జారీ చేస్తామన్నారు. అప్పటివరకు పాఠశాల విద్యాశాఖలోని ఎస్‌సీఈఆర్‌టీ తయారు చేసిన ప్రత్యామ్నాయ క్యాలెండర్‌ను అనుసరించాలని సూచించారు. వివరణాత్మక కార్యాచరణ మార్గదర్శకాలను విద్యాశాఖ సంచాలకులు జారీచేయనున్నారు.ఈ ఆగ‌స్టు 27నుంచి ప్రభుత్వ ఉపాధ్యాయులందరూ పాఠశాలల విధుల్లోకి వెళ్లాలని, డిజిటల్‌ పాఠాల తయారీ(ఈ-కంటెంట్‌), పాఠాల ప్రణాళికలు సిద్ధం చేయాలని ఉత్తర్వుల్లో సూచించారు. ఆగ‌స్టు 10న విద్యాశాఖ మంత్రి సబితాఇంద్రారెడ్డి సమక్షంలో జరిగిన సమావేశంలో ఆన్‌లైన్‌ పాఠాలు ఆగ‌స్టు 20న మొదలవుతాయని, 17నుంచి ఉపాధ్యాయుల్లో సగం మంది ప్రతి రోజూ విధులకు వెళ్లాలని నిర్ణయం తీసుకున్నా ప్రభుత్వం నుంచి ఆమోదం లభించక ఆన్‌లైన్‌ పాఠాలు మొదలుకాలేదు. తాజా ఉత్తర్వుల్లో మాత్రం ఉపాధ్యాయులు అందరూ ప్రతిరోజూ పాఠశాలలకు వెళ్లాలని ఆదేశించారు.
విద్యా వాలంటీర్లను వద్దన్నట్లేనా!
విద్యా వాలంటీర్లు, ఇతర పార్ట్‌ టైమ్‌ ఇన్‌స్ట్రక్టర్ల(పీటీఐ) విషయాన్ని ఉత్తర్వుల్లో ప్రస్తావించలేదు. ఏటా విద్యా సంవత్సరం ప్రారంభమైన తర్వాత వారిని రెన్యువల్‌ చేస్తున్నారు. ఈ సంవత్సరం దీనిపై ఇప్పటివరకూ ప్రభుత్వం నుంచి ఆదేశాలు రాలేదు. ఈ నేపథ్యంలో తాజా ఉత్తర్వులు వారికి వర్తించవని విద్యాశాఖ వర్గాలు చెబుతున్నాయి. రాష్ట్రవ్యాప్తంగా దాదాపు 12,600 మంది విద్యా వాలంటీర్లు, 2,800 మంది పీటీఐలు ఉన్నారు.
* రాష్ట్రంలో మొత్తం ప్రభుత్వ పాఠశాలలు: 25,500
* శాశ్వత ఉపాధ్యాయులు: సుమారు 1.15 లక్షలు
సెప్టెంబరు 2న పాలిసెట్‌
ఈనాడు, హైదరాబాద్‌: పాలిసెట్‌ను సెప్టెంబరు 2వ తేదీ ఉదయం 11 నుంచి మధ్యాహ్నం 1.30 గంటల వరకు నిర్వహించనున్నట్లు రాష్ట్ర సాంకేతిక విద్య, శిక్షణ మండలి(ఎస్‌బీటెట్‌) కార్యదర్శి డాక్టర్‌ సి.శ్రీనాథ్‌ ఒక ప్రకటనలో తెలిపారు. ఐటీఐ విద్యార్థులు పాలిటెక్నిక్‌లో లేటరల్‌ ఎంట్రీ ద్వారా రెండో ఏడాదిలోకి చేరేందుకు ఎల్‌పీసెట్‌ను సెప్టెంబరు 6వ తేదీ ఉదయం 11 నుంచి మధ్యాహ్నం ఒంటి గంట వరకు పేపర్‌-1, మధ్యాహ్నం 2.30 నుంచి సాయంత్రం 4.30 గంటల వరకు పేపర్‌-2 జరుపుతామని వివరించారు.
సెప్టెంబరు 28, 29 తేదీల్లో ఎంసెట్‌ అగ్రికల్చర్‌
* అక్టోబరు మొదటి వారంలో ఎడ్‌సెట్, లాసెట్‌
* ప్రవేశ పరీక్షల తేదీలను వెల్లడించిన ఉన్నత విద్యామండలి
ఈనాడు, హైదరాబాద్‌: రెండుసార్లు వాయిదా పడిన రాష్ట్ర ప్రవేశ పరీక్షల కొత్త తేదీలను తెలంగాణ రాష్ట్ర ఉన్నత విద్యామండలి ఖరారు చేసింది. ఎంసెట్‌ ఇంజినీరింగ్, ఈసెట్‌తో పాటు పాలిసెట్‌ తేదీలను ఆగ‌స్టు 10న విద్యాశాఖ మంత్రి సబితా ఇంద్రారెడ్డి సమక్షంలో అధికారులు నిర్ణయించారు. మిగిలిన పరీక్షల తేదీలను మంత్రి ఆమోదంతో ఉన్నత విద్యామండలి ఛైర్మన్‌ తుమ్మల పాపిరెడ్డి ఆగ‌స్టు 22న వెల్లడించారు. ఈసెట్‌ను ఆగ‌స్టు 31న నిర్వహిస్తుండగా...ఎడ్‌సెట్, లాసెట్‌లను అక్టోబరు మొదటి వారంలో పూర్తి చేయనున్నారు. మిగిలిన అన్ని పరీక్షలు సెప్టెంబరులోనే జరపనున్నారు. వ్యాయామ విద్య పరీక్ష(పీఈసెట్‌) తేదీలను ఇంకా ఖరారు చేయలేదు.
రాత పరీక్షలకు 4.07 లక్షల దరఖాస్తులు
ఉన్నత విద్యామండలి ఆధ్వర్యంలో జరిగే ఏడు ప్రవేశ పరీక్షలకు మొత్తం 4.07 లక్షల మంది దరఖాస్తు చేశారు. అందులో ఆంధ్రప్రదేశ్‌లో పరీక్షలు రాసే విద్యారులే 47,312 మంది ఉన్నారు. వాటిలో ఎంసెట్‌ ఇంజినీరింగ్‌కు 25 వేలకు పైగా, అగ్రికల్చర్‌కు 16 వేలకు పైగా ఉండటం విశేషం. ఇంకా తేదీలు ఖరారు కాని పీఈసెట్‌కు తెలంగాణ నుంచి 6,500 మంది దరఖాస్తు చేశారు. అత్యధికంగా ఎంసెట్‌ ఇంజినీరింగ్‌కు 1.42 లక్షలు దరఖాస్తులు రాగా...ఆ తర్వాత 78 వేలతో అగ్రికల్చర్‌ నిలిచింది. ఐసెట్‌కు దాదాపు 7 వేల వరకు ద‌ర‌ఖాస్తులు పెరిగాయని కన్వీనర్‌ రాజిరెడ్డి తెలిపారు. ప్రవేశ పరీక్షలు మళ్లీ వాయిదా పడతాయంటూ వస్తున్న వదంతులను నమ్మవద్దని ఉన్నత విద్యామండలి ఛైర్మన్‌ పాపిరెడ్డి తెలిపారు.

(గమనిక: పీఈసెట్‌కు 6,500 దరఖాస్తులు అందాయి. దీనికి రాత పరీక్ష ఉండదు. క్రీడల పోటీలుంటాయి. వాటి తేదీలను ఇంకా ఖరారు చేయలేదు)
ఆగ‌స్టు 24 నుంచి ఆన్‌లైన్‌లో ఇంజినీరింగ్‌, ఫార్మసీ పాఠాలు
* 2020-21 షెడ్యూల్‌ ప్రకటించిన జేఎన్‌టీయూ
ఈనాడు, హైదరాబాద్‌: ప్రస్తుత 2020-21 విద్యా సంవత్సరాన్ని ఆగ‌స్టు 24వ తేదీ నుంచి ప్రారంభిస్తున్నట్లు జేఎన్‌టీయూ ప్రకటించింది. ఇంజినీరింగ్‌, బీఫార్మసీ 2, 3, 4 సంవత్సరాల విద్యార్థులకు ఆన్‌లైన్‌లో బోధన చేపట్టనుంది. ఈ మేరకు విద్యా సంవత్సరం షెడ్యూల్‌ను విడుదల చేస్తూ వర్సిటీ రిజిస్ట్రార్‌ డాక్టర్‌ ఎం.మంజూర్‌ హుస్సేన్‌ ఆగ‌స్టు 21న‌ ఉత్తర్వులు జారీ చేశారు. యూజీ, పీజీ విద్యార్థులందరికీ అదే రోజు నుంచి ఆన్‌లైన్‌లో తరగతులు ప్రారంభమవుతాయి. మొదటి సెమిస్టర్‌ పూర్తిగా ఆన్‌లైన్‌లో జరిగే అవకాశం ఉందని అధికారులు చెబుతున్నారు. నవంబరు కల్లా పరిస్థితులు చక్కబడితే తరగతి గది బోధనకు శ్రీకారం చుట్టే వీలుంది. ప్రతి సెమిస్టర్‌లో రెండు విడతల్లో ఎనిమిదేసి వారాల చొప్పున 16 వారాల పాటు తరగతులు నిర్వహించేలా అధికారులు ప్రణాళిక రూపొందించారు. ల్యాబ్‌ల ఆధారిత ప్రయోగాలు సాధారణ పరిస్థితులు వచ్చాకే నిర్వహిస్తారు.
సెప్టెంబరు 16 నుంచి చివరి ఏడాది పరీక్షలు!
చివరి ఏడాది విద్యార్థులకు పరీక్షలను సెప్టెంబరు 16 నుంచి నిర్వహించేందుకు వర్సిటీ సూత్రప్రాయంగా నిర్ణయించింది. సుప్రీంకోర్టులో కేసు పెండింగులో ఉన్నందున సానుకూల నిర్ణయం రాగానే పరీక్షల టైంటేబుల్‌ ప్రకటించనుంది. పరిస్థితులు కుదురుకున్నాక పరీక్షలు నిర్వహిస్తామని, దాని ఆధారంగా విద్యా సంవత్సరంలో స్వల్ప మార్పులు జరుగుతాయని రిజిస్ట్రార్‌ మంజూర్‌ హుస్సేన్‌ వివరించారు.
ఆన్‌లైన్‌లో ఇంజినీరింగ్, ఫార్మసీ పాఠాలు
* 24 నుంచి తరగతులు ప్రారంభం
* 2020-21 విద్యా సంవత్సరం షెడ్యూల్‌ ప్రకటించిన జేఎన్‌టీయూ
ఈనాడు, హైదరాబాద్‌: ప్రస్తుత 2020-21 విద్యా సంవత్సరాన్ని ఆగ‌స్టు 24వ తేదీ నుంచి ప్రారంభిస్తున్నట్లు జేఎన్‌టీయూ ప్రకటించింది. ఇంజినీరింగ్, బీఫార్మసీ 2, 3, 4 సంవత్సరాల విద్యార్థులకు ఆన్‌లైన్‌లో బోధన చేపట్టనుంది. ఈ మేరకు విద్యా సంవత్సరం షెడ్యూల్‌ను విడుదల చేస్తూ వర్సిటీ రిజిస్ట్రార్‌ డాక్టర్‌ ఎం.మంజూర్‌ హుస్సేన్ ఆగ‌స్టు 21న‌ ఉత్తర్వులు జారీ చేశారు. యూజీ, పీజీ విద్యార్థులందరికీ అదే రోజు నుంచి ఆన్‌లైన్‌లో తరగతులు ప్రారంభమవుతాయి. మొదటి సెమిస్టర్‌ పూర్తిగా ఆన్‌లైన్‌లో జరిగే అవకాశం ఉందని అధికారులు చెబుతున్నారు. నవంబరు కల్లా పరిస్థితులు చక్క‌బడితే తరగతి గది బోధనకు శ్రీకారం చుట్టే వీలుంది. ప్రతి సెమిస్టర్‌లో రెండు విడతల్లో ఎనిమిదేసి వారాల చొప్పున 16 వారాల పాటు తరగతులు నిర్వహించేలా అధికారులు ప్రణాళిక రూపొందించారు. ల్యాబ్‌ల ఆధారిత ప్రయోగాలు సాధారణ పరిస్థితులు వచ్చాకే నిర్వహిస్తారు.
సెప్టెంబరు 16 నుంచి చివరి ఏడాది పరీక్షలు!
చివరి ఏడాది విద్యార్థులకు పరీక్షలను సెప్టెంబరు 16 నుంచి నిర్వహించేందుకు వర్సిటీ సూత్రప్రాయంగా నిర్ణయించింది. ప్రస్తుతం సుప్రీంకోర్టులో కేసు పెండింగులో ఉన్నందున సానుకూల నిర్ణయం రాగానే ఆ తేదీ నుంచి పరీక్షల టైంటేబుల్‌ ప్రకటించనుంది. చివరి ఏడాది మినహా మిగిలిన సంవత్సరాల విద్యార్థులకు జరగాల్సిన పరీక్షలు ఎప్పట్నుంచి ఉంటాయనేది స్పష్టత ఇవ్వలేదు. పరిస్థితులు కుదురుకున్నాక పరీక్షలు నిర్వహిస్తామని, దాని ఆధారంగా విద్యా సంవత్సరంలో స్వల్ప మార్పులు జరుగుతాయని రిజిస్ట్రార్‌ మంజూర్‌ హుస్సేన్‌ వివరించారు.
మొదటి, రెండు సెమిస్టర్ల వివరాలు
2020-21 విద్యా సంవత్సరంలో మొదటి, రెండు సెమిస్టర్ల వివరాలు
మొదటి సెమిస్టర్‌ షెడ్యూల్‌..
* మొదటి విడత తరగతులు - 24.8.20 - 17.10.20
* దసరా సెలవులు - 19.10.20 - 24.10.20
* మొదటి టర్మ్‌ పరీక్షలు - 26.10.20 - 31.10.20
* రెండో విడత తరగతులు - 2.11.2020 - 26.12.20
* రెండో టర్మ్‌ పరీక్షలు - 28.12.20 - 02.01.2021
* ప్రిపరేషన్‌ సెలవులు/ ప్రాక్టికల్స్‌ పరీక్షలు - 4.01.21 - 9.01.21
* సెమిస్టర్‌ పరీక్షలు - 11.01.21 - 23.01.21
రెండో సెమిస్టర్‌ షెడ్యూల్‌..
* మొదటి విడత తరగతులు - 25.01.2021- 20.03.21
* మొదటి టర్మ్‌ పరీక్షలు - 22.03.21 - 27.03.21
* రెండో విడత తరగతులు - 29.3.21 - 22.5.21
* రెండో టర్మ్‌ పరీక్షలు - 24.5.21 - 29.5.21
* ప్రిపరేషన్‌ సెలవులు/ ప్రాక్టికల్స్‌ పరీక్షలు - 31.5.21 - 5.6.21
* సెమిస్టర్‌ పరీక్షలు - 7.5.21 - 19.5.21
* వేసవి సెలవులు - 21.6.21 - 10.7.21
25 నుంచి ఈసెట్‌ హాల్‌టికెట్ల డౌన్‌లోడ్‌కు అవకాశం
ఈనాడు, హైదరాబాద్‌: ఈసెట్‌ హాల్‌టికెట్లను ఆగ‌స్టు 25 నుంచి డౌన్‌లోడ్‌ చేసుకునేందుకు అవకాశం కల్పిస్తున్నట్లు టీఎస్‌ ఈసెట్‌-2020 కన్వీనర్‌ డాక్టర్‌ ఎం.మంజూర్‌ హుస్సేన్‌ ఓ ప్రకటనలో పేర్కొన్నారు. కొవిడ్‌-19 నిబంధనలకు అనుగుణంగా ఆగ‌స్టు 31న ఆన్‌లైన్‌లో పరీక్ష నిర్వహించేందుకు ఏర్పాట్లు చేస్తున్నట్లు తెలిపారు. ఆంధ్రప్రదేశ్‌, తెలంగాణ రాష్ట్రాల్లోని 56 కేంద్రాల్లో ఉదయం, మధ్యాహ్నం (రెండు సెషన్లలో) పరీక్ష జరుగుతుందన్నారు.
24 నుంచి ‘దోస్త్’ దరఖాస్తులు
* మూడు విడతల కౌన్సెలింగ్ ద్వారా డిగ్రీ సీట్ల భర్తీ
* సెప్టెంబరు 16న మొదటి విడత సీట్లు కేటాయింపు
* డీఫార్మసీ, డీహెచ్ఎంసీటీ కోర్సుల్లో ప్రవేశాలూ దోస్త్ ద్వారానే
ఈనాడు, హైదరాబాద్: రాష్ట్రవ్యాప్తంగా డిగ్రీ కోర్సుల్లో ప్రవేశానికి డిగ్రీ ఆన్లైన్ సర్వీసెస్ తెలంగాణ (దోస్త్) ద్వారా అభ్యర్థులు ఆగస్టు 24 నుంచి దరఖాస్తు చేసుకోవచ్చు. ఈ మేరకు దోస్త్తాజా నోటిఫికేషన్, కాలపట్టికను తెలంగాణ రాష్ట్ర ఉన్నత విద్యామండలి కార్యాలయంలో ఛైర్మన్ తుమ్మల పాపిరెడ్డి, దోస్త్ కన్వీనర్ ఆచార్య ఆర్.లింబాద్రి, కళాశాల విద్యాశాఖ కమిషనర్ నవీన్మిత్తల్, విద్యామండలి ఉపాధ్యక్షుడు వి.వెంకటరమణ, కార్యదర్శి శ్రీనివాసరావు తదితరులు ఆగస్టు 20నవిడుదల చేశారు. ఈ సందర్భంగా పాపిరెడ్డి మాట్లాడుతూ మూడు విడతల కౌన్సెలింగ్ద్వారా సీట్లను భర్తీ చేస్తామని పేర్కొన్నారు. పాలిటెక్నిక్ కళాశాలల్లో డీ ఫార్మసీ, డిప్లొమా ఇన్ హోటల్ మేనేజ్మెంట్ అండ్ కేటరింగ్ టెక్నాలజీ (డీహెచ్ఎంసీటీ)లో ప్రవేశాలనూ ఈసారి దోస్త్ద్వారానే చేపడుతున్నామని చెప్పారు. లింబాద్రి మాట్లాడుతూ.. సహాయ కేంద్రాలను (హెచ్ఎల్సీ) 90 నుంచి 105కి పెంచినట్లు తెలిపారు. రిజిస్ట్రేషన్ తర్వాత విద్యార్థులకు దోస్త్ఐడీ, పిన్వస్తుందని.. ప్రవేశ ప్రక్రియ ముగిసే వరకు గోప్యంగా, జాగ్రత్తగా ఉంచుకోవాలని ఆయన సూచించారు. పొందిన సీటుతో సంతృప్తి చెందకపోతే తమ సీటు రిజర్వేషన్ కోసం రుసుం చెల్లించి.. తర్వాత జరిగే రెండు, మూడు విడతల వెబ్ ఆప్షన్లకు వెళ్లవచ్చన్నారు. యూజీసీ మార్గదర్శకాలను అనుసరించి తరగతుల ప్రారంభం తేదీని ఖరారు చేస్తామని వివరించారు.
ఇదీ కాలపట్టిక..
మొదటి విడత
* ఆగస్టు 24 - సెప్టెంబరు 7: రిజిస్ట్రేషన్
* ఆగస్టు 29 - సెప్టెంబరు 8: వెబ్ఆప్షన్లు
* సెప్టెంబరు 16: సీట్ల కేటాయింపు
* సెప్టెంబరు 17 - 22: ఆన్లైన్ సెల్ఫ్ రిపోర్టింగ్
రెండో విడత
* సెప్టెంబరు 17 - 23: రిజిస్ట్రేషన్, వెబ్ఆప్షన్లు
* సెప్టెంబరు 28: సీట్ల కేటాయింపు
* సెప్టెంబరు 28 - అక్టోబరు 2: ఆన్లైన్ సెల్ఫ్ రిపోర్టింగ్
మూడో విడత
* సెప్టెంబరు 28 - అక్టోబరు 3: రిజిస్ట్రేషన్, వెబ్ఆప్షన్లు
* అక్టోబరు 8: సీట్ల కేటాయింపు
* అక్టోబరు 8 - 10: ఆన్లైన్సెల్ఫ్రిపోర్టింగ్
* అక్టోబరు 8 - 12: 1, 2, 3 విడతల్లో సెల్ఫ్ రిపోర్టింగ్ ద్వారా సీట్లను ధ్రువీకరించుకున్నవారు కళాశాలలకు వెళ్లి రిపోర్టు చేయాలి.
రిజిస్ట్రేషన్ఇలా.. .
ఆధార్తో అనుసంధానం చేసిన మొబైల్నంబరుకి వచ్చిన ఓటీపీ ద్వారా దోస్త్వెబ్సైట్లో రిజిస్ట్రేషన్ చేసుకోవచ్చు. మొబైల్ నంబరు అనుసంధానం కాకుంటే తమ లేదా తల్లిదండ్రుల మొబైల్నంబరును విద్యార్థి ఆధార్తో అనుసంధానం చేసుకోవచ్చు. లేదా దోస్త్సహాయ కేంద్రాలకు వచ్చి రిజిస్ట్రేషన్ చేసుకోవచ్చు. టీ యాప్ఫోలియా మొబైల్ యాప్ ద్వారా కూడా నమోదు చేసుకోవచ్చు. పూర్తి వివరాలను దోస్త్ వెబ్సైట్www.dost.cgg.gov.in ద్వారా తెలుసుకోవచ్చు. దోస్త్ మెనూతో పాటు ఎప్పటికప్పుడు తాజా సమాచారం కోసం 79010 02200కు మొబైల్ నంబరు నుంచి hi అని సంక్షిప్త సందేశం పంపిస్తే చాలు.
కేంద్ర ఉద్యోగాలకు ఒక‌టే ప‌రీక్ష‌
* ఉద్యోగ నియామకాలకు జాతీయ సంస్థ ఏర్పాటు
* ఆర్‌ఆర్‌బీ, ఎస్‌ఎస్‌సీ, ఐబీపీఎస్‌ ప్రాథమిక పరీక్షల బాధ్యత ఎన్‌ఆర్‌ఏదే
* సాధించిన స్కోర్‌ మూడేళ్లపాటు చెల్లుబాటు
* కేంద్ర కేబినెట్‌ ఆమోదం
ఈనాడు, దిల్లీ: కేంద్ర ప్రభుత్వ ఉద్యోగ నియామకాల్లో విప్లవాత్మక సంస్కరణకు ఎన్డీయే సర్కారు నడుం బిగించింది. ఒకే దేశం- ఒకే పరీక్ష అనే రీతిలో కేంద్రంలోని వివిధ శాఖల్లోని ఖాళీల భర్తీ కోసం ‘జాతీయ నియామకాల సంస్థ’ (నేషనల్‌ రిక్రూట్‌మెంట్‌ ఏజెన్సీ- ఎన్‌ఆర్‌ఏ)ని ఏర్పాటు చేయాలని కేంద్ర మంత్రిమండలి నిర్ణయించింది. ప్రధానమంత్రి నరేంద్రమోదీ అధ్యక్షతన ఆగ‌స్టు 19న జరిగిన సమావేశం దీనికి ఆమోదముద్ర వేసింది. రైల్వే, బ్యాంకింగ్‌, స్టాఫ్‌ సెలక్షన్‌ కమిషన్‌ (ఎస్‌ఎస్‌సీ) కింద వేర్వేరుగా భర్తీచేసే ఉద్యోగాలకు ఒకే ఉమ్మడి ప్రాథమిక అర్హత పరీక్ష నిర్వహించేందుకు ఈ ఏజెన్సీని ఏర్పాటు చేసినట్లు కేంద్ర సిబ్బంది వ్యవహారాల శాఖ సహాయ మంత్రి జితేంద్రసింగ్‌ విలేకర్ల సమావేశంలో వెల్లడించారు. దశలవారీగా ఈ సంస్థలను పెంచుకుంటూ వెళ్తామని చెప్పారు.
ఒకే గూటి కిందికి..
* ఎన్‌ఆర్‌ఏ పరిధిలోకి కేంద్ర ప్రభుత్వంలోని 20 నియామక సంస్థలను తీసుకొస్తారు.
* దేశంలోని ప్రతి జిల్లాలో కనీసం ఒకటి చొప్పున సుమారు వెయ్యి పరీక్ష కేంద్రాలు ఏర్పాటు చేస్తారు.
* ఏటా రెండుసార్లు నిర్వహించే ఈ పరీక్షల్లో విద్యార్థులు సాధించే స్కోర్‌ మూడేళ్లు చెల్లుబాటవుతుంది.
స్కోర్‌ పెంచుకోవడానికి అభ్యర్థులు మళ్లీమళ్లీ పరీక్షలు రాయొచ్చు. అత్యుత్తమ స్కోర్‌నే పరిగణనలో తీసుకుంటారు.
* ప్రస్తుతం 12 భాషల్లో పరీక్ష జరుగుతుంది. తర్వాత రాజ్యాంగంలోని 8వ షెడ్యూల్‌లో ఉన్న భారతీయ భాషలన్నింటిలో నిర్వహిస్తారు.
* వేర్వేరు రుసుములతో అనేకసార్లు పరీక్షలకు హాజరు కావాల్సిన అవసరం ఉండదు.
కోట్ల మందికి వరం
జాతీయ నియామక సంస్థ ఏర్పాటు వల్ల కోట్ల మంది యువతకు మేలు కలుగుతుంది. ఎందుకంటే వారు ఉద్యోగాల కోసం వేర్వేరు పరీక్షలు రాయాల్సిన అవసరం ఉండదు. విలువైన సమయం, ఇతర వనరులు ఆదా అవుతాయి. పారదర్శకత పెరుగుతుంది.
- ప్రధానమంత్రి నరేంద్రమోదీ
ఏటా మూడు కోట్ల మంది
రైల్వే రిక్రూట్‌మెంట్‌ బోర్డ్‌ (ఆర్‌ఆర్‌బీ), స్టాఫ్‌ సెలెక్షన్‌ కమిషన్‌ (ఎస్‌ఎస్‌సీ), ఐబీపీఎస్‌ (ఇన్‌స్టిట్యూట్‌ ఆఫ్‌ బ్యాంకింగ్‌ పర్సనల్‌ సెలెక్షన్‌) కింద ఏటా 1.25 లక్షల గ్రూప్‌-బి, సి ఉద్యోగాల ఖాళీలు ఏర్పడుతున్నాయి. వీటికి దాదాపు 3 కోట్ల మంది హాజరవుతుంటారు.
* ఖాళీల భర్తీకి 12-18 నెలల సమయం పట్టేది.
* నియామక పరీక్షల్లో ఒక అంచె తగ్గించడానికి ఈ మూడు సంస్థలకు కలిపి ఉమ్మడి అర్హత పరీక్ష నిర్వహిస్తారు.
* దీనిలో స్కోర్‌ ఆధారంగా ఇవి తదుపరి పరీక్షలను వేర్వేరుగా నిర్వహించి, అభ్యర్థులను ఎంపిక చేసుకోవచ్చు.
పది, ఇంటర్‌, డిగ్రీ స్థాయుల్లో
* పదో తరగతి, ఇంటర్మీడియేట్‌, డిగ్రీ అర్హతల ప్రకారం పరీక్షలు నిర్వహిస్తారు.
* గరిష్ఠ వయోపరిమితి లోపు ఎన్నిసార్లయినా అభ్యర్థులు వీటిని రాయవచ్చు.
* ఎస్సీ, ఎస్టీ, ఓబీసీ, దివ్యాంగులకు వయోపరిమితిలో నిబంధనల మేరకు సడలింపు ఇస్తారు.
* అభ్యర్థుల స్కోర్లు ప్రభుత్వ, ప్రభుత్వరంగ, ప్రైవేటు సంస్థలకు అందుబాటులో ఉంటాయి. వీటి ఆధారంగా అవి నియామకాలు చేపట్టవచ్చు.
* రెండో దశ పరీక్ష అవసరం లేకుండా మొదటి దశలోని స్కోరు, వైద్య పరీక్షల ఆధారంగానే నియామకాలు చేసుకుంటామని కొన్ని సంస్థలు సూచనప్రాయంగా చెప్పడం అభ్యర్థులకు మరింత ఊరటగా ప్రభుత్వం పేర్కొంది.

ఎన్‌ఆర్‌ఏ ముఖ్యాంశాలు
ఎన్‌ఆర్‌ఏను స్వయం ప్రతిపత్తి గల సంస్థగా ఏర్పాటు చేస్తారు. ఛైర్మన్‌గా కేంద్ర ప్రభుత్వ కార్యదర్శి స్థాయి అధికారి ఉంటారు. పాలకమండలిలో ఆర్‌ఆర్‌బీ, ఎస్‌ఎస్‌సీ, ఐబీపీఎస్‌ల ప్రతినిధులు సభ్యులుగా ఉంటారు.
* తొలి మూడేళ్లలో నిర్వహణకు ఖర్చు: రూ.1,517.57 కోట్లు
* నూతన విధానం వల్ల తుది పరీక్షలు రాసే అభ్యర్థుల సంఖ్య 5 శాతానికి పరిమితం అవుతుంది.
* తొలిదశ పరీక్షను ఆన్‌లైన్‌లో నిర్వహిస్తారు. తక్షణం స్కోర్‌ లభిస్తుంది. దాని ఆధారంగా అభ్యర్థి ఈ మూడు బోర్డుల్లోని ఏదైనా ఉద్యోగానికి దరఖాస్తు చేసుకొని, దానికి అవసరమైన తదుపరి దశ పరీక్ష రాయొచ్చు.
* ప్రస్తుతం ఈ ఏజెన్సీ పరిధిని 3 నియామక బోర్డులకే వర్తింపజేస్తున్నారు. అంతా గాడిన పడుతున్నకొద్దీ కేంద్రంలోని 20 నియామక సంస్థలనూ దీని పరిధిలోకి తీసుకువస్తారు.
ఒకే సిలబస్‌
అన్ని ప్రాథమిక పరీక్షలకూ ఒకే సిలబస్‌ ఉంటుంది. అభ్యర్థులు వేర్వేరుగా సన్నద్ధం కావాల్సిన అవసరం ఉండదు.
* ప్రతి జిల్లాలో కనీసం ఒక పరీక్ష కేంద్రం ఏర్పాటు చేస్తారు. అభ్యర్థులు ఎక్కువగా ఉన్నచోట ఒకటికి మించి నెలకొల్పుతారు. గ్రామీణ అభ్యర్థులు దూరప్రాంతాలకు వెళ్లాల్సిన అవసరం లేకుండా సొంత జిల్లాలోనే పరీక్ష రాయడానికి వీలవుతుంది.
* పరీక్షలు తొలుత 12 ప్రాంతీయ భాషల్లో నిర్వహించడంవల్ల కేంద్ర ఉద్యోగాల్లో అన్ని భాషలవారి ప్రాతినిధ్యం పెరుగుతుంది.
* ఉమ్మడి రిజిస్ట్రేషన్‌ పోర్టల్‌ ఏర్పాటు చేస్తారు. దీనిద్వారా అభ్యర్థులు తమకు సమీపంలోని కేంద్రాలను ఎంచుకోవచ్చు.
* ఒకే క్వశ్చన్‌ బ్యాంకు ఉంటుంది. సురక్షితమైన, అత్యాధునిక సాంకేతిక పరిజ్ఞానంతో కేంద్రీయంగా సర్వర్‌ను నిర్వహిస్తారు.
* 117 ఆకాంక్షిత జిల్లాల నుంచి ఉద్యోగాల్లో ప్రాతినిధ్యం పెంచడానికి ప్రత్యేక చేయూతనందిస్తారు. అక్కడి వారికి అవసరమైన సాయం చేయడానికి 24 గంటల హెల్ప్‌లైన్‌ ఏర్పాటుచేస్తారు. ఈ జిల్లాల్లో పరీక్ష కేంద్రాలకు అవసరమైన వసతుల కల్పనకు కేంద్ర ప్రభుత్వం ‘వ్యయ సర్దుబాటు నిధి’ ఇస్తుంది.